Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

“Owo Edịp ye Iba Ẹkewọrọ ke Ufọkabasi”

“Owo Edịp ye Iba Ẹkewọrọ ke Ufọkabasi”

GERMAN GOMERA ekedi ọyọhọ eyen duop ke otu nditọ duopekiet. Ke ete esie ye nditọeka esie iban iba ẹma ẹkekpa, Luisa emi ekedide eka mmọ, ama atan̄ mmọ ọwọrọ okodụn̄ ke akwa obio. Mmọ ẹma ẹtọn̄ọ ndisika Ufọkabasi Mme Mennonite do. Ufọkabasi emi ke nditọeka Luisa ye ikọtufọk mmọ ẹkesika.

German ọdọhọ ete: “Ke 1962, ebe ye n̄wan emi ẹdide akpan asiakusụn̄ ẹma ẹdi obio nnyịn. Ẹkedọhọ nnyịn ke mmọ ẹda ‘ukpepn̄kpọ Satan mmọ’ ẹbian̄a nditọ obio nnyịn. Edi ke ini mmọ ẹkedide edem mme Piña, ẹma ẹyak mmọ ẹdụk ẹkwọrọ ikọ. Ẹma ẹwak etieti ke ufọk mme Piña. Mmọ ẹma ẹma nte mme asiakusụn̄ oro ẹkefọnde ido ẹnyụn̄ ẹtiede ufan ufan, ndien ẹma ẹnen̄ede ẹkpan̄ utọn̄ ẹkop se mmọ ẹketịn̄de. Ntak edi oro mme Piña ye ikpọ nditọeka mi iban ita ẹketọn̄ọde ndikpep n̄kpọ.”

German ọdọhọ n̄ko ete: “Usen kiet, ke ini mme asiakusụn̄ emi ẹkedide ufọk mme Piña, mmọ ẹma ẹdọhọ eka mi etiene edikop Ikọ Abasi. Mme Ntiense oro ẹma ẹkot itie Bible emi ọdọhọde ke mme owo ẹyedụn̄ ke isọn̄ emi ke nsinsi. Eka mi ama obụp ete, ‘Ntak emi ẹsidọhọde ke ufọkabasi nnyịn ke kpukpru nnyịn idika heaven?’ Ke mmọ ẹma ẹkeda Bible ẹbọrọ  ẹnyụn̄ ẹwụt enye se Bible etịn̄de aban̄a nte mme akpan̄kpa ẹdisetde ididu ke isọn̄ emi, eka mi ama enịm se mmọ ẹtịn̄de, onyụn̄ ọtọn̄ọ ndikwọrọ ikọ nnọ mbon en̄wen.

“Ke ini mme pastọ Ufọkabasi Mme Mennonite ẹkekụtde ke ediwak mbon ufọkabasi mmọ ke ẹkpep Bible ye Mme Ntiense Jehovah, mmọ ẹma ẹn̄wana ndinam mmọ ẹtre. Edi mmọ ẹkenam emi ekọn̄ ekọn̄, ẹsinyụn̄ ẹsịn owo ndịk ke idem. Maximina emi ekedide n̄wan Ete Piña ama ọdọhọ mmọ ete, ‘Sese, ndịghe eyenọwọn̄, mmọdiọn̄ọ se nnamde.’”

German afiak ọdọhọ ete: “Nte ini akade, owo 22 ẹkewọrọ ke Ufọkabasi Mme Mennonite ẹditọn̄ọ ndidụk mbono esop ke itie emi ẹkebọde ke ukpeokụk. Eka mi akana baptism ke 1965, ndien ami nna ke 1969 ke ini n̄kedide isua 13.”

German ye nditọeka esie mfịn. Kpukpru mmọ ke ẹnam n̄kpọ Jehovah