Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Mmọ Ẹma Ikọt Mmọ

Mmọ Ẹma Ikọt Mmọ

Obufa Ufọkn̄wed Anam Ẹnyene Se Ẹyomde

Jehovah ama ọdiọn̄ utom emi ikọt esie ẹkenamde ke Dominican Republic. Ke 1994, esop 259 ẹkedu, mme asuanetop ẹkenyụn̄ ẹdi 16,354. Ama enem ndikụt nte mme owo ye mme esop ẹwakde ntre, edi ẹma ẹyom mbiowo ye mme asan̄autom unamutom. Kpa ke 1994 oro, Otu Emi Ẹsede Ẹban̄a Utom Mme Ntiense Jehovah ẹma ẹnyịme ẹtọn̄ọ Ufọkn̄wed Unọ Mme Asan̄autom Ukpep ke Dominican Republic. Idahaemi ufọkn̄wed oro idụhe aba, Ufọkn̄wed Mme Ọkwọrọ Obio Ubọn̄ edidu.

 Etisịm October 2011, ẹma ẹnịm ufọkn̄wed emi utịm ike 25 ndien n̄kpọ nte owo 600 ẹkeka. Idahaemi, se ibede owo 300 ke otu nditọ ufọkn̄wed oro ke ẹnam utom ofụri ini. Owo 71 ẹdi mme akpan asiakusụn̄, owo 5 ẹnyụn̄ ẹdi mme esenyịn circuit. Ke ntọn̄ọ ntọn̄ọ, ẹma ẹnịm ufọkn̄wed emi utịm ikoduop ke n̄kọk itieutom. Edi ọtọn̄ọde ke ọyọhọ otu duopekiet, ẹma ẹsio ufọkn̄wed emi ẹka ebiet emi ẹkebọpde man ẹsida ẹnịm enye ke Villa González.

“Mme Ntiense Jehovah Ẹsin̄wam Ikọt Mmọ”

Ke September 22, 1998, ọkpọsọn̄ oyobio emi ẹkotde Hurricane Georges ama abiat n̄kpọ etieti ke Dominican Republic. Ẹma ẹkpan̄a ẹbe owo 300, ediwak tọsịn eken ẹnana ufọk. Kọmiti Ubọpufọk Eke Ikpehe ke Ikpehe ẹma ẹdiana ye Kọmiti Unọ Un̄wam ke Ini Afanikọn̄ ẹda Ufọkmbono Obio Ubọn̄ ke La Romana ẹn̄wam mme  owo. N̄kpọ nte owo 300, esịnede Mme Ntiense emi ẹtode idụt 16, ẹma ẹdi ẹdin̄wam nditọete do.

Akana ẹfiak ẹbọp mîdịghe ẹdiọn̄ Ufọkmbono Obio Ubọn̄ 23 ye ufọk nditọete 800. Ke uwụtn̄kpọ, oyobio oro ama abiat ufọk Carmen emi edide asiakusụn̄ ofụri ini. Carmen ama ọsọn̄, enye ama onyụn̄ odụn̄ ke ufọk oro ke isua 38. Edi esịt ama enem enye etieti ke ini nditọete 15 ẹkedide ẹdisịn itiat idakisọn̄ obufa ufọk esie. Carmen ọdọhọ ete: “Jehovah isifreke ikọt esie; enye esikama nnyịn. Sese utọ ediye ufọk emi nditọete mi ẹbọpde ẹnọ mi. Mbọhọidụn̄ mi ẹkedọhọ mi ẹte: ‘Mme Ntiense Jehovah ẹsinam n̄kpọ ẹnọ ikọt mmọ; mmọ ẹnen̄ede ẹma idemmọ.’” Ẹma ẹtịn̄ mbiet ikọ emi ke ediwak itie ke Dominican Republic ke ini nditọete ẹkesan̄ade ẹn̄wam nditọete mmọ oro n̄kpọ emi ọkọwọrọde.

Okposụkedi emi Hurricane Georges akabiatde n̄kpọ etieti, se ikọt Jehovah ẹkenamde ẹnọ nditọete mmọ ama ọdọn̄ mmọ esịt onyụn̄ anam mmọ ẹdiọn̄ọ ke Jehovah ifreke mmọ. Akakan n̄kpọ edi nte ke se nditọete ẹkenamde man ẹn̄wam nditọete mmọ ama anam mme owo ẹtoro Jehovah, sia Jehovah akada mmọ ọdọn̄ mbon eken esịt.

Ẹbọp Ediwak Ufọkmbono Obio Ubọn̄

Ama oyom ẹbọp ediwak mbufa Ufọkmbono Obio Ubọn̄ sia mbufa owo ẹma ẹtọn̄ọ ndiwak etieti ke esop. Esop Abasi ẹsin̄wam mme idụt oro mînen̄ekede inyene n̄kpọ ẹbọp Ufọkmbono Obio Ubọn̄. Ẹma ẹn̄wam nditọete ke Dominican Republic ndien ke November 2000, mmọ ẹma ẹtọn̄ọ ndibọp mme Ufọkmbono Obio Ubọn̄ oro. Emi ama anam esop ekeme ndibọp ekpri ediye ufọkmbono ke n̄kpọ nte ọfiọn̄ iba. Etisịm September 2011, otu iba emi ẹsibọpde Ufọkmbono Obio Ubọn̄  ẹma ẹbọp mîdịghe ẹfiak ẹdiọn̄ Ufọkmbono Obio Ubọn̄ 145.

Mme Ufọkmbono Obio Ubọn̄ emi ẹma ẹnam mme owo ẹma ikọt Abasi. Ke uwụtn̄kpọ, ke ekpri obio kiet ke edere edere idụt oro, nditọete ẹma ẹkụt itie emi mmọ ẹkpemade ndibọp obufa Ufọkmbono Obio Ubọn̄. Akpan asiakusụn̄ kiet ama okobụp enyene isọn̄ oro m̀mê enye ọmọn̄ anyam ọnọ mmimọ. Ete oro ama ọdọhọ enye ete: “Kûbiat idem fo ini sia ndinyamke isọn̄ oro nnọ mbufo, akpan akpan edieke ẹyomde ndida mbọp ufọkabasi.”

Ibịghike-bịghi ke oro ebede, enyene isọn̄ oro ama aka Puerto Plata ndise akpaneka esie emi edide Ntiense Jehovah. Ke ini enye esịmde do, enye ama okụt ke ubon kiet emi ẹkedide Mme Ntiense ẹma ẹmen eyeneka imọ emi idem mîsọn̄ke ẹnyọn̄ ẹkekama. Mmọ ẹma ẹsimen enye ẹka ufọkibọk, ẹmen ẹka mbono esop, ẹnyụn̄ ẹmen ẹka ukwọrọikọ. Enye ama obụp eyeneka esie m̀mê enye ekpe mmọ okụk ifan̄ man ẹkama enye ntre. Eyeneka esie ama ọdọhọ enye ete: “N̄kpehe mmọ n̄kpọ ndomokiet. Mmọ ẹdi nditọete mi.”

“Akananam n̄kwe nte mme owo ẹdianade kiet ẹnyụn̄ ẹfọnde uwem ntem”

Nte Mme Ntiense oro ẹkefọnde ido ye eyeneka enyene isọn̄ oro ama akpa enye idem tutu enye okot akpan asiakusụn̄ oro ọdọhọ enye edi ke imọn̄ inyam isọn̄ oro ndien. Nditọete ẹma ẹdep isọn̄ oro ẹnyụn̄ ẹtọn̄ọ ndibọp Ufọkmbono Obio Ubọn̄ mmọ. N̄wan enyene isọn̄ oro ama esisua Mme Ntiense Jehovah etieti. Edi ke ini enye okụtde nte nditọete oro ẹdianade kiet ẹnam utom man ẹbọp Ufọkmbono Obio Ubọn̄ oro, enye ama ọdọhọ ete, “Akananam n̄kwe nte mme owo ẹdianade kiet ẹnyụn̄ ẹfọnde uwem ntem.”