Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Ama Odorode Mi Ndikpono Abasi

Martín Paredes

Ama Odorode Mi Ndikpono Abasi
  • AKAMANA KE 1976

  • ANA BAPTISM KE 1991

  • SE IBAN̄ADE ENYE Ke ini Martín okosụk akade ufọkn̄wed mme oku ke enye ọkọdiọn̄ọ akpanikọ. Tọn̄ọ oro, enye an̄wam ediwak owo ẹdifiọk akpanikọ.

IKEDI ata mbon Catholic ke ufọk nnyịn. Ete ye eka mi ẹkeyom mi ndi oku. Ntre ke ini n̄kedide isua 12, mma n̄ka ufọkn̄wed emi oku ita ẹkpepde mi n̄kpọ. Ke 1990, ke ini n̄kedide isua 14, ẹma ẹnọ mi n̄ka mfọnn̄kan ufọkn̄wed mme oku ke idụt nnyịn.

Ẹma ẹdọhọ mi ke edieke n̄kade iso nsịn idem n̄kpep n̄kpọ, ke nyedi oku usen kiet. Edi esịt ikenemke mi. N̄kekere ke ẹdikpep nnyịn Bible ke ufọkn̄wed emi, edi ẹkekpep nnyịn ekikere owo. Utọ uwem oro mme oku ẹkedude ama edehe etieti. Ke ini mmọ ẹkeyomde ndinam ima ye ami emi ndide erenowo nte mmọ, ama odorode mi ndikpono Abasi.

Ini oro ke ebe ye n̄wan emi ẹdide Mme Ntiense Jehovah ẹkedi ẹdinọ akama-okụk ufọkn̄wed nnyịn n̄wed emi, Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn. Mmọ ẹketo idụt en̄wen ẹdikwọrọ ikọ mi. Mma  mben̄e n̄wed oro n̄kokot kpukpru n̄kpọ nnyụn̄ n̄kụt ke se n̄koyomde edi oro. Ntre, mma n̄wọrọ ke ufọkn̄wed mme oku oro, ntọn̄ọ ndikpep Bible ye Mme Ntiense Jehovah, nnyụn̄ ntiene ndụk mbono esop mmọ. Mma nna baptism ke ufan̄ ọfiọn̄ itiaita, ke July 1991. Mma ntọn̄ọ ndikwọrọ ikọ kpukpru ini nnyụn̄ ndọ eyenete an̄wan emi esinyụn̄ ọkwọrọde ikọ kpukpru ini. Enye ekere María. Nnyịn mbiba idi mme akpan asiakusụn̄ toto ke 2006. Idahaemi, ndinam n̄kpọ Abasi idorokede mi aba, akam enenem mi ndin̄wam mme owo ẹkpono Abasi.