Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Akpa Inan Emi Ọkọbọde Akpanikọ

José Pérez

Akpa Inan Emi Ọkọbọde Akpanikọ
  • AKAMANA KE 1960

  • ANA BAPTISM KE 1982

  • SE IBAN̄ADE ENYE Ke ini Jose ekedide eyenọwọn̄, enye ekesika mbono esop Mme Ntiense Jehovah ke ntak emi mmọ ẹkemade kiet eken ẹnyụn̄ ẹma enye, kpa ye oro owo ndomokiet do mîkọdiọn̄ọke usem idiọn̄ọ.

N̄KAKABADE inan ke ini n̄kedide eyenọwọn̄, mma nnyụn̄ n̄ka ufọkn̄wed inan n̄kekpep usem idiọn̄ọ. Ke ini n̄kedide isua 11, Mme Ntiense Jehovah ke mbọhọ nnyịn ẹma ẹkot mi mbono esop mmọ. Ini emi ke n̄kọtọn̄ọ ndikpep akpanikọ. Kpa ye oro mmen̄kokopke se ẹketịn̄de, mmọ ẹma ẹnen̄ede ẹdara mi, ntre mma mbiere ndika iso ndụk mbono esop ye mmọ. Ediwak mmọ ẹma ẹsikot mi ufọk ẹsinyụn̄ ẹda mi ẹwọrọ.

Ke 1982, mma ndi asuanetop emi mînaha baptism nnyụn̄ nna baptism kpa isua oro. Mma ndọ Eva emi onyụn̄ edide inan ke 1984. Kpa ye oro ndusụk n̄kpọ ke Bible mîkenen̄ekede in̄wan̄a nnyịn, nte nditọete ẹkemade kiet eken ama anam ifiọk ke idu ke esop Abasi, ama  onyụn̄ enem nnyịn ndidian idem ye nditọete ke esop.—John 13:35.

Ke 1992, ẹma ẹtọn̄ọ ndikpep ndusụk nditọete Usem Idiọn̄ọ America. Nditọete emi ẹma ẹtọn̄ọ ndisan̄a nyom mme inan nnyụn̄ n̄kwọrọ ikọ nnọ mmọ. Ekem ke 1994, ediwak inan ẹma ẹbọ akpanikọ ke ini ebe ye n̄wan ẹketode Puerto Rico ẹdikpep nditọete 25 usem idiọn̄ọ ke n̄kọk itieutom nnyịn.

Kpa isua oro, ami ye Eva an̄wan mi ima itọn̄ọ ndidụk mbono esop ye otu usem idiọn̄ọ oro ẹkesiakde obufa mi. Ini oro ndien ke ikenen̄ede ifiọk ndusụk n̄kpọ emi Bible ekpepde, utọ nte se Satan eketịn̄de ndiwụt ke Abasi inyeneke unen ndikara enyọn̄ ye isọn̄ ye nte Obio Ubọn̄ Messiah edinamde uduak Abasi osu.

Ke December 1, 1995, ẹma ẹsiak mme esop Usem Idiọn̄ọ America ke Santo Domingo ye Santiago. Etisịm August 2014, esop usem idiọn̄ọ 26 ye otu usem idiọn̄ọ 18 ẹkedu.

Nnyịn ikebem iso ikpep nditọ nnyịn usem idiọn̄ọ. Éber akpan nnyịn anam utom ke itie ukabade n̄wed nsịn ke usem idiọn̄ọ ke Bethel United States. Ami ndi asan̄autom unamutom ke esop nnyịn, n̄wan mi edi asiakusụn̄.