Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

 DOMINICAN REPUBLIC

Anie Edi Adausụn̄?

Anie Edi Adausụn̄?

‘Bịn Mme Adaiso Mmọ’

Ke July 13, 1957, Luis Arzeno Colón ama ewet leta ọnọ akwaowo emi esede aban̄a mbubehe Dominican Republic ete: “Mme ete nnyịn ẹsidọhọ ẹte: ‘Okpoyom ndiwot urụkikọt ana esịbe enye ibuot.’ Akpan n̄kpọ kiet emi edin̄wamde nnyịn itre n̄ka Mme Ntiense Jehovah edi ndiyom usụn̄ mbịn mme isụn̄utom mmọ nsion̄o ke idụt emi. Ẹma ẹbịn mmọ, mbon eken idinyeneke eke adade mmọ usụn̄ aba; mme adausụn̄ mîdụhe, idụhe se mmọ ẹdinamde emi ediwọrọde usụn̄.”

Ikebịghike-bịghi, akwaowo kiet emi ekerede Arturo Espaillat ama ọdọhọ isụn̄utom duop emi ẹkesụhọde ke idụt oro ẹnyọn̄ọ. Ke July 21, 1957, Roy Brandt ama ewet n̄wed ọnọ Trujillo ete ke iyom ndikokụt enye man ineme n̄kpọ oro ye enye. Ndusụk n̄kpọ emi enye ekewetde ke leta esie ẹdi emi: “Kpa nte ndusụk owo ẹkenamde mme owo ẹsua mme apostle Jesus, ntre ke ndusụk owo ke idụt emi ẹnam mme owo ẹsua enyịn̄ Jehovah Abasi.” Brọda Brandt ama ọdọhọ Trujillo okot Utom ibuot 2  esịm 6, onyụn̄ adian do ete: “Eti item emi Gamaliel ọkọnọde mme owo ini oro ke osụk enyenyene ufọn mfịn nte ekenyenede ini oro.” Ekem Brọda Brandt ama ewet se idude ke Utom 5:38, 39 ke ikpọ abisi ete: ‘SANA MMỌ YAK KORO EDIEKE UTOM EMI OTODE ABASI, EMEKEME NDIDIKỤT KE IKAM IN̄WANA YE ABASI.’ Se eyenete emi ekewetde ọnọ Trujillo ekebiet ẹduọn̄ọ inụn̄ ke nsia ebiọn̄. Ke August 3, 1957, ẹma ẹtan̄ kpukpru mme isụn̄utom oro ẹkedọn̄ ke ubomofụm ẹte ẹnyọn̄ọ.

Jesus Edi Adausụn̄

Donald Nowills ekese aban̄a utom ke idụt oro ke ini enye ekedide isua 20 kpọt

Nditọete nnyịn ke idụt oro ẹdinanam didie, emi mme isụn̄utom ẹma ẹkenyọn̄ọ mi? Ndi adausụn̄ ikodụhe aba nte Colón eketịn̄de? Ihih, Jesus ke akada esop Abasi usụn̄. (Col. 1:18) Oro ọwọrọ ke ikọt Jehovah ke Dominican  Republic ẹma ẹnyene owo emi adade mmọ usụn̄. Jehovah ye esop esie ẹma ẹka iso ẹse ẹban̄a mmọ.

Ke mme isụn̄utom ẹma ẹkenyọn̄ọ, ẹma ẹdọhọ Donald Nowills ese aban̄a utom ke idụt oro. Enye ekedi isua 20 okonyụn̄ ana baptism isua inan̄ kpọt. Kpa ye emi enye ekedide esenyịn circuit ke ọfiọn̄ ifan̄, utom emi ẹkenọde enye mi okosụk etie enye esen esen. Brọda Nowills ama enyene ekpri ọfis ke ufọk esie. Ẹkeda obukpọk ye tian ẹnam ọfis oro, owo ikonyụn̄ isịnke isọn̄. Ọfis emi akada ke Gualey ke Ciudad Trujillo. Itie emi ikenen̄ekede ifọn. Félix Marte ama esin̄wam enye, mmọ ẹma ẹsinam fotokọpi Enyọn̄-Ukpeme ẹnọ mme owo ke ofụri idụt oro.

Fotokọpi Enyọn̄-Ukpeme 1958

Mary Glass emi ẹkemụmde ebe esie ẹkesịn ke ufọk-n̄kpọkọbi ini oro ama esitiene an̄wam Brọda Nowills. Mary ọdọhọ ete: “Mma nnyọn̄ utom ke n̄kanika ition mbubreyo, mma nsika ọfis Brọda Nowills n̄kataip Enyọn̄-Ukpeme. Ekem Brọda Nowills ayada ekpri masịn  kiet anam fotokọpi. Eyenete an̄wan kiet emi otode Santiago, emi ikesikotde angel ama esimen mme magazine oro ọdọn̄ ke tian aran okụbi. Enye eyebri ọfọn̄ ofụk magazine oro onyụn̄ atan̄ iwa, bia mbakara, m̀mê n̄kpọn̄ odori. Ekem enye eyemen n̄kpụp-n̄kpụp ekpat esịn n̄kpọ emi. Ke enye ama akanam emi ama, enye eyekpe usụn̄ aka n̄kan̄ edere edere ọkọnọ esop kiet kiet magazine kiet. Nsio nsio ubon ẹma ẹsibọ magazine emi ẹketie ntre ẹkpep ekem ẹnọ mbon en̄wen.”

Mary adian do ete: “Ima isinen̄ede ikpeme idem sia ukara ẹma ẹsio mme owo ẹdọn̄ ẹsan̄a ke efak ke efak ẹyom ebiet emi ẹmịn̄de Enyọn̄-Ukpeme. Edi mmọ ikekwe. Jehovah ikayakke mmọ ẹkụt nnyịn.”