Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2015

Leta Otu Emi Ẹsede Ẹban̄a Utom Mme Ntiense Jehovah

Leta Otu Emi Ẹsede Ẹban̄a Utom Mme Ntiense Jehovah

Ndima Nditọete:

“Nnyịn imesikọm Abasi kpukpru ini ke ini isiakde kpukpru mbufo enyịn̄ ke akam nnyịn, koro nnyịn mîtreke nditi utom mbuọtidem mbufo ye utom ima mbufo ye ime mbufo oto ke ntak idotenyịn mbufo ke Ọbọn̄ nnyịn Jesus Christ ke iso Abasi ye Ete nnyịn.” (1 Thess. 1:2, 3) Se itien̄wed emi etịn̄de enen̄ede owụt nte idade mbufo! Imọkọm Jehovah etieti iban̄a mbufo ye nti utom emi mbufo ẹnamde. Nso inam idọhọ ntre?

Isua emi osụk ebede, mbufo ẹma ẹsịn idem ẹnam “utom mbuọtidem” ye “utom ima” ẹnọ Abasi. Ediwak mbufo ẹmenam utom Abasi ke nsio nsio usụn̄. Ndusụk mbufo ẹma ẹwọrọ ẹka ebiet emi ẹnen̄erede ẹyom mme ọkwọrọikọ ke idụt mbufo m̀mê ke idụt en̄wen. Mbon eken ẹkwọrọ ikọ ke ebiet emi mme owo ẹsiwakde. Ke ini Editi, ediwak mbufo ẹma ẹnam utom usiakusụn̄ unọ un̄wam, ndusụk ẹnam ke ọfiọn̄ emi esenyịn circuit edide esop mmọ, mbon eken ẹnam ke ini emi ikedemede tract jw.org ke August 2014. Kpa ye emi owo ye owo mîdịghe ukem, imokụt ke kpukpru mbufo ke ẹnam ofụri se ẹkekeme ẹnọ Jehovah, imonyụn̄ ikọm mbufo ke se ẹnamde. (Col. 3:23, 24) “Utom mbuọtidem” mbufo emi anam ikọm Jehovah!

Imama n̄ko “utom ima” emi mbufo ẹnamde ke nditiene mbọp nsio nsio n̄kpọ nnọ esop Abasi ke ofụri ererimbot. Ana ẹsọsọp ẹbọp mme n̄kpọ emi sia ikọt  Jehovah ke ẹwak ke usen ke usen. (Isa. 60:22) Isua oko, ibat mme asuanetop ekedi 8,201,545, ibat ukpepn̄kpọ Bible emi ikenịmde kpukpru ọfiọn̄ edi 9,499,933. Ke ntak emi, ẹfiak ẹdiọn̄ mbufa n̄kọk itieutom, ẹnyụn̄ ẹnanam ndusụk ẹkponi ẹkan nte ẹkedide. Se ẹnamde ke mme n̄kọk itieutom emi owụt ke oyom ẹbọp ediwak Ufọkmbono Obio Ubọn̄! Idahaemi n̄ko, ẹmọn̄ ẹbọp mme itie ukabade n̄wed ke ebiet emi ẹsemde usem emi ẹkabarede man mme akabade n̄wed ẹdụn̄ ke ebiet emi ẹsemde usem oro mmọ ẹkabarede.

Akpana kpukpru emi anam ibụp idem nnyịn m̀mê nso ke ikeme ndinam man itiene in̄wam ke nsio nsio n̄kpọ emi ẹyomde ndibọp mi. Ndusụk nnyịn imekeme ndika n̄ketiene mbọp mme n̄kpọ emi. Edi owo ekededi ekeme nditịp okụk nnọ ẹda ẹnam utom emi, ọkpọkọm enye ọdiọn̄ọ ndibọp n̄kpọ m̀mê idiọn̄ọke. (N̄ke 3:9, 10) Ke ini ẹkeyomde ndibọp tent utuakibuot, nditọ Israel ẹma ẹsio esịt ẹnọ n̄kpọ tutu edidi se ẹdọhọde yak owo okûnọ aba. (Ex. 36:5-7) Esinem nnyịn ndikop utọ n̄kpọ oro onyụn̄ ọdọn̄ nnyịn nditiene nnam ntre. “Utom ima” emi mbufo ẹnamde ke nsio nsio usụn̄ emi anam nnyịn ikọm Jehovah!

N̄kpọ en̄wen emi anamde esịt enem nnyịn edi nte nditọete nnyịn ẹsọn̄ọde ẹda ẹyọ kpukpru se iwọrọde mmọ. Ke uwụtn̄kpọ, toto ke 1950, ẹkọbi n̄kparawa emi ẹdide Mme Ntiense ke South Korea sia mmọ mîmaha ndidụk ekọn̄. Ndusụk ẹsisịne ke ufọk-n̄kpọkọbi ẹbịghi, ndusụk ibịghike. Se nditọete nnyịn ẹyọde edi oro toto ke ini oro, mmọ inyụn̄ iyakke idem emem mmọ. Nte mmọ ẹsọn̄ọde ẹda ẹyọ se iwọrọde mmọ ọsọn̄ọ nnyịn idem n̄ko!

 Nditọete nnyịn ita ẹsịne ke ufọk-n̄kpọkọbi ke Eritrea ẹbe isua 20. Ẹkọbi nditọete iban ye nditọ mmọ do n̄ko, edi n̄kpọkọbi mmọ ibịghike nte eke irenowo. Imanam nsio nsio n̄kpọ man ẹsana mmọ ẹyak, edi ibuot idụhe kan̄a. Kpa ye emi, nditọete nnyịn ẹsụk ẹkaka iso ẹnam se Ikọ Abasi ọdọhọde. Mmọ ẹsọn̄ọ ẹda kpa ye kpukpru ufen emi mmọ ẹbọde. Imesibọn̄ akam isịn mmọ kpukpru ini.—Rome 1:8, 9.

Idịghe kpukpru ikọt Abasi ke ẹkọbi ntem, edi imọfiọk ke mbufo emi owo mîkọbike ẹmenyene mfịna mbufo n̄ko. Idem emem ndusụk ke ntak usọn̄, ndusụk ẹdọdọn̄ọ. Mfịna mbon en̄wen edi ke ebe, n̄wan, m̀mê mbonufọk mmọ emi mîdịghe Mme Ntiense ke ẹkọbọ mmọ. Mbon en̄wen ẹnyene mfịna emi mmọ ye Abasi kpọt ẹdiọn̄ọde. Kpa ye emi, mbufo ke ẹka iso ẹnam n̄kpọ ẹnọ Jehovah. (Jas. 1:12) Imọkọm mbufo etieti. Nte mbufo ẹsọn̄ọde ẹda kpa ye kpukpru mfịna emi anam nnyịn ikọm Jehovah.

Kpukpru se mbufo ẹsịnde idem ẹnam ye nte mbufo ẹkade iso ẹsọn̄ọ ẹda anam nnyịn inen̄ede ‘ikọm Jehovah, koro enye ọfọnde.’ (Ps. 106:1) Imama kpukpru mbufo etieti, inyụn̄ iben̄e Jehovah ite ọsọn̄ọ mbufo idem, akama mbufo, onyụn̄ ọdiọn̄ mbufo man mbufo ẹka iso ẹnam n̄kpọ esie ke nsinsi.

Nditọete mbufo,

Otu Emi Ẹsede Ẹban̄a Utom Mme Ntiense Jehovah