Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SIERRA LEONE YE GUINEA

2002-2013 N̄kọri Emi Ẹnamde Ndondo Emi (Ikpehe 2)

2002-2013 N̄kọri Emi Ẹnamde Ndondo Emi (Ikpehe 2)

Ndin̄wam Mme Inan

Ẹdọhọ ke n̄kpọ nte inan 3,000 esịm 5,000 ẹdu ke Sierra Leone ye nte ke ediwak inan ẹdu n̄ko ke Guinea. Sia “uduak [Jehovah] edide ete kpukpru orụk owo ẹnyene edinyan̄a,” mme inan ẹdinam didie ‘ikop’ eti mbụk?—1 Tim. 2:4.

Michelle Washington, isụn̄utom Gilead emi ekedide Sierra Leone ke 1998, ọdọhọ ete: “Ẹkenọ mi ye Kevin ebe mi ika esop emi inan inan̄ ẹkesitienede ẹdụk mbono esop. Sia n̄kọfiọkde Usem Idiọn̄ọ Mbon America, ama ọdọn̄ mi ndin̄wam mmọ. N̄kọk itieutom ẹma ẹdọhọ nsikabade se ẹtịn̄de ke mbono esop ye ke mbono nnọ mme inan, ẹnyụn̄ ẹdọhọ mme esop ke mbọhọ oro ke ẹsikabade ikọ ẹnọ mme inan. N̄kọk itieutom ẹma ẹnam ndutịm man ẹkpep mme asuanetop oro ẹmade ndin̄wam mme inan usem idiọn̄ọ. Ima itọn̄ọ ndiyom mme inan ke  obio inyụn̄ ikpep mmọ Bible. Ediwak owo ke obio ẹma ẹtoro nnyịn ke ini ẹkekụtde ukeme oro isịnde. Edi idịghe kpukpru owo ẹkema se nnyịn ikanamde. Pastọ oro esikwọrọde ikọ ọnọ mme inan ama ọdọhọ ke nnyịn idi ‘mme prọfet nsu.’ Enye ama odụri mmọ ye ubon mmọ utọn̄ ete ẹkûdian idem ye nnyịn. Enye ama ọdọhọ ndusụk mmọ ke edieke mmọ ẹdiande idem ye nnyịn ke imọ idinọhọ mmọ okụk aba. Mme inan ẹma ẹbahade iba: Mbon oro akanam mîsoboke ye nnyịn ẹnyụn̄ ẹdade ye pastọ ye mbon oro ẹma ẹkesobo ye nnyịn edi mîdaha ye pastọ. Mbon oro mîkadaha ye pastọ do ẹma ẹbọ akpanikọ nte ini akakade ẹnyụn̄ ẹna baptism.”

Ke uwụtn̄kpọ, Femi edi inan toto ke emana ndien ekesinyụn̄ anam idiọn̄ọ ifan̄ ama oyom nditịn̄ ikọ. Enye ekekere ke idụhe owo emi edide eti owo—akpan akpan mbon oro mîdịghe inan—ndien ikesikopke inemesịt, ekesinyụn̄ ekere ke owo imaha imọ. Nte ini akakade, enye ama ọtọn̄ọ ndikpep Bible ye nditọete nnyịn ke otu usem idiọn̄ọ. Ikebịghike, enye ama ọtọn̄ọ ndidụk mbono esop kpukpru ini onyụn̄ ekpep usem idiọn̄ọ. Femi ama anam n̄kọri tutu ana baptism, ndien idahaemi enen̄ede okop inemesịt ndikpep mme inan akpanikọ Bible.

Femi (nnasia) ke ọkwọ ikwọ Obio Ubọn̄ ke usem idiọn̄ọ

Ke July 2010, otu Usem Idiọn̄ọ Mbon America Freetown ama akabade edi esop. Otu usem idiọn̄ọ ẹdu n̄ko ke Bo ye Conakry.

Ẹdi Ubuene Edi “Ẹforo ke Mbuọtidem”

Bible owụt ke ata ediwak mme Christian eyo mme apostle ẹkedi ubuene. James mbet Jesus ekewet ete: “Nte Abasi ikemekke mbon oro ẹdide ubuene ke n̄kpọ ererimbot emi ite ẹforo ke mbuọtidem?” (Jas. 2:5) Mbuọtidem oro nditọete ke Sierra Leone ye Guinea ẹnyenede ke Jehovah ọnọ mmọ ndọn̄esịt ye idotenyịn n̄ko.

 Mbuọtidem esinam ediwak ubon Mme Ntiense emi ẹdide ubuene ke mme obio-in̄wan̄ ẹfam okụk ẹnịm ke ediwak ọfiọn̄ man ẹkpekeme ndika mbono district. Ndusụk mmọ ẹsitọ n̄kpọ ke in̄wan̄ man ẹnyam ẹda ẹkpe usụn̄ ẹka mbono. Mme otu emi ẹdide n̄kpọ nte owo 20 esịm 30 ẹsifaha ke moto mbiomo ẹwat ke ọkpọsọn̄ ufiopeyo ke ntọn̄ ntọn̄ usụn̄ emi etiede n̄kpotụk n̄kpotụk ke hour 20 m̀mê akande oro. Mbon eken ẹsisan̄a anyan usụn̄ ke ukot man ẹkedụk mbono. Eyenete kiet ọdọhọ ete: “Nnyịn ima isibiom ediwak mboro isan̄a kilomita 80 ke ukot. Ima isinyam mboro oro ke usụn̄ man mbiomo nnyịn efere, inyụn̄ ibọ okụk oro ekemde ndida ndụk moto mbiomo n̄kesịm itie mbono.”

Ndisan̄a ke moto mbiomo n̄ka mbono district

Mbuọtidem n̄ko anam ediwak mme asuanetop ẹkûwọrọ uka mme idụt uforo. Emmanuel Patton emi ama  okokụre ukpep ke Ufọkn̄wed Ukpep Bible Eke Nditọete Iren Emi Mîdọhọ Ndọ ọdọhọ ete: “Nnyịn isibuọt idem ke Jehovah eyese aban̄a nnyịn. Sia idude ke idụt emi ẹnen̄erede ẹyom mme andikwọrọ Obio Ubọn̄, nnyịn imọfiọk ke se inamde enen̄ede enyene ufọn.” (Matt. 6:33) Idahaemi Emmanuel edi ebiowo, ndien enye ye Eunice an̄wan esie ke ẹsịn ifịk ẹnam n̄kpọ Obio Ubọn̄. Mme ibuot ubon en̄wen ẹtre ndiwọrọ n̄ka ebiet en̄wen man ẹkụt ẹte ke ubon mmimọ ẹdiana kiet ẹnyụn̄ ẹsọn̄ọ ẹda ẹnam n̄kpọ Abasi. Timothy Nyuma emi edide akpan asiakusụn̄ ye andida itie esenyịn circuit, ọdọhọ ete: “N̄kamaha ndinam utom emi edinamde nsiwọrọ n̄kpọn̄ ubon mi ke  anyan ini. Ami ye Florence an̄wan mi ikọnọ nditọ nnyịn ukpep ke edem nnyịn utu ke ndinọ mmọ ẹka ẹkedụn̄ ye owo.”

Nditọete en̄wen ẹwụt ke imenyene mbuọtidem ke ndisịn idem nnam n̄kpọ Abasi kpa ye nsio nsio mfịna. Kevin Washington, oro iketịn̄de iban̄a ọdọhọ ete: “Ediwak mme asuanetop ẹsikwọrọ ikọ kpukpru ini ẹnyụn̄ ẹbiom mbiomo esop kpa ye oro ẹsobode mfịna oro edide ekpedi nnyịn ikpọdiọk esịt isụhọde itie ke ufọk. Ke uwụtn̄kpọ, ndusụk nditọete nnyịn ẹnyene uyịre uyịre udọn̄ọ edi ufọkibọk ye usọbọ idụhe nte odude ke ebiet en̄wen. Mbon en̄wen ẹnen̄ede ẹsịn ukeme ẹkpep nte ẹkotde n̄wed ẹnyụn̄ ẹwetde n̄kpọ. Ini ekededi emi n̄kerede ke eyenete inamke se ẹkenọde enye ọfọn, mmesibụp idemmi nte: ‘Edieke n̄kpanamde utom idịbi udia, nnyene akamba udọn̄ọ, n̄kwe usụn̄ ọfọn, nnyeneke akrasi enyịn, nnyụn̄ nnyeneke mme n̄wed esop Abasi ye ikan̄ ilektrik, ndi n̄kpananam nte eyen mbon?’”

Ke mme n̄kpọ emi ye mme usụn̄ en̄wen, nditọete ke Sierra Leone ye Guinea ẹnọ Jehovah ubọn̄. Ukem nte mme Christian eyo mme apostle, mmọ ẹwụt ke idi mme asan̄autom Abasi “ke ediyọ ekese, ke ukụt, ke unana, . . . nte mme ubuene edi [ẹnam] ediwak owo ẹdi imọ, nte mmọ eke mînyeneke n̄kpọ ndomokiet edi [ẹnyene] kpukpru n̄kpọ.”—2 Cor. 6:4, 10.

Imenyene Mbuọtidem ke N̄kpọ Ọyọfọn

Ke se ikande isua 90 emi ẹbede, Alfred Joseph ye Leonard Blackman ẹma ẹtọt ẹte ke n̄kpọ “ẹdat se ẹkpen̄ede” ke Sierra Leone. (John 4:35) Ke isua 35 ke ukperedem Manuel Diogo ama etie ke Guinea ewet ete: “Ekese owo mi ẹma ndikpep Bible.” Mfịn, mme asan̄autom Jehovah ke Sierra Leone ye Guinea ẹfiọk ke ata ediwak owo en̄wen ẹyema ndikop eti mbụk.

 Ke 2012, owo 3,479 ẹkedụk Editi n̄kpa Christ ke Guinea, emi awak nte ibat mme asuanetop utịm ikanan̄ ye ubak. Mme asuanetop 2,030 ẹdu ke Sierra Leone edi owo 7,854 ẹkedụk Editi, emi ekperede ndiwak nte ibat mme asuanetop utịm ikanan̄. Owo kiet emi eketienede odụk Editi oro edi Winifred Remmie emi edide isua 93. Enye odu ke esop ebịghi onyụn̄ edi akpan asiakusụn̄. Enye ye Lichfield ebe esie ẹkedibehe ke Sierra Leone ke 1963. Idem ke ẹma ẹkenam utom uyọhọ ini ke isua 60, Winifred ke ananam utom nte akpan asiakusụn̄. Enye ọkọdọhọ ete: “Anie ekpekekere ke nditọete emi ẹsọn̄de  idem ntem ke esop ẹyedu ke Sierra Leone? Osụk ọdọdọn̄ mi nditiene ntịp nsịn ke n̄kọri emi okposụkedi emi nsọn̄de.” *

Etie Mme Ntiense Jehovah ke Sierra Leone ye Guinea ke idem nte eketiede Winifred. Ukem nte ikpọ eto emi ẹdude ke mben mmọn̄, mmọ ẹbiere ndika iso n̄n̄wụm mfri emi anamde ẹtoro Jehovah. (Ps. 1:3) Jehovah ayan̄wam mmọ ẹka iso ẹtan̄a ata idotenyịn ifụre ubonowo—kpa “ubọn̄ ubọn̄ ifụre nditọ Abasi.”—Rome 8:21.

Kọmiti N̄kọk Itieutom, to ke ufien ka nnasia: Collin Attick, Alfred Gunn, Tamba Josiah, ye Delroy Williamson

^ ikp. 16 Winifred Remmie ama akpa ke ini ẹkesụk ẹwetde mbụk emi.