Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SIERRA LEONE YE GUINEA

2002-2013 N̄kọri Emi Ẹnamde Ndondo Emi (Ikpehe 1)

2002-2013 N̄kọri Emi Ẹnamde Ndondo Emi (Ikpehe 1)

 “Jehovah, Sọsọn̄ọ-o!”

Ke n̄kpọ ama ọkọtọn̄ọ ndinen̄ede mbono, nditọete ẹma ẹfiak ẹnyọn̄ọ utak-usụhọ ufọk mmọ. Ẹma ẹfiak ẹtọn̄ọ mme esop oro mîkodụhe aba ke ini ekọn̄, akpan akpan ke edem usiahautịn oro ekọn̄ ekenen̄erede ọsọn̄ ubọk. Mme akpan asiakusụn̄ ke obio kiet ẹkedọhọ ẹte: “Owo 16 ẹkedụk akpa mbono esop oro ikenịmde, 36 ẹdụk ọyọhọ iba, 56 ẹdụk ọyọhọ ita, ndien ekem 77 ẹdụk Editi! Esịt ama enem nnyịn etieti!” Ẹma ẹsiak mbufa esop 9, anamde ibat ofụri esop oro ẹkenyenede esịm 24. Mbufa isụn̄utom Gilead duop ẹma ẹdibehe, emi ama anam ẹnen̄ede ẹsịn ifịk ke utom ukwọrọikọ. Ke 2004, owo 7,594 ẹkedụk Editi, ndien emi ama awak utịm ikotion akan ibat mme asuanetop! N̄kọri okokpon ntem n̄ko ke Guinea.

Otu Ukara ẹma ẹsọsọp ẹnọ okụk ẹda ẹn̄wam mbon itọkekọn̄ oro ẹkenyọn̄de ẹdi. (Jas. 2:15, 16) Otu mme anamutom unọ un̄wam emi ẹsisan̄ade-san̄a ẹma ẹbọp mîdịghe ẹdiọn̄ Ufọkmbono Obio Ubọn̄ 12 ye Ufọk Mbono kiet ke Koindu. Ẹma ẹnyụn̄ ẹda kọrikọri ẹbọp ukeuke ufọk 42 ẹnọ mme ubon emi ẹkewụride ufọk mmọ. Akanian̄wan ebeakpa emi ebede isua 70 ama ada ke iso obufa ufọk atian esie oro ẹkebọpde ẹnọ enye ofiori ye mmọn̄eyet idatesịt ete: “Jehovah, sọsọn̄ọ-o! Jehovah, sọsọn̄ọ-o! Nditọete ẹsọsọn̄ọ-o!”

N̄kọk itieutom ama ọtọn̄ọ n̄ko ndida okụk oro ẹsinọde mme idụt oro mînen̄ekede inyene n̄kpọ mbọp Ufọkmbono Obio Ubọn̄. Saidu Juanah emi edide ebiowo ye asiakusụn̄ ke Esop Bo West, ọdọhọ ete, “Eyenete an̄wan kiet ọkọdọhọ mi ete: ‘Edieke ẹtọtde ke ẹyebọp  obufa Ufọkmbono Obio Ubọn̄ ẹnọ nnyịn, ndikwak ubọk ye ukot!’ Ke ini n̄kọtọtde ke ẹmọn̄ ẹbọp obufa ufọkmbono, enye ama ọfrọ ke n̄kpọitie esie ọtọn̄ọ unek onyụn̄ akwak ubọk—ntre ke enye akakwak ubọk onyụn̄ ‘akwak ukot’!”

Ke 2010, Esop Waterloo ẹma ẹyak obufa Ufọkmbono Obio Ubọn̄ ẹnọ Abasi. Ufọkmbono Obio Ubọn̄ emi ekeme ndidụk owo 800 ke ini ẹdade enye ẹnịm mbono n̄ko. Usen emi ẹkedepde isọn̄ oro, owo en̄wen ama enyịme Mma enyene-isọn̄ oro okụk emi awakde akan se esop ẹkenyịmede. Edi enye ọkọdọhọ ete: “Nyom ẹbọp itie ido ukpono ke isọn̄ mi, nyomke ẹda ẹnam mbubehe.”

Ẹda okụk oro ẹnịmde ẹnọ mme idụt oro mînen̄ekede inyene n̄kpọ ẹbọp Ufọkmbono Obio Ubọn̄ 17 ke Sierra Leone ye 6 ke Guinea. Mme ukeuke ndiye itie utuakibuot emi ẹnam ediwak owo ẹma ndidụk mbono esop.

Ndiyom Mme Erọn̄ Jehovah Oro Ẹsopde

Nte mme owo ẹkenen̄erede ẹsịn ifịk ke utom ukwọrọikọ, n̄kọk itieutom ama anam ndutịm man ẹda ọfiọn̄ iba ẹkwọrọ ikọ ke efakutom oro owo mîsiwakke ndikwọrọ ikọ. Mme asuanetop ẹma ẹnịm se ikperede ndisịm n̄wed 15,000 ẹnyụn̄ ẹnyene ediwak ndinem ifiọkutom. Ndusụk owo ẹma ẹbụp m̀mê Mme Ntiense Jehovah ẹyesiak esop ke obio ekededi ke mbọhọ oro. Emi ama anam ẹsiak mbufa esop iba. Ke obio-in̄wan̄ kiet emi odude nsannsan, nditọete ẹma ẹkụt nditọete iban iba emi mîkekwe nditọete aba ke ntak emi ẹkefehede ẹkpọn̄ edem mmọ ke ini ekọn̄ oro. Nditọete oro ẹma ẹsọsọp ẹtọn̄ọ ndisinịm mme mbono esop ẹnyụn̄ ẹtọn̄ọ ediwak ukpepn̄kpọ Bible ke obio-in̄wan̄ oro.

Ke 2009, n̄kọk itieutom ama okop ke enyene obio-in̄wan̄ kiet ke esịt akai Guinea oro mme owo ẹkedọhọde  ke idi Mme Ntiense Jehovah. N̄kọk itieutom ama ọdọn̄ nditọete ẹkese, ndien nditọete oro ẹma ẹsian n̄kọk itieutom ke enyene akanieren eyenete kiet emi akafiakde ọnyọn̄ edem mmọ ke ama ọkọkpọn̄ utom. Enye ama ekpep ediwak irenowo n̄kpọ mbemiso enye akakpade. Kiet ke otu irenowo oro ama enyene mbuọtidem ke Jehovah onyụn̄ ọtọn̄ọ ndikpep mbon en̄wen se enye ekekpepde ke Bible. Enye ama esida mme n̄wed eyenete oro akakpade do enịm mbono esop. Otu emi ẹma ẹtuak ibuot ẹnọ Jehovah ke isua 20 mbemiso asuanetop okokụtde mmọ ke unana idotenyịn. N̄kọk itieutom ama ọsọsọp ọdọn̄ nditọete ẹken̄wam otu emi. Ke 2012, owo 172 ke obio-in̄wan̄ oro ẹkedụk Editi n̄kpa Christ.

Ke ndondo emi, ẹkụt ediwak ‘erọn̄ oro ẹkesopde.’ Mmọ ẹdi mbon oro ẹkefiọrọde ẹkpọn̄ esop m̀mê oro ẹkesiode-sio ẹfep. Ediwak owo oro ẹbietde idiọk udọ do, ẹmekabade esịt ẹfiak ẹnyọn̄ ẹdi esop. Ikọt Jehovah ẹnen̄ede ẹdara mmọ.—Luke 15:11-24.

Mme Muslim Emi Ẹnyenede Eti Esịt Ẹbọ Akpanikọ

Apostle Paul ama akabade edi ‘kpukpru n̄kpọ ọnọ kpukpru orụk owo’ ke ini ọkọkwọrọde eti mbụk. (1 Cor. 9:22, 23) Kpasụk ntre, mme asan̄autom Jehovah ke Sierra Leone ye Guinea ẹsinam ukpụhọde man ẹkeme ndikwọrọ ikọ nnọ nsio nsio orụk owo. Ke uwụtn̄kpọ, kere ban̄a nte ndusụk mme asuanetop ẹsikọkde ibuot ye mme Muslim oro ẹmade ndinyene nneme. Mme Muslim ẹwak ẹkan ke Sierra Leone ye Guinea.

Saidu Juanah, emi ekedide Muslim ọdọhọ ete: “Mme Muslim ẹnịm ke ẹkeda ntan ẹbot Adam, edi ke enye ekebem iso odụn̄ ke paradise ke heaven. Man n̄n̄wam mmọ ẹnyene nnennen ifiọk, mmesibụp mmọ nte, ‘Ntan odu ke m̀mọ̀n̄?’

“Mmọ ẹsibọrọ ẹte: ‘Ke isọn̄.’

 “Mmesifiak mbụp nte: ‘Oro ọwọrọ ke ẹkebot Adam ke m̀mọ̀n̄?’

“Mmọ ẹsibọrọ ẹte: ‘Ke isọn̄.’

“Man nnam akpan n̄kpọ ọwọrọ ada, mmesikot Genesis 1:27, 28 nnyụn̄ mbụp nte, ‘Ndi mme angel ẹsinyene eyen?’

“Mmọ ẹsibọrọ ẹte: ‘Mme angel idịghe owo nan̄a.’

“Mmesifiak mbụp nte: ‘Ke ini Abasi ọkọdọhọde Adam ye Eve ẹnyene nditọ, ekere ke anaedi mmọ ẹkedu ke m̀mọ̀n̄?’

“Mmọ ẹsibọrọ ẹte: ‘Ke isọn̄.’

“Mmesibụp nte: ‘Ntre ke ini Abasi edifiakde inam Paradise, ekere ke Paradise oro edidu ke m̀mọ̀n̄?’

“Mmọ ẹsibọrọ ẹte: ‘Mi ke isọn̄.’”

Saidu ada ikọ esie ekeberi ete: “Ndida N̄wed Abasi n̄kọk ibuot ntem esinam ediwak Muslim emi ẹnyenede eti esịt ẹnyịme ndika iso nnyene nneme nnyụn̄ mbọ mme n̄wed ukpep Bible.”

Uwụtn̄kpọ kiet edi Momoh, Muslim emi ekedide anyam ufọkurua, oro akaduakde ndikabade ndi akwaowo Muslim. Ke ini mme isụn̄utom Mme Ntiense ẹkedade N̄wed Abasi ẹkọk ibuot ye Momoh, enye ama enen̄ede enyene udọn̄. Enye ama odụk mbono circuit onyụn̄ ama se ẹkenemede do. Usen inan̄ ke oro ebede, enye ye Ramatu an̄wan esie, ye nditọ mmọ mbition ẹma ẹdụk Editi n̄kpa Jesus. Momoh ama ọtọn̄ọ ndisịn idem n̄kpep Bible. Ke ama ekekpep n̄kpọ ikafan̄, enye ama etre ndinyam sika. Enye ama esidọhọ mbonurua esie ke sika ifọnke ye owo, n̄ko ke Abasi imaha sika. Enye n̄ko ama ọtọn̄ọ ndikpep n̄kpọ ye n̄wan ye nditọ esie ke ufọkurua esie. Edieke mbonurua ẹdide ke ini ukpepn̄kpọ ubon, enye esidọhọ mmọ ẹtie ẹbet imọ, ke ukpepn̄kpọ oro edi akpan n̄kpọ ọnọ ubon imọ. Ke enye ye n̄wan esie ẹma  ẹkesịn ndọ mmọ ke n̄wed, iman mmọ ẹma ẹbiọn̄ọ mmọ idiọk idiọk. Momoh ye Ramatu ikayakke idem emem mmọ, edi ẹma ẹkwọrọ ikọ uko uko ẹnọ iman mmọ, ndien nte ini akakade iman mmọ ẹma ẹdima nti edu mmọ. Momoh akana baptism ke 2008, ke ini Ramatu akanade ke 2011.

Ndida Iyịp ke Edisana

Ikọt Jehovah ẹda mme edumbet esie, esịnede nte enye esede iyịp, ẹdu uwem. (Utom 15:29) Ediwak mme ọfiọk ibọkusọbọ ke Sierra Leone ye Guinea ẹkpono mme edumbet emi.

Nditọete ke ẹdọn̄ eyenete an̄wan esịt ke ufọkibọk

Ke 1978, nditọete ẹma ẹdeme ekpri n̄wed oro Jehovah’s Witnesses and the Question of Blood ẹnọ mme dọkta, mme nurse, mme akamautom ufọkibọk, mme ẹkpeibet,  ye mme ebiereikpe ke ofụri Sierra Leone. Esisịt ini ke oro ebede, iyịp ama ọtọn̄ọ ndiwọrọ eyenete an̄wan kiet oro okoyomde ndiman eyen ke esịt idem, edi mme dọkta ikamaha ndinọ enye usọbọ ibọhọke enye enyịme ẹsịn imọ iyịp ke idem. Edi dọkta kiet ama enyịme ndin̄wam ke ntak nti n̄kpọ oro enye okokotde ke ekpri n̄wed oro. Eyenete an̄wan oro ama aman ediye eyeneren, idem ama onyụn̄ ọsọn̄ enye.

Ke n̄kpọ nte 1991, Dr. Bashiru Koroma, emi esisiakde owo idem ke Ufọkibọk Kenema, ama okot ediye uduot ekpri n̄wed How Can Blood Save Your Life? Enye ama ama se enye okokotde ke n̄wed oro tutu ọtọn̄ọ ndikpep Bible nnyụn̄ ndụk mbono esop. Ke ini ekpri eyen isua usụkkiet ekenyenede unọmọ onyụn̄ obomde edidiana-akpa, mme dọkta ẹma ẹsịn ndisiak eyen oro idem sia owo mîkenyịmeke ẹsịn enye iyịp ke idem. Mmọ ẹma ẹdọhọ ete ye eka eyen oro ẹte: “Ẹmen eyen mbufo ẹnyọn̄ akakpa ke ufọk!” Ete ye eka eyen oro ẹma ẹka ẹbịne Dọkta Koroma, ndien enye ama asiak eyen mmọ idem uforo uforo.

Ikebịghike, Dọkta Koroma ama akabade edi Brọda Koroma—onyụn̄ enen̄ede ama usọbọ oro owo mîsịnke owo iyịp ke idem. Mme dọkta eken ẹma ẹsua enye ke ntak emi, edi idem ama esisọp ọsọn̄ mbon oro enye akasiakde idem. Nte ini akade, ndusụk nsan̄autom esie ẹma ẹsidọhọ enye an̄wam mmimọ ke ini usiakidem ọsọn̄de mmọ.

Toto ke 1994, Itieutom Emi Esede Aban̄a Ntọt Ufọkibọk ke n̄kọk itieutom Freetown emek Mme Kọmiti Unyene Nneme ye Mbon Ufọkibọk ke Sierra Leone ye Guinea. Mme kọmiti emi ẹnen̄ede ẹn̄wam ediwak Mme Ntiense oro ẹdọn̄ọde ẹnyụn̄ ẹkpek ediwak mme ọnọ usọbọ ẹte ẹkûsịn nditọete nnyịn iyịp ke idem ke ini ẹnọde mmọ usọbọ.