Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SIERRA LEONE YE GUINEA

Ima Ibọhọ Mbon Oro Ẹn̄wanade ye Ukara

Andrew Baun

Ima Ibọhọ Mbon Oro Ẹn̄wanade ye Ukara
  • AKAMANA KE 1961

  • AKANA BAPTISM KE 1988

  • SE IBAN̄ADE ENYE Ekedi asiakusụn̄ ofụri ini ke Pendembu ke Edem Usiahautịn Sierra Leone, ke ini ekọn̄ ọkọtọn̄ọde ke 1991.

MBON en̄wan ẹma ẹdi obio nnyịn uwemeyo usen kiet, ẹnyụn̄ ẹtop ikan̄ ke enyọn̄ ke n̄kpọ nte hour iba. Ndusụk mmọ ẹkedi n̄kpri nditọwọn̄ emi ẹkekpepde-kpep ndikama ikan̄. Mmọ ẹma ẹdehe idem etieti, ẹnyene nnyan idet emi owo mîsarike, ndien onyụn̄ etie nte n̄kpọsọn̄ ibọk ama ọdọk mmọ ibuot.

Mmọ ẹma ẹtọn̄ọ ndiwot owo ke ndan̄nsiere. Ẹma ẹbiomo mme owo ndo mîdịghe ẹwowot anafai. Ẹma ẹdan̄ iban ke n̄kanubọk. Ndutịme ama okpon etieti. Brọda Amara Babawo ye ubon esie ye owo inan̄ emi ẹkesikpepde Bible ẹma ẹfehe ẹdidịbe ke ufọk mi. Idem ama enyek nnyịn tutu.

Ikebịghike etubom mbon en̄wan oro ama edi edidọhọ nnyịn idi idibọ ukpep ekọn̄ usenubọk ndan̄nsiere. Nnyịn ima ibiere ke nnyịn idikaha okposụkedi emi ubiere oro ọkọwọrọde ke ẹkeme ndiwot nnyịn. Ima ida ofụri okoneyo oro ibọn̄ akam. Ima ibabak idemede ikot itie N̄wed Abasi usen oro inyụn̄ itie ibet mbon en̄wan oro. Edi mmọ ikedịghe aba.

“Mbufo ẹkot itien̄wed eke usen ke usen. Anaedi ẹdi Mme Ntiense Jehovah”

 Nte ini akakade, etubom mbon en̄wan oro ye ikọt esie inan̄ ẹma ẹkan mi ubọk ẹbọ ufọk mi. Mmọ ẹma ẹdọhọ nnyịn isụk idu do, ntre ima ika iso inịm mbono esop, isinyụn̄ ineme itie N̄wed Abasi eke usen ke usen. Ndusụk mmọ ẹma ẹdọhọ ẹte: “Mbufo ẹkot itien̄wed eke usen ke usen. Anaedi ẹdi Mme Ntiense Jehovah.” Mmọ ikamaha nneme Bible edi ẹma ẹkpono nnyịn.

Usen kiet, akamba etubom ama edi ndise otu mbon en̄wan oro ẹkedụn̄de ke ufọk mi. Enye ama ọkọm Brọda Babawo ekọm mbonekọn̄ onyụn̄ ọkọm enye ubọk. Ke ini enye eketịn̄de ikọ onọ mbon en̄wan oro, enye ama etịn̄ ke ọkpọsọn̄ uyo ete: “Owo emi edi eteufọk mi ye eteufọk mbufo. Idet ndomokiet ededei ebehe enye m̀mê ikọt esie ke ibuot, mbufo ẹyekọrọde ẹsịme. Ndi an̄wan̄a mbufo?” Mmọ ẹma ẹbọrọ ẹte, “Ih, an̄wan̄a!” Ekem akamba etubom oro ama ọnọ nnyịn leta emi odụride mbon en̄wan Revolutionary United Front oro utọn̄ ete ẹkûnam nnyịn n̄kpọ sia nnyịn idide mbon emem.

Ke ọfiọn̄ ifan̄ ẹma ẹkebe, nsio nsio n̄ka mbon en̄wan oro ẹma ẹtọn̄ọ ndin̄wana ye kiet eken, ntre ima ifehe ika Liberia. Do, otu mbon en̄wan en̄wen ẹma ẹdọhọ ke imọn̄ iwot nnyịn. Nnyịn ima idọhọ mmọ ite: “Nnyịn idi Mme Ntiense Jehovah.” Owo mmọ kiet ama obụp nnyịn ete: “John 3:16 ọdọhọ didie?” Ke ima iketịn̄ se ufan̄ikọ oro ọdọhọde, enye ama ayak nnyịn ibe.

Ekem ima isobo ye etubom mbon en̄wan en̄wen emi ọkọdọhọde mi ye Brọda Babawo itiene imọ. Ikekere ke enye oyom ndikowowot nnyịn. Edi enye ama asian nnyịn ke Mme Ntiense ẹma ẹsikpep imọ Bible mbemiso ini ekọn̄ oro. Enye ama ọnọ nnyịn okụk onyụn̄ ọbọ nnyịn leta ọkọnọ nditọete ke esop oro okodude ekpere. Ikebịghike, nditọete iba ẹma ẹda n̄kpọ un̄wam ẹsọk nnyịn ẹnyụn̄ ẹmen nnyịn ẹkesịm ebiet emi mfịna mîkodụhe.