Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SIERRA LEONE YE GUINEA

‘Ẹnam Ediwak Owo Ẹkabade Ẹdi Ndinen Owo’—Dan.12:3. (Ikpehe 1)

‘Ẹnam Ediwak Owo Ẹkabade Ẹdi Ndinen Owo’—Dan.12:3. (Ikpehe 1)

 Mme Isụn̄utom Gilead Ẹdibehe

Ke June 1947, Charles Fitzpatrick, George Richardson, ye Hubert Gresham, oro ẹma ẹkekụre ukpep ke Ufọkn̄wed Enyọn̄-Ukpeme Ukpep Bible Eke Gilead ẹma ẹdibehe ke Freetown. Nditọete emi ẹkedi akpa ke otu ediwak isụn̄utom emi ẹkedide ẹdisim.

Mme isụn̄utom emi ẹma ẹkụt ke nditọete ke Freetown ẹma ẹnen̄ede ẹma ndikwọrọ ikọ, edi ama oyom ẹn̄wam mmọ ẹdi nti mme andikpep. (Matt. 28:20) Ntre mme isụn̄utom ẹma ẹtọn̄ọ ndikpep mme asuanetop nte ẹkpenamde mfiakn̄ka ye nte ẹkpenịmde ukpepn̄kpọ Bible. Mmọ n̄ko ẹma ẹkpep esop mbufa usụn̄ oro ẹkpenịmde mbono esop ẹnyụn̄ ẹkpep mmọ mme ndutịm esop. Ẹma ẹnịm an̄wan̄wa mbono esop ke Wilberforce Memorial Hall. Ama enem mme isụn̄utom oro ndikụt owo 450 ẹdụkde mbono esop oro! Nte ini akakade, mme isụn̄utom oro ẹma ẹdọhọ ẹsinyene Usen Magazine kpukpru urua. Ukpep emi ama anam esop ọsọn̄ idem onyụn̄ anam ẹnyene n̄kọri ke ini iso.

Edi ọkpọsọn̄ edịm ye ọkpọsọn̄ eyo ikemeheke mme isụn̄utom oro. N̄kọk itieutom ama ọtọt ke 1948 ete: “Nte eyo esidade ye nte edịm esidepde ke Sierra Leone ẹnam uwem ọsọn̄ ye mme owo. Ukwọ edịm esidi ọfiọn̄ itiokiet ke isua, edep uyịre uyire, okpon, inyụn̄ ibiereke ke ediwak usen. Ndusụk ini esidep ofụri urua iba ibiereke. Ke ndaeyo, ufiop esikpon etieti.” Akpa mbon oro ẹketode Europe ẹdi Sierra Leone ẹkekot idụt emi udi mfia owo, sia ẹkekerede ke mfia owo ikemeke ndidụn̄ do mbịghi. Utọenyịn, utoenyịn ekpo, ye mme udọn̄ọ eken emi ẹsidude ke mme idụt oro eyo esifiopde ẹyọyọhọ do. Kpukpru  isụn̄utom emi ẹma ẹdọn̄ọ ẹnyụn̄ ẹnyọn̄ọ kiet kiet tutu ẹnyọn̄ọ ẹma.

Ufọn idụhe nditetịn̄, n̄kpọ emi ama anam nditọete emi ẹtode Sierra Leone ẹfụhọ. Edi mmọ ikayakke idem emem mmọ. Ke 1947, mme asuanetop 38 ẹkedu, edi ke 1952, ibat oro ama ọdọk esịm 73. Mme ifịk ifịk asiakusụn̄ ẹma ẹkwọrọ ikọ tutu ẹsiak obufa esop ke Waterloo emi ekperede Freetown. Eketie nte utom ọmọn̄ enen̄ede atara ke Sierra Leone. Edi emi edisan̄a didie itịbe?

Esenowo Emi Ọsọn̄ọde Nditọete Idem

Ke November 1952, esan̄ esan̄ eyen America emi mîyọhọke isua 35 ama edibehe ke Freetown onyụn̄ abuaha ke obio emi etiede uyom uyom. Esenowo oro ekedi Milton G. Henschel emi okotode ibuot itieutom edi. Enye ọkọdọhọ ete: “Idem ama enen̄ede akpa mi ndikụt akwa obio eyomfịn emi asanade akan ata ediwak ikpọ obio ke mme ebiet en̄wen. . . . Mme efak emi ẹsịnde itai, ufọkurua emi mme owo ẹyọhọde, mbufa moto, ata ediwak owo emi edide ẹdọdọk ẹsosụhọde.”

Brọda Henschel akasasan̄a tọn̄ọ ke Eto Mfriukịm aka ufọkidụn̄ isụn̄utom Freetown. Enye ama asian nditọete emi ẹkesopde idem do ke idibịghike ẹyenọ mmọ un̄wam. Ke Sunday oro eketienede, owo 253 ẹma ẹyọhọ Wilberforce Memorial Hall man ẹkop nte enye ọnọde ntọt emi ẹduaide owo idem mi: Sierra Leone eyenyene n̄kọk itieutom, esenyịn circuit, mbono circuit; ẹyesiak obufa esop ke Kissy; ẹyenyụn̄ ẹnen̄ede ẹtat utom ukwọrọikọ ẹsịm mme obio eken. Otuowo ẹma ẹnen̄ede ẹdara!

Brọda Henschel ọdọhọ ete: “Mmọ ẹma ẹwak ndidọhọ kusheh, ata edinem ikọ emi ọwọrọde ‘amanam tutu!’ Esịt ama enen̄ede adat mmọ. Mmọ ẹkesan̄a ke udịm ke udịm ẹnyọn̄ọ ke ufọkmbono oro ke eyo ama okofụk owo idem, . . . ndusụk mmọ ke ẹkwọ ikwọ.”

 Ẹma ẹmek William Nushy, obufa isụn̄utom emi ekedide edibehe ẹte ese enyịn ke obufa n̄kọk itieutom. William ama anam utom ke itie mbre mfọniso ke ata ediwak ebiet ke United States. Ke enye ama akakabarede edi Christian, enye ama ọkpọn̄ utom oro onyụn̄ enen̄ede ama ndinen edumbet—kpa edu emi akanamde nditọete ke Sierra Leone ẹma ẹnyụn̄ ẹkpono enye.