Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SIERRA LEONE YE GUINEA

Ẹkesikot Enye “Bible” Brown

William R. Brown

Ẹkesikot Enye “Bible” Brown
  • AKAMANA KE 1879

  • AKANA BAPTISM KE 1908

  • SE IBAN̄ADE ENYE Enye akada iso ke ntọn̄ọ ntọn̄ọ utom ukwọrọikọ ke Edem Usoputịn Africa.

KE INI William eketienede anam Afua Panama ke 1907, enye ama okop utịn̄ikọ emi Isaiah Richards ọkọnọde ke efak. Richards ekedi Eyen Ukpepn̄kpọ Bible, nte ẹkesikotde Mme Ntiense Jehovah ini oro. Utịn̄ikọ esie akaban̄a “Chart of the Ages,” oro edi, ndise emi ẹkesidade ẹkpep mme owo uduak Abasi. William ama ọsọsọp ọbọ akpanikọ onyụn̄ afiak ọnyọn̄ Jamaica man ekeneme se enye ekekpepde ọnọ eka ye eyeneka esie. Nte ini akakade, mmọ n̄ko ẹma ẹkabade ẹdi Nditọ Ukpepn̄kpọ Bible.

Brọda Brown ama anam utom ebịghi esịt ke Panama City ke Panama. Do ke enye okosobo ye Evander J. Coward, eyenete emi akadade ke ibuot Nditọ Ukpepn̄kpọ Bible, emi ekedide ndinọ utịn̄ikọ ke Panama. Coward ekedi owo emi ọfiọkde ndidọnọde ikọ, emi ekesinyụn̄ etịn̄de mme ebetọ ikọ, ndien ata ediwak owo ẹma ẹsima ndikop utịn̄ikọ esie. Ke ini enye  okokụtde ke William enen̄ede ama akpanikọ, enye ama ọdọhọ enye etiene imọ aka isan̄ ukwọrọikọ ke Trinidad.

Ke se ikande isua duop oro ẹketienede, William ama asan̄a ke ofụri West Indies anam utom usiakusụn̄ onyụn̄ esịn udọn̄ ọnọ n̄kpri otu nditọete. Ke 1920, enye ama ọdọ Antonia emi ekedide anam-akpanikọ eyenete. Usen iba ke William ye Antonia ẹma ẹkenam ndọ, mmọ ẹma ẹsan̄a ye “Photo-Drama of Creation”—ediye senima Bible emi edide ikpehe inan̄—ẹsio ẹka ekpri isuo Montserrat ke Leeward Islands. Mmọ ẹma ẹkwọrọ ikọ n̄ko ke Barbados, Dominica, ye Grenada. Mmọ ẹkedara obufa ndọ mmọ ke ndinam n̄kpọ Jehovah.

Isua iba ke mmọ ẹma ẹkenam ndọ, William ama ewet leta ọnọ ẹsọk Rutherford, emi ekesede enyịn ke utom Mme Ntiense Jehovah ini oro, ete: “Jehovah an̄wam mi n̄kwọrọ ikọ ke ata ediwak ke otu isuo Caribbean nnyụn̄ nnam mme mbet ke ediwak. Ndi mfiak ntọn̄ọ ke ntọn̄ọ n̄kwọrọ?” Ke ufan̄ usen ifan̄, Brọda Rutherford ama ọbọrọ ete: “Da n̄wan fo ye eyen fo ka Sierra Leone ke Edem Usoputịn Africa.”

Ke isua 27 oro Brọda Brown akanamde utom ye ubon esie ke Edem Usoputịn Africa, akananam idọn̄ke enye ndisụhọde ntetie ke ọfis. Enye akakam ama ndisisan̄a n̄kwọrọ ikọ. Sia enye ekesimade ndida Bible nsọn̄ọ ikọ esie, mme owo ẹma ẹtọn̄ọ ndisikot enye “Bible” Brown.

Ke 1950, ke ini William Brown ekedide isua 71, enye ye n̄wan esie ẹma ẹfiak ẹnyọn̄ Jamaica ẹkenam utom usiakusụn̄. William ama anam utom usiakusụn̄ tutu okụre utom esie ke isọn̄ ke 1967. Enye ama ama utom usiakusụn̄ tutu! Enye akada utom emi nte kiet ke otu akakan ifetutom emi owo ekemede ndinyene.