Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SE ẸKENAMDE ISUA OKO

Esop Oro Akade-Ka Iso Asan̄a

Esop Oro Akade-Ka Iso Asan̄a

Ke Friday, July 5, 2013, ubon Bethel ke United States ẹma ẹkop idatesịt ke ini Anthony Morris emi edide owo Otu Ukara ọkọtọtde ete: “Ke Thursday, July 4, 2013, ẹma ẹbiere ndinyam ufọk itiokiet, emi esịnede ufọk emi ẹdude ke 117 Adams Street ye 90 Sands Street ke Brooklyn. Ndinyam akpa ufọk esịm ọyọhọ ufọk ition ọwọrọ ke nnyịn inyene ndiwọrọ do etisịm ufọt August isua emi.”

Brọda Morris ama ọdọhọ ke Itieutom Uyetọfọn̄ emi odude ke ọyọhọ enyọn̄ itiokiet ye itiaba ke ọyọhọ ufọk ita, ayaka iso odu do tutu esịm ufọt ufọt 2014. Enye ama ọdọhọ ete: “Etie nte idikpọn̄ ufọk oro odude ke 90 Sands Street ke 2017.”

 Ndinyam ikpọ ufọk itiokiet oro edi ubak ndutịm oro ẹnamde ndisio ibuot itieutom Mme Ntiense Jehovah ke New York City n̄ka isọn̄ emi edide hekta 102 ke Warwick ke New York. Edi owo ikekemeke nditọn̄ọ ndutịm nnyụn̄ ndiọn̄ isọn̄ ibọhọke ukara ọnọ unyịme.

Ntem, ubon Bethel United States ẹma ẹnen̄ede ẹkpan̄ utọn̄ ke ini Mark Sanderson emi edide owo Otu Ukara ọkọtọtde ke Thursday, July 18, ete: “Imadat esịt nditọt nte ke mbubreyo Wednesday, July 17, kpukpru owo ke Itieutom Emi Esinọde Unyịme Ẹbọp N̄kpọ ke Warwick ẹma ẹnọ unyịme ke mbuwed emi ẹdidade ibọp obufa ibuot itieutom ofụri ererimbot Mme Ntiense Jehovah. Emi edi akpatre unyịme oro akanade ibọ man idot ndibọ unyịme utọn̄ọ utom. Enem etieti sia mbubreyo n̄kpọn̄ oro ẹkenọde unyịme akanam nnennen isua inan̄ tọn̄ọ ikedep isọn̄ Warwick. Akan oro, se itịbede usen ifan̄ emi ẹbede, emi ẹnamde ẹnọ unyịme emi ẹnen̄ede ẹwụt ke Jehovah ebere ye nnyịn.” Brọda Sanderson ama ọkọm kpukpru owo ke utom oro mmọ ẹsịnde ifịk ẹnam ye akam ofụri esịt mmọ kaban̄a akpan utom emi. Enye ama ọdọhọ ete, “Ke akande kpukpru, nnyịn imotoro inyụn̄ ikọm Jehovah iban̄a akpan unen emi ikụtde mi kaban̄a edisio ibuot itieutom n̄ka Warwick ke New York.”

Ke Friday, July 26, Brọda Morris ama osobo ye n̄kpọ nte mbonubon Bethel ye mbon Kọmiti Ubọpufọk Eke Ikpehe ke Ikpehe 1,000, emi ẹkesopde idem ke obufa ubet udia emi odude ke Tuxedo ke New York, emi ẹdibonde mme n̄kpọ oro ẹdidade inam utom ke Warwick. Ke  enye ama ekeneme ata edinem ikọ Abasi, enye ama ọdọhọ ke imenyene ntọt ndinọ. Enye ọkọdọhọ ete: “Enyene etop emi nsụk mbọde idahaoro, emi nyomde ndisian mbufo. Enye edi se ẹwetde ke enyọn̄ babru emi n̄kamade mi, ẹte: ‘Unyịme Ndibọp.’” Enye ete ifafiak ikot n̄kpọ en̄wen, mme anamutom unyịmesịt oro ẹma ẹnen̄ede ẹkwak ubọk. Brọda Morris ama aka iso okot ndusụk ikpehe ke akpa akpan unyịme edibọp n̄kpọ emi ukara obio Warwick ọkọnọde ke hour ita oro ẹsụk ẹbede, ndien emi ama adat kpukpru mbon oro ẹkedude do esịt etieti.

Nso Itịbe ke Wallkill, Warwick, ye Tuxedo?

Tọn̄ọ ẹketọn̄ọ nditat utom ke Wallkill ke August 2009, n̄kpọ nte nditọete iren ye iban 2,800 ẹnam utom do ke ibio ini. Mme n̄kpọ oro ẹkebọpde ẹdi obufa ufọkidụn̄, itie ubon n̄kpọisan̄, ye ọfis. Ke ẹfiak ẹdiọn̄ kiet ke otu n̄kani ufọkidụn̄, ndien ke ẹnam mme ukpụhọde ke ufọk umịn̄n̄wed, itie usopidem, itie uyetọfọn̄, ufọk utịmutom, ye itie udara isenowo. Ẹyeka iso ẹnam utom emi ke Wallkill tutu esịm utịt 2015.

Utom ọtọtọn̄ọ ke ebiet emi ẹdibọpde obufa ibuot itieutom ke Warwick. Ọfiọn̄ ifan̄ tọn̄ọ ẹketọn̄ọ utom oro, ẹdiọn̄ isọn̄ ẹnyụn̄ ẹdọn̄ mme utọ n̄kpọ nte esan̄ukwak mmọn̄. Ke utịt utịt 2013, ẹma ẹtọn̄ọ ndibọp akpa ufọk ita emi ẹsịnede Itie Udiọn̄ N̄kpọisan̄, Itie Ubon N̄kpọisan̄ Isenowo, ye Itie Udiọn̄ N̄kpọ. Enen̄ede oyom ẹnyene mme itie emi man ẹse ẹban̄a mme n̄kpọutom ye mbonutom ke ini utom emi ye ke ẹma ẹkekụre. Mme n̄kpọ en̄wen oro ẹdibọpde ẹdidi ufọkidụn̄, Ofịs, ye Ufọk Utịmutom, emi ẹduakde nditọn̄ọ ke 2014.

 Kenneth Chernish emi edide owo Kọmiti Ubọpn̄kpọ ọdọhọ ke imenyene hekta isọn̄ 20 ke Tuxedo emi edide kilomita duop ọtọn̄ọde ke edem edere Warwick, nte “itie oro ẹdibonde n̄kpọutom ndida mbọp ibuot itieutom ofụri ererimbot ke Warwick. Do ke ndusụk mbonutom unyịmesịt ẹdidụn̄; ndien ẹyenyene ubet udia ye itie ubon n̄kpọutom do.” Ndusụk Kọmiti Ubọpufọk Eke Ikpehe ke Ikpehe ke n̄kan̄ edem usiahautịn United States ke ẹnam ndusụk utom man ẹsọp ẹkụre utom ke Tuxedo.

Enen̄ede ọdọn̄ ediwak mme anamutom unyịmesịt oro ẹsinamde utom ye Mme Kọmiti Ubọpufọk Eke Ikpehe ke Ikpehe nditiene mbọp obufa ibuot itieutom ofụri ererimbot. Nditọete iren ye iban oro ẹnyenede usọ ubọpufọk ke ẹnọ idemmọ unyịme unyịme ndinam utom ke ibio ini ke mme itie ubọpufọk emi. Leslie Blondeau emi anamde utom ye Peter ebe esie ke Itieutom Emi Esede Aban̄a Mmọn̄ Esan̄ukwak ọdọhọ ete: “Ndinam utom ọtọkiet anam nnyịn inen̄ede idiana kiet onyụn̄ anam inyene ndinem ifiọkutom oro nnyịn mîdifreke.”

Mallory Rushmore ọdọhọ ete: “Nnam utom ye mbon oro ẹsinamde utom ikan̄ ilektrịk mi ke Tuxedo. Kpukpru usen, esinenem mi ndikụt kpukpru owo mi, emi ẹnọde idemmọ unyịme unyịme ndinam utom, nte ẹdianade kiet ẹnam utom.”

Quincy Dotson ọdọhọ ete: “Emi edi akwa n̄kpọ ukpono. N̄kekere ke nyenen̄ede n̄wa idem, edi ke nditịm ntịn̄, ufọn oro ndiade akam okpon akan.”

Brọda Chernish ọdọhọ ete: “Esịt enen̄ede enem mi nditiene nnam utom emi. Nditọete ẹnam utom emi usọp usọp ẹnyụn̄ ẹnen̄ede ẹnyene usọ, mmọ ẹnyụn̄ ẹnen̄ede ẹkop inemesịt ndinam utom emi.”