Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 SE ẸKENAMDE ISUA OKO

JW.ORG—“Nte Ntiense Ẹnọ Kpukpru Mme Idụt”

JW.ORG—“Nte Ntiense Ẹnọ Kpukpru Mme Idụt”

Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matt. 24:14) Ke akpanikọ, ikpehe Intanet jw.org edi ata eti n̄kpọ ndida n̄kwọrọ ikọ nnọ “kpukpru mme idụt” ke ekpri ibio ini oro osụhọde mbemiso utịt edi.

Ebe ye n̄wan emi ẹdide mme isụn̄utom ke Solomon Islands ẹkekwọrọ ikọ ke ine kiet ke ini mmọ ẹkekụtde n̄kaniren inan̄. Mmọ ẹma ẹkụt ke n̄kaniren oro ẹnyene fon, ntre mme isụn̄utom oro ẹma ẹbụp mmọ m̀mê mmọ ẹfiọk ndidụk Intanet. Mmọ ẹma ẹdọhọ ke imọfiọk. Ebe ye n̄wan oro  ẹma ẹwụt mmọ nte ẹkemede ndidụk ikpehe jw.org, nte ẹkemede ndikụt usem mmọ, nte ẹkemede ndision̄o magazine ye Bible, ye nte ẹkemede ndida ikpehe emi aban̄ade ubon ye nditọwọn̄ nnam n̄kpọ. Ke ini mme isụn̄utom emi ẹdude ke an̄wautom, esinem mmọ ndiwụt nditọwọn̄ vidio Bọn̄ Akam Ini Ekededi. Ke ini otu nditọwọn̄ kiet emi ẹnen̄erede ẹkop inemesịt ẹkesede vidio emi, mmọ ẹma ẹfehe ẹdụk afan̄ ikọt ẹnyụn̄ ẹkwọ “Ini ekededi mbọn̄de akam . . .”

Ulaanbaatar ke Mongolia

Se itienede emi ẹdi ibat ibat ke otu ediwak leta ekọm emi ẹbọde ke ibuot itieutom ofụri ererimbot nnyịn ke New York:

“Ami ye ebe mi ima iwọrọ ikodụn̄ ke Mexico, ndien ke idomo ndikpep usem Spanish man ikpọkwọrọ ikọ inọ kpukpru owo oro isobode. Mmesikọm Jehovah kpukpru ini emi ndụkde jw.org, koro enye an̄wam mi n̄kop nnyụn̄ n̄kpep n̄kpọ. Ata ediwak n̄kpọ ẹdu do—magazine, n̄wed, ikwọ, ye drama—ke ediwak usem. Mmama mbufo nnyụn̄ n̄kọm mbufo ke kpukpru ọkpọsọn̄ utom emi mbufo ẹnamde.”—D.H., Mexico.

“Mmekpere ndikabade nnan, edi mmenen̄ede mma ikpehe Intanet mbufo sia ẹkot ediwak n̄kpọ ẹdọn̄ emi n̄kemede ndikpan̄ utọn̄ n̄kop. N̄wet leta emi ndisịn udọn̄ nnọ mbufo ẹka iso ẹkot ediwak n̄wed, ndiye uduot n̄kpri n̄wed, ye mme n̄wed eken ẹdọn̄ ke MP3 koro mmekeme ndibre mmọ ofụri usen.”—K.G., United States.

“Mmama jw.org! Enye isọn̄ke ndidụk, esinyụn̄ anam nnen̄ede nsịn ifịk n̄kpep n̄kpọ ke idemmi onyụn̄ an̄wam mi ke an̄wautom. Ndi isua 72, ndien n̄kana baptism ke isua 47 ẹmi ẹkebede, mmonyụn̄ nnam utom usiakusụn̄ ke se ibede isua 30. Ndi eka nditọ. Nditọ mi usụkkiet ẹma  ẹna baptism. Ndien mmenyene nditọ nditọ 16 ye nditọ nditọ-nditọ 3. Idahaemi ọtọn̄ọde ke nditọ mi tutu esịm nditọ nditọ-nditọ mi ẹdi mme asiakusụn̄ ofụri ini. Mmọkọm Jehovah ke udia eke spirit emi ẹnọde ke edikem ini mi.”—M.T., United States.

“N̄wet leta emi ke n̄kanika inan̄ usenubọk. Nsikemeke ndide idap okoneyo ke ntak awak-n̄kukọhọ udọn̄ọ mfre ye mme udọn̄ọ eken emi nnyenede, ukem nte ediwak ndima nditọete nnyịn eken ke ofụri ererimbot. Jehovah ke ọnọ nnyịn udia eke spirit, ntak edi oro n̄kọmde mbufo. Mmama ndise etieti, oro anam nnen̄ede mma ndise oro ẹdọn̄de ke ikpehe Intanet nnyịn. Mmenen̄ede mma mme chart, vidio, ye ndise emi ẹsiwetde man se ẹtịn̄de ẹnen̄ede ẹn̄wan̄a.”—B.B., New Zealand.

“N̄wet leta emi ndikọm mbufo. Ndi abiausọbọ nnyụn̄ nnam utom ke obio-in̄wan̄ ke Sri Lanka, ndien nsinyeneke magazine ke usem edem nnyịn do. Edi mmesision̄o nnyụn̄ n̄kot mmọ ke usem edem nnyịn ke ikpehe Intanet  mbufo. Ikpehe Intanet mbufo edi kiet ke otu akakan enọ emi Jehovah ọnọde mme owo nte ami.”—N.F., Sri Lanka.

“N̄wet leta emi ndikọm mbufo mban̄a ofụri ọkpọsọn̄ utom emi mbufo ẹnamde ndin̄wam mme owo ẹkpep n̄kpọ ẹban̄a Jehovah. Mbọk ẹka iso ẹnam vidio ẹdọn̄ ke jw.org. Mme vidio oro ẹn̄wam mi ye ubon mi ikọk mme mfịna nnyịn. Vidio oro an̄wamde mi akan edi Nte Ekemede Ndikan Owo Mfiomo Edi Un̄wanake-N̄wana. Mbọk, yak mfiak n̄kọm mbufo mban̄a ọkpọsọn̄ utom mbufo.”—Y.S., isua 9, United States.

“Nyom ndikọm mbufo ye Jehovah mban̄a udia eke spirit emi inyenede. Ikpehe Intanet jw.org an̄wam mi tutu, akpan akpan ikpehe oro ẹkotde ‘Mme Uyen.’ Mmama n̄ko Di Ufan Jehovah. Nnyene n̄kpri nditọeka iban ita, ndien mmokụt nte vidio emi an̄wamde mmọ. Okposụkedi emi nnyịn mîdụn̄ke ikpere mbufo, ima emi kpukpru nnyịn imade Jehovah anam idi nditọete emi ẹdianade kiet. Ẹsọsọn̄ọ.”—A.B., Peru.