Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 PREACHING AND TEACHING EARTH WIDE

America

America
  • IDỤT 57

  • IBATOWO 970,234,987

  • MME ASUANETOP 3,943,337

  • UKPEPN̄KPỌ BIBLE 4,341,698

Mmọ Ẹma Ẹdọhọ Ebe ye N̄wan Ẹdidu ke Ufọk Mmimọ

Ke Las Vegas ke Nevada, ebe ye n̄wan emi mîdịghe Ntiense ẹkeyom ebiet emi etiede ifụre ifụre ndidụn̄, ntre mmọ ẹma ẹnyam ufọk mmọ ẹwọrọ ẹka Dominican Republic. Edi mmọ ẹkenyene ndikpọn̄ ufọk mmọ usen duop mbemiso usen emi ubomofụm mmọ edidahade. Man ẹn̄wam ebe ye n̄wan oro, mbọhọidụn̄ mmọ emi ẹdide Mme Ntiense Jehovah ẹma ẹdọhọ mmọ ẹdidu ke ufọk mmimọ. Ke ini  ebe ye n̄wan oro ẹkedude do, mmọ ẹma ẹdụk mbono esop ke Ufọkmbono Obio Ubọn̄. Idem ama akpa mmọ onyụn̄ enem mmọ ndikop nte ẹsiakde 1914. Mmọ ẹma ẹfiọk ke isua emi ekedi akpan isua ke mbụk ererimbot. Ke ndondo oro ebe ye n̄wan oro ẹkesịmde Dominican Republic, mmọ ẹma ẹdọhọ mme akpa Ntiense oro ẹkedide ufọk mmọ ẹkpep Bible ye mmimọ. Ke isua kiet ye ọfiọn̄ iba ẹma ẹkebe, mmọ mbiba ẹma ẹyak idem ẹnọ Abasi ẹnyụn̄ ẹna baptism.

Ata Nnennen Se Enye Okoyomde

Nditọete ẹma ẹnịm okpokoro ẹdori mme n̄wed nnyịn ke ndutịm unyam n̄wed ofụri ererimbot ke 2012 ke obio Panama ke idụt Panama. N̄kaiferi iba emi ẹdide nditọ ufọkn̄wed ẹma ẹka okpokoro oro. Kiet ke otu mmọ ama ọdọhọ eyenete an̄wan oro ekesede aban̄a okpokoro n̄wed oro ke esịt inemke imọ. N̄kaiferi oro ama ọdọhọ ke ete imọ enyene mbumehe uda n̄kpọsọn̄ ibọk ndien ke imọ ifiọkke se ikpanamde. Eyenete an̄wan oro ama owụt n̄kaiferi oro ibuot 23 ke n̄wed Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 2, emi ọdọhọde ete: “Nso ke N̄kpanam Edieke Ọkpọsọn̄ Mmịn M̀mê N̄kpọsọn̄ Ibọk Emehede Ete M̀mê Eka Mi?” N̄kaiferi oro ama ofiori ete: “Ata nnennen se nyomde edi emi!” N̄kaiferi iba oro ẹma ẹfat eyenete an̄wan oro, ndien ke hour iba ẹma ẹkebe, mmọ ẹma ẹfiak ẹdikọm enye. Ke usen ition emi ẹkenyamde n̄wed do, nditọete nnyịn ẹma ẹnịm n̄wed 1,046, magazine 1,116, ye ndiye uduot n̄kpri n̄wed 449. Owo 56 ẹma ẹnọ adres mmọ man Mme Ntiense ẹkpedi ẹdise mmimọ.

Ọkwọrọ Ikọ Ikpọn̄ ke Isua Inan̄

Fredy emi Cabecar edide usem emana esie odụn̄ ke nsannsan obio kiet emi odude ke obot ke Costa Rica. Ke n̄kpọ nte  isua inan̄ emi ẹkebede, Fredy ama ọbọ n̄wed Nso ke Bible Enen̄ede Ekpep? ye ediye uduot ekpri n̄wed Nso ke Abasi Oyom Oto Nnyịn? ke ini emi enye akanamde utom ke San José emi edide ibuot obio. Asuanetop oro ọkọnọde Fredy mme n̄wed oro ọkọdọhọ enye ọnyọn̄ ọkọkwọrọ ikọ ọnọ mbon edem mmọ, ntre enye ama ọnyọn̄ aka edem mmọ. Fredy ama ekpep n̄wed Bible Ekpep ke idemesie, onyụn̄ okpụhọde usụn̄ uwem esie. Ke uwụtn̄kpọ, enye ama esịn ndọ esie ke n̄wed. Ekem, enye ama ekpep mme owo akpanikọ nte ekekeme ke usem Cabecar.

Fredy ekesikpep nditọ ukpepn̄kpọ Bible esie n̄kpọ ke otu ke otu. Enye eketịm otu ukpepn̄kpọ itiokiet, edeme nditọ ukpepn̄kpọ ọdọn̄ ke otu kiet kiet etiene nte mmọ ẹkenamde ọfọn ke udomo oro enye eketemde mmọ man ese nte mmọ ẹfiọkde Bible. Enye ama esinịm mme mbono esop ye Editi, ewet n̄wedikot ke idemesie, emi ọkọdọhọde ete: “Mme Ntiense Jehovah ẹkot fi ẹte edidụk Editi n̄kpa Christ ye mmimọ.” Enye ikosoboke aba ye Ntiense ndomokiet edi anam kpukpru emi ke isua inan̄! Ke ofụri ini oro, enye ama esibọn̄ akam eben̄e Jehovah ete ọnọ Mme Ntiense ẹdin̄wam imọ.

Ẹma ẹbọrọ akam Fredy ke ndondo emi. Okposụkedi emi mîmemke utom ndika obio mmọ, Mme Ntiense ẹma ẹka, ndien idem ama akpa mmọ ndikụt kpukpru se enye akanamde. Mmọ ẹkewet ẹte, “Okposụkedi emi Fredy mîkedịghe Ntiense emi anade baptism, enye odu uwem nte Ntiense emi ama akana baptism!” Ke ọfiọn̄ ita kpọt ẹma ẹkebe, ẹma ẹdọhọ ke enye odot ndidi asuanetop oro mînaha baptism. Fredy ama asan̄a ye nditọ ukpepn̄kpọ Bible esie 19 oto obot oro osụhọde edidụk mbono ke akpa ini man ana baptism. Idahaemi enye etịm otu usem Cabecar ita efen ke mme obio-in̄wan̄ oro ẹdude ata nsannsan.

Costa Rica: Fredy emi edide asiakusụn̄ ofụri ini idahaemi, esisan̄a ata anyan isan̄ man ekekpep mme owo Bible

Enye Ama Ada Ọnọ Se Enye Enịmde ke Akpanikọ ke Ufọkn̄wed

Usen kiet, Anna emi akade ufọkn̄wed sekọndri ke United States, ama etịn̄ se enye enịmde ke akpanikọ ke ini ediwak  nditọ ufọkn̄wed mmọ ẹkeyatde esịt ye enye ke ntak emi enye mînịmke ukpepn̄kpọ Abasi-Ita-ke-Kiet. Anna ọdọhọ ete: “Mmọ ẹma ẹtọn̄ọ nditọhọ ye ami. Edi mma mmụm idem n̄kama sia n̄koyomke mme owo ẹkere ke Mme Ntiense Jehovah ẹdi mbon utọk.” Mbubreyo usen oro, Anna ama ọbọn̄ akam ọnọ Jehovah eben̄e uko onyụn̄ anam ndụn̄ọde aban̄a ukpepn̄kpọ Abasi-Ita-ke-Kiet. Ke ndan̄nsiere, enye ama ada Bible esie edi ufọkn̄wed. Nditọ ufọkn̄wed mmọ ẹma ẹkanade enye ẹkụk, ediwak mmọ ẹnyụn̄ ẹsak enye. Edi enye ama okot onyụn̄ eneme ediwak itie N̄wed Abasi ye mmọ. Ke akpatre, mbon oro ẹkefan̄ade mfan̄a ye enye ikenyeneke aba uyo. Etubom mfan̄a oro, emi okonyụn̄ edide prifet ke ubet ukpepn̄kpọ mmọ ama etịn̄ ke akpatre ete ke imọ imokpono Mme Ntiense Jehovah ndien. Ke ofụri isua oro, prifet oro ama esibụp Anna nsio nsio mbụme aban̄a mme ukpepn̄kpọ nnyịn.

Ikpaukot Esịbe ke Nnennen Ini

N̄kaiferi kiet ke Barbados akasan̄a ke usụn̄ uka ufọkabasi ke usenubọk Sunday kiet ke ini ikpaukot esie ekesịbede.  Enye ama awaha ufọk oro ekekperede onyụn̄ ọdọhọ ẹnọ imọ pin ida ikpaha ikpaukot imọ. Ufọk oro enye akawahade ekedi ufọk eyenete an̄wan emi odụn̄de ye eyen esie an̄wan. Ke ini n̄kaiferi emi ọkọdiọn̄de ikpaukot esie, eyenete an̄wan oro ama asian enye nte mme ntịn̄nnịm ikọ Bible ẹsude idahaemi. Eyen eyenete an̄wan emi ama ọdọhọ n̄kaiferi oro etiene mmimọ aka mbono esop ke Ufọkmbono Obio Ubọn̄ nte ini akakade ke usenubọk oro. Sia eyo ama ọkọsọn̄ enye ndika ufọkabasi esie, enye ama enyịme nditiene mmọ n̄ka. N̄kaiferi oro ama okụbọde Bible King James esie ese kpukpru itie N̄wed Abasi oro ẹkekotde ke mbono esop oro. Mbono esop oro ama enem enye tutu. Enye ama ọdọhọ ke akak imọ ndikop uyom n̄kukwak ye n̄kpo ke ufọkabasi mmimọ, ye nte ke imọ ikesiyoyom ndikpep Bible ke ebiet emi etiede ifụre ifụre. Enye ama ọbọ n̄wed Bible Ekpep onyụn̄ ọdọhọ ẹsikpep imọ Bible. Enye esidụk kpukpru mbono esop onyụn̄ etiene abuana ifịk ifịk.

Owo Kiet Kpọt Ekeme Ndikpan Enye Ndikwọrọ Ikọ

Ekpri eyenete kiet ke Guyana ọdọhọ ete: “Mmesima ndikwọrọ ikọ nnọ nditọ ufọkn̄wed nnyịn, edi enyene eyen ufọkn̄wed nnyịn kiet emi mîsimaha n̄kwọrọ ikọ. Usen kiet, enye ama onụk mi ọtọ ke ibibene onyụn̄ ọdọhọ ete, ‘Tre ukwọrọikọ oro!’ Mma mbọrọ enye ke Jehovah edi n̄kukụre owo oro ekemede ndikpan mi ndikwọrọ ikọ. Nte n̄kosụk n̄kwọrọde ikọ, enye ama edisịbe ekpat oro n̄kọkọn̄ọde ke edem. Ọtọ mi ita ke inua onyụn̄ esịbe mi n̄kpọkinua. Ẹma ẹda nnyịn mbiba ẹka ọfis akamba etubom, ndien enye ama ọdọhọ mi ntịn̄ se ikanamde eyen oro amia mi. Mma mbọrọ ke eyen oro akamia mi ke ntak oro n̄kọkwọrọde eti mbụk. Akamba etubom ama obụp m̀mê ntak emi mmen̄kamiaha enye usiene, onyụn̄ ọdọhọ ke akpakana mmia enye usiene. Mma ndọhọ enye ke ẹma ẹkpep mi ke Bible ke Rome 12:17 ẹte mme Christian ‘ẹkûda idiọk ẹsio owo usiene idiọk.’ Ke ini akamba etubom okokopde emi, enye ama ọdọhọ yak n̄ka, ke imọ iyọnọ ufan oro ufen.”

Catamarca ke Argentina