Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

 NDIKWỌRỌ IKỌ NNYỤN̄ N̄KPEP MME OWO N̄KPỌ KE OFỤRI ISỌN̄

Africa

Africa
  • IDỤT 58

  • IBATOWO 979,685,702

  • MME ASUANETOP 1,363,384

  • UKPEPN̄KPỌ BIBLE 3,265,314

“Mmọn̄ N̄kpọn̄ Akwa Babylon Ndien”

Thomson, akparawa emi odụn̄de ke Uganda, ikamaha aba ido ukpono. Enye ama etre ndidụk kpukpru edinam ido ukpono sia mîkamaha nte mme ọkwọrọ ederi ẹsikwọrọde okụk kpukpru ini. Edi enye ama aka iso okot Bible esie kpukpru usen. N̄wed Ediyarade ke enye akama akan, ndien enye ama odomo nditịn̄ se n̄wed oro ọwọrọde, onyụn̄ ewet n̄kpọ mbio mbio ke n̄wed uwetn̄kpọ  esie. Ke ini eyenete kiet okosobode ye Thomson ke itieutom, ke ebiet emi ẹbọpde ufọk, eyenete oro okokụt enye nte okotde Bible. Mmọ ẹma ẹnen̄ede ẹneme nneme, Thomson onyụn̄ ọbọ n̄wed Nso ke Bible Enen̄ede Ekpep? Enye ama ada okoneyo kiet okot n̄wed oro okụre. Ke ndan̄nsiere, eyenete oro ama ọbọ etop ke fon emi ọkọdọhọde ete: “Ekọm enyene Ọbon̄ ke se enye anamde mi mfiọk. Mmọn̄ n̄kpọn̄ Akwa Babylon ndien.” Thomson ama ọdọhọ ẹnọ imọ kpukpru n̄wed oro ẹtịn̄de ẹban̄a ke mme ikọ idakisọn̄ ye ke se ẹwetde ẹdian ke n̄wed oro. Enye ama esịn idem ekpep Bible, anam usọp usọp n̄kọri, onyụn̄ ana baptism ke Mbono District “Kpeme Esịt Fo!” ke 2012. Ke March 2013, Thomson ama ọtọn̄ọ ndinam utom usiakusụn̄ ofụri ini man an̄wam mbon en̄wen ẹfiọk ke oyom mmimọ ikpọn̄ Akwa Babylon.

Nditọete Itiaita Ẹma Ẹkpep Enye N̄kpọ

Ẹkebọk Jimmy ke Port Louis, ibuot obio Mauritius. Enye ọkọtọn̄ọ ndisin̄wọn̄ mmịn ke ini ekedide isua 16, ndien ikebịghike enye ama ọtọn̄ọ ndisikpa mmịn kpukpru usen. Enye ama esinam mme n̄kpọ emi mîdotke ke enyịn mmịn, ndien ẹma ẹkọbi enye ediwak ini. Ndusụk ini, enye ama esin̄wọn̄ n̄kpọ nte ekpeme ọkpọsọn̄ mmịn ita ye sika 60 ke usen. Ke ini enye mînyeneke okụk, enye ama esin̄wọn̄ ibọk emi ẹsidade ẹyet window sia etiede nte ufọfọp. Enye ama akam ọn̄wọn̄ ufuọn̄n̄kpọ eka esie emi ẹkotde eau de cologne. Ke ini owo ọkọdọhọde enye ke enye ebiet okpo owo, enye ama adaha ke idemesie aka ebiet emi ẹsinamde owo etre ọkpọsọn̄ mmịn ye n̄kpọsọn̄ ibọk, onyụn̄ odu do isua kiet ye ubak, edi emi ikenen̄ekede in̄wam enye.

Rodrigues: Jimmy ama ebiere ndikpụhọde nte enye ekesidude uwem

Nte ini akakade, Jimmy ama osobo ye Mme Ntiense Jehovah onyụn̄ enyịme ndikpep Bible. Ndusụk ini, enye ama esidaha ke itie ukpepn̄kpọ aka ọkọn̄wọn̄ mmịn.  Nditọete itiaita ẹma ẹkpep enye n̄kpọ. Nte ini akakade, Jimmy ama ọfiọk ke oyom imọ ikpụhọde nte idude uwem. Enye ọkọdọhọ ete: “Eketie nte n̄kpọ eke akan̄kan̄ eke spirit oro ẹtịn̄de ẹban̄a ke Hebrew 4:12 ekịmde mi esịt. Usen kiet, ke ini n̄kosụk n̄kotde Bible, mma n̄kot Mme N̄ke 24:16, emi ọdọhọde ete: ‘Edinen owo ekeme ndiduọ utịm ikatiaba, onyụn̄ adaha ada.’ Emi ama okpụhọde uwem mi.” Ke Jimmy ama ‘ọkọduọ’ ikatiaba ke ini nditọete itiaba ẹkedomode ndikpep enye n̄kpọ, enye ama ebiere ‘ndidaha nda’ ye un̄wam ọyọhọ eyenete itiaita. Jimmy ama ekpe Jehovah ubọk ete ọnọ imọ ukeme, odụk mme mbono esop, onyụn̄ etre idiọk edu esie. Enye ama ana baptism ke 2003 onyụn̄ ọtọn̄ọ utom usiakusụn̄ ofụri ini ke 2012. Enye edi asan̄autom unamutom idahaemi ke esop kiet ke Isuo Rodrigues.

“Jehovah ye Mme Angel Ẹdidi Ufan Mi”

Mary emi edide isua 70 ke Kenya ekedi owo Ufọkabasi Presbyterian ke ofụri eyouwem esie. Enye ekedi owo emi ekesinamde mme owo ẹtịp okụk ke ufọkabasi, ndien enye ama an̄wam ọbọp ufọkabasi kiet. Esịt ikenemke enye ke ini eyen esie kiet akakabarede edi Ntiense. Eyen oro ama esikot enye mbono esop, edi enye ikesimaha ndidụk, ete ke iyom ndikop etop Bible ke usem emana imọ emi edide Kikuyu, idịghe ke Swahili. Nte ini akakade, Mary ama enyịme ndidụk mbono district emi ẹkeyomde ndinịm ke usem Kikuyu. Enye eketie ke ikpehe emi ẹnịmde ẹnọ n̄kani owo ke mbono oro. Enye ama enen̄ede ama nte ẹkefọnde ido ye enye ẹnyụn̄ ẹmade enye. Mary ọkọdọhọ ke akananam imọ ikwe nte ẹmade owo ntre ke ufọkabasi mmimọ. Enye ama enen̄ede akpan̄  utọn̄ okop kpukpru utịn̄ikọ, se enye okokopde onyụn̄ enem enye. Ke ini ẹkedọhọde ke ẹmọn̄ ẹda ediye uduot ekpri n̄wed Kpan̄ Utọn̄ Nọ Abasi ẹkpep enye n̄kpọ, enye ama ọsọsọp enyịme.

Ke Mary ama ekekpep n̄kpọ ke ọfiọn̄ ifan̄, enye ama ọdọhọ ke iyom ndikabade ndi Ntiense Jehovah, ntem enye ama esịn n̄wed ọkpọn̄ ufọkabasi. Esịt ama enen̄ede ayat mme adaiso ke ufọkabasi. Mmọ ẹma ẹkot pastọ oto Nairobi, emi edide ibuot obio, editịn̄ ikọ ye enye. Pastọ oro ama odomo ndinam Mary okûkpọn̄ ufọkabasi, edi Mary ikakpan̄ke utọn̄ inọ enye. Enye okobụp Mary ete: “Edieke afo ọkpọn̄de ufọkabasi, mmanie ẹdidi mme ufan fo? Afo emenyene ediwak ufan ye mbọhọidụn̄ ke ufọkabasi emi.”

Mary ama ọbọrọ ete: “Jehovah ye mme angel ẹdidi ufan mi. Mme Ntiense ẹyedi ufan mi n̄ko.”

Pastọ oro ama adaha ọkpọn̄ Mary sia mîkekemeke ndinam enye okpụhọ ekikere. Mary ke ekpep Bible onyụn̄ odụk kpukpru mbono esop, kpa ye oro itie mbono esop mîkpereke ufọk esie. Ke ndondo emi, ke ini n̄kpọisan̄ mîkodụhe se enye odụkde aka mbono esop,  enye ama asan̄a hour iba ke edịm man okodụk mbono esop. Kpa ye oro mbọhọidụn̄ ẹbiọn̄ọde enye, enye ebiere ndina baptism.

Liberia: Nditịm n̄kpọitie mben̄e Editi. Ke 2013, mme asuanetop 6,148 ẹma ẹdara owo 81,762 oro ẹkedụkde Editi

Pastọ Ama Esịn Ukot Ọnọ Enye!

Ashton edi n̄kaiferi isua 14 emi odụn̄de ke Cameroon. Enye odụn̄ ye eyeneka ete esie ye n̄wan esie, ndien ke ini enye ọkọtọn̄ọde ndikpep Bible ye Mme Ntiense Jehovah, mmọ ẹma ẹnen̄ede ẹbiọn̄ọ enye. Mmọ ẹkesidọhọ enye etiene mmimọ aka ufọkabasi Pentecostal. Usen kiet ke ufọkabasi, pastọ ama odori mme owo ubọk ke ibuot ete ke inọ mmọ spirit, oro onyụn̄ anam mmọ ẹduọn̄ọ ke isọn̄. Ashton ikoduọhọ. Pastọ oro ama enen̄ede ọbọn̄ akam, edi Ashton ikọsụk iduọhọ. Ntre pastọ ama esịn ukot ọnọ enye man ọduọ! Ke ini mmọ ẹkenyọn̄de ẹsịm ufọk, enye ama etịn̄ ọnọ eyeneka ete esie ye n̄wan esie ke pastọ ama esịn ukot ọnọ imọ, edi mmọ ikenịmke. Enye ama ebiere ke ebe oro ete ke tutu amama imọ idikaha aba ufọkabasi oro. Ashton ke ododụk mbono esop ke Ufọkmbono Obio Ubọn̄ kpa ye oro mbonubon ye mbọhọidụn̄ ẹbiọn̄ọde ẹnyụn̄ ẹsuenede enye.

Eyennsek Ọnọ Mme Owo N̄wedikot

Kpa ye oro Anilpa ekedide isua kiet ye ọfiọn̄ ition kpọt, enye ama etiene esịn ifịk ọnọ mme owo n̄wedikot ndidụk mbono district isua oko ke Angola. Utom Anilpa ekedi ndikọn̄ usụn̄ nnyụn̄ mbet man ọnọ enyeneufọk n̄wedikot ke ini eka esie etịn̄de ibio ibio se ikadade mmọ idi. Sia Anilpa ekenyenede ifịk etieti, enye ikesiwakke ndibet eka esie okụre mbemiso enye ọkọn̄de usụn̄ en̄wen. Se enye akanamde ama enen̄ede otụk mme enyeneufọk. Ke  uwụtn̄kpọ, ke akpatre usen mbono oro n̄wan kiet ama aka ebịne Anilpa ọkọdọhọ ete: “N̄koyoyom fi. Esịt enem mi ndikụt fi, sia afo okokot mi mbono emi.”

Ẹkpa Mba Ẹnọ Ufịk

Ke August 2012, mme asuanetop ke Esop Antaviranambo ke Madagascar ẹma ẹsobo ye otuowo emi ẹkedọhọde ke mmimọ iyom ndikabade ndi Mme Ntiense Jehovah. Otuowo emi ẹkedọhọ ke mme adaiso ido ukpono mmimọ ẹfefịk mmimọ, ndien ke mmọ ikanamke se mmọ ẹkpepde owo. Mbon ufọkabasi oro ẹkedọhọ ke ufọkabasi mmimọ inyeneke ndutịm ndikpep mmimọ n̄kpọ mban̄a Bible, inyụn̄ inyeneke mme n̄wed ndinam ẹfiọk mme ukpepn̄kpọ mmimọ. Okụk emi ẹsidọhọde ẹtịp ke ufọkabasi ama awak akaha, mme owo ikadianake kiet, ima emi ata mme Christian ẹkpenyenede ikonyụn̄ idụhe. Mmọ ẹma ẹdọhọ n̄ko ke mmimọ imọfiọk ke eke Mme Ntiense Jehovah itiehe ntre.

Nte ini akakade, otu oro ẹma ẹwet leta ẹnọ n̄kọk  itieutom. Leta oro ọkọdọhọ ete: “Iwet leta emi ndinam mbufo ẹfiọk ke nnyịn iyom ndinam n̄kpọ Jehovah. Edi ebiet emi nnyịn idụn̄de oyom usụn̄. Esida ndusụk nnyịn n̄kpọ nte hour 9 esịm 15 ndisan̄a n̄ka mbono esop. Ntre mbọk ẹnọ owo edikpep nnyịn Bible. Nnyịn idikemeke ndinam n̄kpọ Jehovah ke ofụri esịt nte ọdọn̄de nnyịn ibọhọke mbufo ẹnọ owo edin̄wam nnyịn inen̄ede ima enye. Nnyịn idi owo 215 emi itode obio ita ke nsụhọde n̄kaha. Nnyịn isika nsio nsio ufọkabasi, edi idahaemi ọdọn̄ nnyịn ndinam n̄kpọ Jehovah nnyụn̄ n̄kop uyo esie ke ofụri esịt. Imenen̄ede inịm ke mbufo ẹyen̄wam nnyịn.”

Nditọete ẹma ẹka ndisobo ye otu emi, ndien ẹkesan̄a hour usụkkiet ẹkesịm akpa obio. Nditọete oro ẹma ẹnịm mbono esop do, ndien owo 65 oro ẹnyenede udọn̄ ẹkedụk. Etop ama ọsọsọp asuana, ndien mme owo ke mme obio ẹken ẹma ẹdọhọ ke imoyom ẹdikpep mmimọ Bible. Ntre, nditọete ẹma ẹfiak ẹsan̄a hour inan̄ ẹka obio en̄wen, ẹkenịm mbono esop emi se ibede owo 80 ẹkedụkde. Mmọ ẹma ẹkụt mbon en̄wen emi ẹkekpede mmọ ubọk ẹte ẹtiene ẹdi obio mmimọ, emi adade hour iba ndisan̄a tọn̄ọ do n̄kesịm. Nditọete oro ẹma ẹnyịme ẹnyụn̄ ẹkenịm mbono esop do n̄ko. Se ibede owo 50 ẹkedụk.

Ikaba, se ibede owo 30 ke mme obio emi ẹma ẹsan̄a usen kiet ye ubak ke uka ye usen kiet ye ubak ke unyọn̄ ẹka mbono ke Mahanoro. Owo 25 emi ẹsịnede mme ọdọ ndọ, ediwak ubon, ye mbonusọn̄ ẹma ẹdi ke ini esenyịn circuit ekedide. Kpukpru mmọ ẹkedụn̄ ke ufọk kiet, ẹneme se mmọ ẹkekpepde, ẹnyụn̄ ẹbụp mbụme tutu eyo ọsọn̄. Mmọ ẹma ẹdọhọ ke ediwak owo en̄wen ẹyom nditiene Mme Ntiense nnam n̄kpọ Abasi sia mme owo ẹkpa mba ẹnọ ufịk mme adaiso ido ukpono mmọ.