Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2014

Leta Otu Ukara

Leta Otu Ukara

Ndima Mbonufọk Nnyịn:

Esịt adat nnyịn etieti ndiwet mbufo ke ntọn̄ọ obufa isua emi! Ke utịt utịt 2014, ofụri isua ikie ẹyebe tọn̄ọ edima Edidem Jesus Christ ọkọtọn̄ọ ndikara ke ufọt mme asua esie.—Ps. 110:1, 2.

Ke ntọn̄ọ ntọn̄ọ isua utom emi, ke mbono Watch Tower Bible and Tract Society of Pennsylvania eke isua ke isua, Kọmiti Ukabade Bible Obufa Ererimbot ama osio mfọnn̄kan Bible emi ẹfiakde ẹnen̄ede n̄kpọ ke Ikọmbakara. Jehovah akada nditọ esie emi enye obonde ke spirit ọnọ nnyịn ata akpa Edikabade Eke Obufa Ererimbot. (Rome 8:15, 16) Ndi unịmke ke enye ndida nditọ oro enye obonde ke spirit n̄kabade Bible oro anam Bible oro edi san̄asan̄a?

Ke ediwak isua, Kọmiti Uwetn̄wed Otu Ukara ada edikabade Bible nte ebeiso n̄kpọ. Idahaemi, ẹsio ofụri m̀mê ubak Edikabade Eke Obufa Ererimbot ke usem 121. Imesịn  udọn̄ inọ mbufo ite ẹwụt Jehovah adan̄a nte mbufo ẹmade Bible oro mbufo ẹnyenede. Ẹkot enye ẹnyụn̄ ẹtie ẹkere se ẹkotde kpukpru usen. Ndien emi ayanam mbufo ẹnen̄ede ẹsan̄a ẹkpere Andinyene enye, kpa Jehovah Abasi.—Jas. 4:8.

Mbọm esinam nnyịn ke ini ikopde iban̄a mme idomo oro ndima nditọete nnyịn ẹsobode. An̄wan̄a nnyịn ke ekeme ndisọn̄ mmọ ndusụk ini ndidara ye nditọete mmọ. Ke uwụtn̄kpọ, n̄kpọ ama etịmede ofụri ofụri ke ubon kiet ke Asia ke ini eka ọkọdọn̄ọde ata idiọk akpauben̄ ke mbuari. Mbiausọbọ ikekemeke ndisọbọ enye. Enyene mbọm tutu! Idahaemi ebe etetie ekpeme enye kpukpru ini. Nditọ ita emi mmọ ẹnyenede ke ẹnịm eti uwụtn̄kpọ nte mme Christian ke ndin̄wam ete ye eka mmọ. Eti ubon emi ye kpukpru mbufo emi ẹyọde nsio nsio idomo ẹmekeme ndinyene idatesịt emi otode ediyọ idomo mbuọtidem. (Jas. 1:2-4) Jehovah ọn̄wọn̄ọ ọnọ mme asan̄autom esie oro ẹyetde aran ye mme erọn̄ en̄wen ke nnyịn iyokop inemesịt ke ntak emi ikọsọn̄ọde ida iyọ mme idomo, sia ẹyenọ nnyịn nsinsi uwem!—Jas. 1:12.

Isua oko, owo 19,241,252 ẹkedụk Editi. Ama enen̄ede enem nnyịn ndikụt nte ediwak owo ntre ẹkponode Jehovah ye Jesus Christ ke ndidụk ata akpan mboho ikọt Abasi ke isua! Ke ini Editi, ẹma ẹnen̄ede ẹtoro Jehovah sia ediwak miliọn owo ẹma ẹnam utom usiakusụn̄ unọ un̄wam ke March ye April. Emi enen̄ede esịn udọn̄ ọnọ nnyịn. Ndien ndi ikenemke fi ndifiọk ke mbon oro ẹnamde utom usiakusụn̄ unọ un̄wam ke ini edidi esenyịn circuit ẹkeme nditiene ndụk ofụri mbono mme asiakusụn̄ oro enye enịmde, idem edieke enye mîdịghe  ke ọfiọn̄ March m̀mê April? Mbon oro ẹmade n̄kpọ Abasi ẹfiọk ufọn edisịn idem nnam utom ukwọrọikọ ye mme edinam eken ke esop. Ndisịn idem nnam utom ayan̄wam nnyịn isọn̄ọ ida ikûnyụn̄ uyak n̄kpọ esehede nnyịn, ndien emi idiyakke Devil abiat mbuọtidem nnyịn, idinyụn̄ iyakke enye anam nnyịn itre ndinam n̄kpọ Abasi.—1 Cor. 15:58.

Ndifiọk ke isua utom emi ekebede, ke owo 277,344 ẹkeyarade uyakidem mmọ ke baptism mmọn̄, ndien ke mmọ ke ẹsan̄a idahaemi ke usụn̄ uwem ye nditọete mmọ ke ofụri ererimbot enen̄ede esịn udọn̄ ọnọ nnyịn! (Matt. 7:13, 14) Oyom nnyịn in̄wam mbufa owo emi man mmọ “ẹsọn̄ọ ẹda ke mbuọtidem.” (Col. 2:7) Ẹka iso ẹsịn udọn̄ ẹnọ kiet eken man ẹyọ tutu esịm utịt. (Matt. 24:13) “Ẹtịn̄ ikọ ẹsọn̄ọ ukpọn̄ eke ofụhọde esịt, ẹn̄wam mbon mmemidem, ẹnyene anyanime ye kpukpru owo.” (1 Thess. 5:14) Ke akpatre, yak owo nnyịn kiet kiet ‘okûdop ndibọn̄ akam’ ete: “Yak obio ubọn̄ fo edi.”—1 Thess. 5:17; Matt. 6:10.

Mbọk yak N̄wedisua emi enem mbufo ndikot, ẹnyụn̄ ẹfiọk ẹte ke imama kpukpru mbufo emi ẹmade Jehovah!

Nditọete mbufo,

Otu Ukara Mme Ntiense Jehovah