Esịt ama ayat Jezebel etieti ini enye okopde ke ẹwot mme prọfet Baal. Enye ama ọdọn̄ ẹkedọhọ Elijah ẹte: ‘N̄kpọn̄, afo n̄ko ayakpa ukem nte mmọ.’ Ndịk ama anam Elijah efehe aka desat. Enye ama ọbọn̄ akam ete: ‘Jehovah, akak mi ndien. Yak mi n̄kpa.’ Ama akak enye ke idem tutu idap ọbọhọ enye ke idak eto emi enye eketiede.

Angel kiet ama edidemede enye sụn̄sụn̄ onyụn̄ ọdọhọ enye ete: ‘Daha da dia udia.’ Elijah ama okụt ekara uyo odorode ke ebok ufiop itiat onyụn̄ okụt edin̄wọn̄ mmọn̄. Enye ama ata uyo, ọn̄wọn̄ mmọn̄, ekem afiak ekede. Angel oro ama afiak edidemede enye onyụn̄ ọdọhọ enye ete: ‘Dia n̄kpọ man enyene odudu koro ebiet emi edikade ọniọn̄ usụn̄ etieti.’ Elijah ama afiak adia n̄kpọ. Ekem enye ama asan̄a uwemeyo 40 ye okoneyo 40 tutu ekesịm Obot Horeb. Ke ama ekesịm do, enye ama odụk abaitiat kiet man akanana ede. Edi Jehovah ama edibụp enye ete: ‘Elijah, nso ke anam mi?’ Elijah ama ọbọrọ enye ete: ‘Nditọ Israel imaha ndinam aba se mmọ ẹken̄wọn̄ọde ẹnọ fi. Mmọ ẹwụri mme itieuwa fo, ẹwot mme prọfet fo, ẹnyụn̄ ẹyom ndiwot mi n̄ko.’

Jehovah ama ọdọhọ enye ete: ‘Wọrọ ka kada ke enyọn̄ obot oko.’ Ata ọkpọsọn̄ ofụm ama ofụme ebe ke abaitiat oro. Ke ofụm ama okofụme ama, unyekisọn̄ ama etịbe, ekem akwa ikan̄ asak. Ke akpatre, Elijah ama okop sụn̄sụn̄ ekpri uyo. Enye ama emen ọfọn̄idem esie ofụk iso ọwọrọ akada ke inua abaitiat oro. Jehovah ama obụp enye ntak emi enye ekefehede. Enye ama ọdọhọ ete: ‘Ẹwot mme prọfet fo ẹma. Ami ikpọn̄ nsụhọ.’ Edi Jehovah ama ọdọhọ enye ete: ‘Idịghe afo ikpọn̄ osụhọ. Owo 7,000 do ke Israel emi ẹsụk ẹkponode mi. Ka kemek Elisha man enye ada itie fo nte prọfet.’ Elijah ama ọsọsọp akanam se Jehovah ọdọhọde. Edieke anamde se Jehovah ọdọhọde, ndi emekere ke enye ayan̄wam fi n̄ko? Ayan̄wam. Yak ise n̄kpọ en̄wen emi eketịbede ini edịm mîkedepke ke Israel.

“Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.”—Philippi 4:6