Ini oro edịm mîkedepke kan̄a, Jehovah ama ọdọhọ Elijah ete: ‘Ka Zarephath. Ebeakpa kiet do ọyọnọ fi udia.’ Ke ini Elijah esịmde inuaotop obio oro, enye ama okụt ubuene ebeakpa kiet atan̄de ifia onyụn̄ ọdọhọ enye ọnọ imọ mmọn̄ in̄wọn̄. Ini mma oro akade ndikoi mmọn̄ nsọk enye, enye ama ọdọhọ ete: ‘Mbọk men ekpri uyo n̄ko sọk mi.’ Mma oro ama ọdọhọ ete: ‘Nnyeneke uyo se nnọde fi. Nnyene ata ekpri ndomuyo ye aran se ndade nnam uyo nta ye eyen mi.’ Elijah ama ọdọhọ enye ete: ‘Jehovah ọdọhọ ke edieke afo anamde uyo ọnọ mi, ke ndomuyo ye aran fo idikụreke tutu edịm afiak edep.’

Ntre ebeakpa oro ama aka akanam uyo ọnọ prọfet Jehovah. Kpa nte Jehovah ọkọdọhọde, enye ye eyen esie ikananake udia tutu edịm afiak edep. Ndomuyo ye aran esie ikokụreke.

Edi ata n̄kpọ mmọn̄eyet ama etịbe. Eyen mma oro ama ọdọn̄ọ akpa. Ekpri eyen erenowo oro kpọt ke enye ekenyene.  Mma oro ama ekpe Elijah ubọk ete an̄wam imọ. Elijah ama ọbọ enye eyen oro emen ọdọk ubet kiet ke ufọkenyọn̄ emi mmọ ẹkedụn̄de, akayak enịm ke bed onyụn̄ ọbọn̄ akam ete: ‘Jehovah mbọk nam eyen emi eset.’ Se Elijah ọdọhọde Jehovah anam emi ayakpa owo idem etieti. Ntak-a? Idụhe owo ndomokiet emi ẹdọhọde ke ẹma ẹnam eset mbemiso eyen oro. N̄kpọ en̄wen edi ke ebeakpa oro ye eyen esie ikotoho Israel.

Uwem ama afiak odụk eyen oro idem, enye onyụn̄ ọtọn̄ọ ndin̄wek ibifịk! Elijah ama ọdọhọ ebeakpa oro ete: ‘Sese! Eyen fo afiak odu uwem.’ Esịt ama enem mma oro tutu. Enye ama ọdọhọ Elijah ete: ‘Ke akpanikọ, afo edi owo Abasi. Se inamde nnịm edi ke afo esitịn̄ se Jehovah ọdọhọde fi etịn̄. Ndien se afo esitịn̄de isitreke nditịbe.’

“Ẹtịm ẹse mme raven ẹte mmọ isuanke n̄kpasịp inyụn̄ idọkke-dọk, mmọ inyụn̄ inyeneke ebiet ubon mbun̄wụm in̄wan̄ ye ufọk ubonn̄kpọ, edi Abasi ke ọbọk mmọ. Nte mbufo isọn̄ke urua ikan mme inuen?”—Luke 12:24