Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 39

Akpa Edidem Israel

Akpa Edidem Israel

Jehovah ekemek mme ebiereikpe ete ẹda nditọ Israel usụn̄, edi mmọ ẹkedọhọ ke iyom edidem. Mmọ ẹma ẹdọhọ Samuel ẹte: ‘Kpukpru idụt emi ẹdude ẹkanade nnyịn ẹnyene edidem. Imoyom edidem n̄ko.’ Samuel ama etịn̄ n̄kpọ emi ọnọ Jehovah ke akam sia enye ekekere ke mmọ inenke. Jehovah ama ọdọhọ enye ete: ‘Ami ke mmọ ẹsịn, idịghe afo. Dọhọ mmọ ke mmọ ẹyenyene edidem, edi ke edidem oro ọyọbọ mmọ ediwak n̄kpọ.’ Kpa ye oro, nditọ Israel ẹma ẹdọhọ ẹte: ‘Mfịna idụhe. Iyom edidem!’

Jehovah ama ọdọhọ Samuel ke owo kiet emi ekerede Saul edidi akpa edidem mmọ. Ntre ke ini Saul akakade ndikụt Samuel ke Ramah, Samuel ama ọtọhọ enye aran ke ibuot onyụn̄ anam enye edi edidem.

Ekem Samuel ama okot kpukpru nditọ Israel ete ẹdi yak iwụt mmọ obufa edidem mmọ. Edi owo ikekwe Saul. Ndi ọmọdiọn̄ọ se ikanam owo okûkụt enye? Enye ekedịbe ke otu mbiomo. Ke ini ẹkekụtde enye, ẹma ẹnam enye ẹdida ke ufọt otuowo. Saul ama eye tutu, onyụn̄ ọniọn̄ akan kpukpru owo. Samuel ama ọdọhọ ete: ‘Ẹse owo emi Jehovah emekde mi.’ Mmọ ẹma ẹfiori ẹte: ‘Yak itọn̄ uwem ọsọn̄ edidem!’

Ke nsonso oro, Edidem Saul ama esikop uyo Samuel onyụn̄ anam se Jehovah ọdọhọde. Edi enye ama okpụhọde nte ini akakade. Ke uwụtn̄kpọ, ikanaha enye esiwa uwa. Enyene isan̄ kiet emi Samuel ọkọdọhọde yak enye ada ebet imọ idiwa uwa, edi Samuel ikọsọpke idi. Ntre Saul ama emen uwa oro awa. Nso ke Samuel akanam? Samuel ama edidọhọ enye ete: ‘Ikpakanaha ọsọn̄ ibuot ye Jehovah.’ Ndi Saul ama ekpep n̄kpọ oto se iketịbede oro?

Nte ini akakade, Saul ama aka ekọn̄ ye mbon Amalek, ndien Samuel ama ọdọhọ enye owot kpukpru mmọ. Edi Saul ikamaha  ndiwot Agag, edidem Amalek. Jehovah ama ọdọhọ Samuel ete: ‘Saul ọkpọn̄ mi inyụn̄ imaha ndinam se ndọhọde.’ Esịt ikenemke Samuel. Enye ama ọdọhọ Saul ete: ‘Jehovah ọmọn̄ emek edidem en̄wen sia afo mûmaha ndikop uyo esie aba.’ Ke ini Samuel ọkọwọn̄ọrede iso oyom ndidaha, Saul ama omụm isọn̄ ọfọn̄ Samuel, ndien ọfọn̄ Samuel ama awaha. Samuel ama ọdọhọ enye ete: ‘Jehovah amawai ubọn̄ Israel osio fi ke ubọk.’ Jehovah eyemen ubọn̄ oro ọnọ owo emi edimade enye inyụn̄ ikop uyo esie.

“N̄kopuyo ọfọn akan uwa.”—1 Samuel 15:22