Ke David ama okowot Goliath, Edidem Saul ama emek David etubom ekọn̄. David ama an̄wana ediwak ekọn̄ akan, ndien oro ama anam ediwak owo ẹma enye. Ekesidi David ama ọnyọn̄ ekọn̄ edi, iban ẹwọrọ ẹdinek unek ẹnyụn̄ ẹkwọ ẹte: ‘Saul owot mme tọsịn, edi David owot mme tọsịn ke itie duop!’ Saul ama ọtọn̄ọ ndifịbe David onyụn̄ oyom ndiwot enye.

David ama ọdiọn̄ọ ndibre harp ata etieti. Usen kiet ke ini David osụk ebrede harp ọnọ Saul, Saul ama otop eduat oyom ndikịm enye n̄wot. David ama efep, ndien eduat oro ama okowụhọ ke ibibene. Saul ama afiak odomo ediwak ini ndiwot David. Ke akpatre, David ama efehe ekedịbe ke desat.

Saul ama emen mbonekọn̄ 3,000 asan̄a oyom David. Enye ama okodụk abaitiat emi David ye ikọt David ẹkedịbede. Ikọt  David ẹma ẹsịn enye inua ke utọn̄ ẹte: ‘Saul adia edidụk fi ubọk mfịn, wot enye.’ David ama ọn̄wọn ekesịbe utọn̄ ọfọn̄ Saul, Saul idiọn̄ọke. Ekem esịt ama afịna David sia oro okowụt ke enye ikponoke edidem emi Jehovah ekemekde. David ikayakke ikọt esie ẹwot Saul. Ke Saul ama ọkọwọrọ ke abaitiat oro edi, David ama ada okot Saul ọdọhọ enye ke imọ ikpokowot enye, edi ke imọ ikamaha ndiwot enye. Ndi oro ama anam Saul etre ndibịne David?

Ihih. Saul ama aka iso asan̄a oyom David ndiwot. Okoneyo usen kiet, David ye Abishai eyen eyeneka esie ẹma ẹn̄wọn ẹdụk itie emi Saul ye mbonekọn̄ esie ẹkenade ẹde. Abner emi ekekpemede Edidem Saul ama ede n̄ko. Abishai ama ọdọhọ ete: ‘Imenyene enye ndien! Yak n̄wot enye.’ Edi David ama ọdọhọ enye ete: ‘Jehovah edisio Saul usiene. Yak imen eduat ye aban̄ mmọn̄ esie inyọn̄.’

David ama ọdọk obot kiet emi asakde iso ese ebiet emi Saul akanade akada ofiori ete: ‘Abner, ntak emi mûkukpemeke edidem fo? Aban̄ mmọn̄ Saul ye eduat esie ẹdu m̀mọ̀n̄?’ Saul ama ada ọdiọn̄ọ uyo David onyụn̄ ọdọhọ ete: ‘Okpokowot mi, edi ukûmaha ndiwot. Mmọdiọn̄ọ ke afo edidi ọyọhọ edidem iba ke Israel.’ Saul ama afiak ọnyọn̄ ufọk esie. Edi idịghe kpukpru owo ke ubon Saul ẹkesua David.

“Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo. Ẹkûsio usiene ẹnọ idem mbufo, ndima, edi ẹyak ufan̄ ẹnọ iyatesịt Abasi.”—Rome 12:18, 19