David ama edi edidem ke Saul ama akakpa. Enye ekedi isua 30 ini oro. Ke enye ama akakara isua ifan̄, enye ama odoro ke enyọn̄ ufọk esie mbubreyo usen kiet okụt ediye an̄wan kiet. Ẹma ẹdọhọ David ke enye ekere Bath-sheba, ke ebe esie ekere Uriah onyụn̄ edi owoekọn̄. David ama ọdọhọ ẹmen Bath-sheba ẹdi ufọk ubọn̄ imọ. David ama adan̄ ye Bath-sheba, enye ama onyụn̄ oyomo. David ama odomo ndidịp idiọkn̄kpọ oro. Ntre enye ama ọdọhọ etubom ekọn̄ esie ete osio Uriah esịn ke iso ekọn̄ onyụn̄ anam mbonekọn̄ ẹsịk ẹfiak edem ẹkpọn̄ Uriah. Ẹma ẹwot Uriah ke ekọn̄, ndien David ama emen Bath-sheba ọdọ.

Jehovah ama okụt kpukpru se iketịbede oro. Nso ke enye akanam? Enye ama ọdọn̄ prọfet Nathan aka ebịne David. Nathan ama ọdọhọ David ete: ‘Imọ owo kiet odu emi enyenede ediwak erọn̄, ye ubuene emi enyenede ekpri eyenerọn̄ kiet kpọt emi enye amade etieti. Imọ owo oro ama ekemen erọn̄ kiet oro ubuene oro ekenyenede do.’ N̄kpọ oro ama ayat David tutu enye ọdọhọ ete: ‘Ana ẹwot imọ owo oro!’ Nathan ama ọdọhọ David ndien ete: ‘Afo edi imọ owo oro!’ David ama ofụhọ etieti onyụn̄ ọdọhọ Nathan ete: ‘Mmedue Jehovah.’ Idiọkn̄kpọ oro ama ada ediwak afanikọn̄ ọsọk David ye ubon esie. Jehovah ama otụnọ David, edi enye ikowotke David sia David ama etịn̄ akpanikọ onyụn̄ osụhọde idem.

David ama oyom ndibọp temple nnọ Jehovah, edi Jehovah ọkọdọhọ ke Solomon eyen esie edibọp. David ama ọtọn̄ọ nditịm  n̄kpọ mbon nnọ Solomon. Enye ama ọdọhọ ete: ‘Ana temple Jehovah enen̄ede eye onyụn̄ enyene uten̄e. Solomon osụk edi eyenọwọn̄, ntre mmọn̄ ntịm n̄kpọ mbon nnọ enye.’ David ama ọnọ ediwak okụk esie man ẹda ẹbọp temple oro. Enye ama oyom nti mbonutom, obon gold ye silver, onyụn̄ anam ẹmen eto cedar ẹto Tyre ye Sidon ẹdi. Ke ini David ekekperede ndikpa, enye ama ọnọ Solomon mbuwed temple oro onyụn̄ ọdọhọ ete: ‘Jehovah ọkọdọhọ mi n̄wed nte ufọk oro editiede nnọ fi. Jehovah ayan̄wam fi. Kûfehe ndịk. Nyene uko nam utom oro.’

“Owo eke edịpde idiọkn̄kpọ esie idikwe unen, edi owo eke ayararede onyụn̄ ọkpọn̄de mmọ, ẹyetua enye mbọm.”—Mme N̄ke 28:13