Be ka se isịnede

Be ka se isịnede

Mme Ntiense Jehovah

Mek usem Efịk

 UKPEPN̄KPỌ 38

Jehovah Ọnọ Samson Odudu

Jehovah Ọnọ Samson Odudu

Nditọ Israel ẹma ẹfiak ẹkekpono nsunsu abasi, ntre Jehovah ama ayak mbon Philistia ẹfịk mmọ. Edi ndusụk nditọ Israel, utọ nte Manoah, ẹkesụk ẹmama Jehovah. Enye ye n̄wan esie ikenyeneke eyen. Usen kiet Jehovah ama ọdọn̄ angel aka ebịne n̄wan Manoah ọkọdọhọ enye ete: ‘Afo ayaman eyen erenowo. Enye edinyan̄a Israel isio ke ubọk mbon Philistia. Enye edidi Nazirite.’ Ndi ọmọdiọn̄ọ mbon emi ẹkesikotde Nazirite? Mmọ ẹkedi san̄asan̄a isụn̄utom Abasi. Ikanaha mmọ ẹfat idet mmọ.

Ekem n̄wan Manoah ama aman eyen erenowo, ndien Manoah ama osio eyen oro Samson. Ke Samson ama okokpon, Jehovah ama anam enye enen̄ede enyene odudu. Enye ama akam ada ubọk owot ekpe. Odu ini emi enye ikpọn̄ okowotde mbon Philistia 30. Mbon Philistia ẹma ẹsua enye ẹnyụn̄ ẹyom usụn̄ ndiwot enye. Usen kiet ke ini Samson okosụk edede idap ke Gaza, mbon Gaza ẹma ẹwọrọ ẹkebet ke inuaotop obio man ẹmụm enye ẹwot eyo ama esiere. Edi Samson ama adaha ada ufọt okoneyo okowụbede usụn̄ inuaotop obio oro obiom ke afara ọdọk enyọn̄ obot kiet emi ekekperede Hebron!

Ekem mbon Philistia ẹma ẹka ẹbịne n̄wan kiet emi Samson akanamde ufan. Enye ekekere Delilah. Mmọ ẹma ẹdọhọ enye ẹte: ‘Nnyịn owo kiet kiet iyọnọ fi mbak silver 1,100 edieke anamde nnyịn idiọn̄ọ se inamde Samson enyene odudu ntem. Iyom ndimụm enye n̄kọkọbi.’ Delilah ama enyịme ke ntak okụk oro. Ke nsonso oro, Samson ikamaha ndidọhọ enye se inamde imọ inyene odudu ntre. Edi enye ama eyịre Samson tutu uwem odorode Samson. Samson ama ọdọhọ enye ke akpatre ete: ‘Owo ifatke mi idet tọn̄ọ n̄kamana, sia ndi Nazirite. Ẹkpefat mi idet, ndinyeneke odudu aba.’ Ndi ukereke ke Samson ama anam ndudue ke ndiketịn̄ n̄kpọ oro nnọ Delilah?

 Delilah ama ọsọsọp eketịn̄ ọnọ mbon Philistia ete: ‘Mmọdiọn̄ọ ndien se inamde enye enyene odudu!’ Enye ama anam Samson ana ke ifụhi esie ede, anam owo edifat enye idet, ekem ofiori ete: ‘Samson, mbon Philistia ẹdi-o!’ Samson ama edemede, edi enye ikenyeneke odudu aba. Ẹma ẹmụm enye ẹtịbi enyịn ẹnyụn̄ ẹmen enye ẹkesịn ke ufọk-n̄kpọkọbi.

Usen kiet ediwak tọsịn mbon Philistia ẹma ẹsop idem ke temple abasi mmọ emi ekekerede Dagon, ẹfiori ẹte: ‘Abasi nnyịn anam imụm Samson! Ẹsio Samson ẹdi! Ẹnam enye edida mi osio ndyọ ọnọ nnyịn.’ Mmọ ẹma ẹnam enye edida ke ufọt adaha iba, ẹnyụn̄ ẹkama enye ẹtọ ndọk. Ini emi, idet esie ama afiak ọniọn̄. Samson ama ọbọn̄ akam ọnọ Jehovah ete: ‘O Jehovah, mbọk fiak nọ mi odudu ini kiet emi kpọt.’ Enye ama osio ofụri odudu esie onụk adaha temple oro. Ufọk oro ama owụre owot kpukpru owo ke esịt, onyụn̄ owot Samson n̄ko.

“Mmenyene ukeme ndinam kpukpru n̄kpọ ebe ke enye emi ọnọde mi odudu.” —Philippi 4:13