Ke ini akan̄ okodude ke Israel, n̄wan kiet emi ekekerede Naomi ama etiene ebe esie ye nditọ mmọ mbiba okodụn̄ ke Moab. Nte ini akakade, ebe esie ama akpa. Nditọ esie ẹma ẹdọ iban Moab emi ẹkekerede Ruth ye Orpah. Edi aka ko, nditọ esie oro ẹma ẹkpan̄a n̄ko.

Naomi ama ebiere ndifiak nnyọn̄ Israel ke ini okopde ke akan̄ idụhe aba do. Ruth ye Orpah ẹma ẹtiene enye, edi nte mmọ ẹkade ke usụn̄, Naomi ama ọdọhọ mmọ ete: ‘Mbufo ẹma ẹfọn ye nditọ mi ẹnyụn̄ ẹfọn ye ami n̄ko. Nyom mbufo ẹfiak ẹdọ ebe. Ẹfiak ẹnyọn̄ Moab.’ Mmọ ẹma ẹdọhọ ẹte: ‘Imama fi! Nnyịn iyomke ndikpọn̄ fi.’ Edi Naomi ama aka iso akpak mmọ ete ẹnyọn̄ọ. Orpah ama afiak ọnyọn̄, edi Ruth ikamaha ndinyọn̄. Naomi ama ọdọhọ Ruth ete: ‘Orpah ọnyọn̄ ebịne mbon obio mbufo ye mme abasi mbufo. Tiene enye nyọn̄.’ Edi Ruth ama ọdọhọ enye ete: ‘Ndikpọn̄ke fi. Orụk fo eyedi orụk mi, Abasi fo oyonyụn̄ edi Abasi mi.’ Ekere ke eketie Naomi didie ndikop Ruth etịn̄de utọ ikọ oro?

Ruth ye Naomi ẹma ẹdisịm Israel ke ntọn̄ọ ntọn̄ọ ini ukpen̄e barley. Usen kiet, Ruth ama aka ndisan̄a ntan̄ nsụhọ barley ke in̄wan̄ Boaz eyen Rahab. Ẹma ẹtịn̄ ẹnọ Boaz ke Ruth edi owo Moab emi mîkọkpọn̄ke Naomi. Ntre Boaz ama ọdọhọ mbonutom esie ete ẹbe ẹkpọn̄ ndusụk barley ẹnọ Ruth atan̄.

 Mbubreyo usen oro, Naomi ama obụp Ruth ete: ‘In̄wan̄ anie ke akaka mfịn?’ Ruth ama ọbọrọ ete: ‘In̄wan̄ ete kiet emi ekerede Boaz.’ Naomi ama ọdọhọ ete: ‘Boaz edi owo mme ebe mi. Sika katan̄ nsụhọ ke in̄wan̄ esie ye nditọiban eken. N̄kpọ idinamke fi do.’

Ruth ama esika in̄wan̄ Boaz tutu ini ukpen̄e okụre. Boaz ama okụt ke Ruth anam utom etieti onyụn̄ okụt ke enye edi ata eti an̄wan. Ini oro, ekesidi owo ama akpa ke ini n̄wan esie mîmanke eyen erenowo inọ enye, iman esie emen n̄wan esie ọdọ. Ntre Boaz ama emen Ruth ọdọ. Mmọ ẹma ẹnyene eyen emi ekekerede Obed; Obed ekedidi ete ete Edidem David. Esịt ama enem mme ufan Naomi tutu mmọ ẹdọhọ enye ẹte: ‘Jehovah ama ọnọnọ fi Ruth emi edide ata eti an̄wan, ndien idahaemi enye ọnọ fi eyeyen. Ekọm enyene Jehovah.’

“Odu ufan emi adianade owo akan eyeneka.”—Mme N̄ke 18:24