Mme owo ke ofụri Canaan ẹma ẹkop se iketịbede inọ Jericho. Ndidem mmọ ẹma ẹbiere ndidiana kiet n̄n̄wana ye nditọ Israel. Edi mbon Gibeon ikoyomke nditiene n̄n̄wana. Mmọ ẹma ẹsịne ntaha ọfọn̄ ẹdi ẹdidọhọ Joshua ẹte: ‘Nnyịn ito ata anyan usụn̄ idi. Imokop iban̄a Jehovah ye kpukpru se enye akanamde ọnọ mbufo ke Egypt ye ke Moab. Mbọk ẹn̄wọn̄ọ ke mbufo idiwotke nnyịn, ndien nnyịn iyedi mme asan̄autom mbufo.’

Joshua ama enịm ikọ mmọ, onyụn̄ ọn̄wọn̄ọ ke imọ idinamke mmọ n̄kpọ. Edi ke usen ita ebede, enye ama edidiọn̄ọ ke mmọ ikotoho anyan usụn̄ idi, ke ẹketo obio kiet do ke Canaan. Enye ama obụp mmọ ete: “Ntak emi mbufo ẹkebian̄ade nnyịn?” Mmọ ẹma ẹbọrọ ẹte: ‘Ndịk akanam nnyịn! Imọdiọn̄ọ ke Jehovah Abasi mbufo an̄wana ọnọ mbufo. Mbọk ẹkûwot nnyịn.’ Joshua ama anam se enye ọkọn̄wọn̄ọde, inyụn̄ iwotke mmọ.

Ibịghike, ndidem ition ke Canaan ye mbonekọn̄ mmọ ẹma ẹdi en̄wan ye mbon Gibeon. Joshua ye mbonekọn̄ esie ẹma  ẹsan̄a ofụri okoneyo ẹka ẹken̄wam mbon Gibeon. Mmọ ẹketọn̄ọ en̄wan tụhi-tụhi usenubọk edem usen oro. Mbon Canaan ẹma ẹfehe ntịme ntịme ẹsuana ẹdọn̄ọ kpukpru itie. Edi Jehovah ama anam edịm itiat edep ọtọ mmọ owot ke kpukpru itie oro. Ekem Joshua ama ọdọhọ Jehovah anam utịn atuak ada. Utịn ama atuak ada tutu nditọ Israel ẹkan kpukpru mmọ. Nso ikanam Joshua eben̄e Jehovah ete anam utịn atuak ada ke ini edide utọ n̄kpọ oro itịbeke akpa? Joshua ama ọbuọt idem ye Jehovah.

“Yak ikọ mbufo Ih edi Ih, Ihih mbufo edi Ihih; koro se ikande emi oto andidiọk.”—Matthew 5:37