Nte ini akakade, nditọ Israel ẹma ẹfiak ẹkpọn̄ Jehovah. Mbon Midian ẹma ẹsiyịp ufene mmọ ẹnyụn̄ ẹsibiat n̄kpọ in̄wan̄ mmọ ke ofụri isua itiaba. Mmọ ẹma ẹsidịbe ke abaitiat ye ke enyọn̄ obot mbak mbon Midian. Mmọ ẹma ẹkpe Jehovah ubọk ẹte an̄wam mmimọ. Ntre Jehovah ama ọdọn̄ angel esie aka ebịne owo kiet emi ekekerede Gideon ọkọdọhọ enye ete: ‘Jehovah emek fi ete edi ọkpọsọn̄ owoekọn̄.’ Gideon ama obụp enye ete: ‘Ndinam didie nnyan̄a Israel? Ami ndịghe n̄kpọ ndomokiet.’

Gideon edinam didie inịm ke Jehovah emek imọ? Enye ama ebri idet erọn̄ ke isọn̄ onyụn̄ ọdọhọ Jehovah ete: ‘N̄kpọn̄ usenubọk, edieke mbara edidude ke idet erọn̄ emi kpọt edi ofụri isọn̄ asat, nyada oro ndiọn̄ọ ke ami ke afo edida inyan̄a Israel.’ Se ikonyụn̄ itịbede edi oro ke eyo ama ekesiere. Ekem Gideon ama ọdọhọ ete: ‘N̄kpọn̄ usenubọk, yak idet erọn̄ oro asat, edi yak mbara ọyọhọ ke isọn̄.’ Ama onyụn̄ etịbe ntre; Gideon ama enịm ndien ke imọ ke Jehovah emek. Enye ama etịm udịmekọn̄ esie ndida n̄kan̄wana ye mbon Midian.

 Jehovah ama ọdọhọ Gideon ete: ‘Nyanam Israel ẹkan Midian. Edi mbufo ẹmekeme ndikere ke ntak emi ẹnyenede ediwak mbonekọn̄ anam mbufo ẹkan. Dọhọ yak owo ekededi emi okopde ndịk ọnyọn̄.’ Owo 22,000 ẹma ẹnyọn̄ọ, owo 10,000 ẹsụhọ. Jehovah ama afiak ọdọhọ ete: ‘Mmọ ẹsụk ẹwawak ẹkaha. Men mmọ ka ẹken̄wọn̄ mmọn̄ ke idịm. Sụk mbon emi edide ke ẹn̄wọn̄ ke ẹse m̀mê mme asua ke ẹdi, ẹditiene fi ika ekọn̄.’ Owo 300 kpọt ẹkenam ntre. Jehovah ama ọn̄wọn̄ọ ke owo 300 oro kpọt ẹdikan mbonekọn̄ Midian 135,000.

Jehovah ama ọdọhọ Gideon okoneyo oro ete: ‘Ka idahaoro kan̄wana ye mbon Midian!’ Gideon ama ọnọ mbonekọn̄ esie nnụk, onyụn̄ ọnọ mmọ ikpọ aban̄ ye nsadan̄ ikan̄ ke esịt. Enye ama ọdọhọ mmọ ete: ‘Ẹse mi, ẹnyụn̄ ẹnam se nnamde.’ Enye ama efri nnụk esie, obom aban̄, ofụn̄ nsadan̄ ikan̄, onyụn̄ ofiori ete: “Akan̄kan̄ Jehovah ye eke Gideon!” Owo 300 oro ẹma ẹnyụn̄ ẹnam ntre. Ndịk ama anam mbon Midian tutu mmọ ẹfehe ntịme ntịme. Ndutịme ama odu tutu mmọ ẹtọn̄ọ ndiwot kiet eken. Jehovah ama anam nditọ Israel ẹkan mme asua mmọ isan̄ emi n̄ko.

“Man odudu eke ebede ukeme owo okpoto Abasi, itoho nnyịn.” —2 Corinth 4:7