Be ka se isịnede

Be ka se isịnede

Mme Ntiense Jehovah

Mek usem Efịk

 UKPEPN̄KPỌ 25

Tent Utuakibuot

Tent Utuakibuot

Ke ini Moses okodude ke Obot Sinai, Jehovah ama ọdọhọ enye ọbọp san̄asan̄a tent emi nditọ Israel ẹdisikade ikatuak ibuot inọ imọ. Ẹkekot enye tent utuakibuot. Mmọ ẹma ẹsikeme ndikpọk tent oro mmen n̄ka itie ekededi emi mmọ ẹkade ke ini mmọ ẹkedude ke wilderness.

Jehovah ọkọdọhọ Moses ọdọhọ nditọ Israel ẹda se ededi emi mmọ ẹnyenede ẹdi man ẹda ẹbọp tent oro. Mmọ ẹma ẹnọ gold, silver, okpoho, mme ọsọn̄urua itiat, ye n̄kpọmbana, ẹnyụn̄ ẹnọ idet erọn̄, linen, ikpa unam, ye ediwak n̄kpọ eken. N̄kpọ ama awak tutu Moses ọdọhọ mmọ ete: ‘Ekem ndien! Ẹkûda n̄kpọ udi aba.’

Ediwak irenowo ye iban emi ẹkediọn̄ọde utom etieti ẹma ẹtiene ẹn̄wam ẹbọp tent oro. Jehovah ama ọnọ mmọ ifiọk ndida nnam utom oro. Ndusụk mmọ ẹkenam urụk emi ẹkedade ẹdọk ọfọn̄, ndusụk ẹdọdọk ọfọn̄, mîdịghe ẹnam fansi ẹdian ke ọfọn̄ oro. Mbon eken ẹkeda gold, eto, ye ọsọn̄urua itiat ẹnam nsio nsio n̄kpọ.

Nditọ Israel ẹkebọp tent oro nte Jehovah ọkọdọhọde. Mmọ ẹma ẹnam ediye ọfọn̄ ikpehe ẹda ẹbahade Edisana ye Ata Edisana ke tent oro. Ẹkenịm ekebe ediomi emi ẹkedade eto acacia ye gold ẹnam ke Ata Edisana. Itie ufọp incense, okpokoro, ye uwụk utuenikan̄ emi ẹkedade gold ẹnam ẹkedu ke Edisana. Akamba itieuwa ye besịn emi ẹkedade okpoho ẹnam ẹma ẹdu ke okụre tent  oro. Ekebe ediomi oro ama eti nditọ Israel ke mmọ ẹma ẹn̄wọn̄ọ ndikop uyo Jehovah. Ndi ọmọdiọn̄ọ se ediomi edide? Ediomi edi san̄asan̄a un̄wọn̄ọ.

Jehovah ama emek Aaron ye nditọ esie ete ẹnam utom nte mme oku ke tent oro. Akana mmọ ẹse ẹban̄a tent oro ẹnyụn̄ ẹwa uwa do ẹnọ Jehovah. Aaron ekedi Akwa Oku, enye kpọt ẹkesidụk Ata Edisana. Ini kiet ke isua ke enye ekesida iyịp unam emi enye awade aban̄a idiọkn̄kpọ esie, eke ubon esie, ye eke ofụri Israel odụk do.

Akpa isua emi nditọ Israel ẹkekpọn̄de Egypt ke mmọ ẹkebọp tent utuakibuot oro. Mmọ ẹma ẹnyene itie ndituak ibuot nnọ Jehovah ndien.

Jehovah ama anam obubịt enyọn̄ ofụk tent oro man owụt ke imama tent oro. Adan̄a nte obubịt enyọn̄ oro osụk odude ke enyọn̄ tent utuakibuot oro, nditọ Israel ikesidahake isan̄. Edi ke ini obubịt enyọn̄ oro adahade, mmọ ẹyeda oro ẹdiọn̄ọ ke ekem ini mmọ nditọn̄ọ isan̄. Mmọ ẹyekpọk tent utuakibuot oro ẹmen ẹdaha ẹtiene obubịt enyọn̄ oro.

“Ndien n̄kop ọkpọsọn̄ uyo emi otode ebekpo nte ọdọhọde ete: ‘Sese! Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ.’”—Ediyarade 21:3