Nte ini akakade, Korah, Dathan, Abiram, ye owo 250 ẹma ẹsọn̄ ibuot ye Moses ye Aaron ke wilderness. Mmọ ẹma ẹdọhọ Moses ye Aaron ẹte: ‘Ekem ndien! Nso inam afo edi adausụn̄ nnyịn, Aaron edi akwa oku? Jehovah odu ye kpukpru nnyịn, idịghe ye mbufo mbiba kpọt.’ N̄kpọ oro ama ayat Jehovah. Enye akada nte ke mmọ ẹsọn̄ ibuot ye imọ!

Moses ama ọdọhọ Korah ye mbon oro ẹkedade ye Korah ete: ‘Ẹdi tent utuakibuot n̄kpọn̄. Ẹda n̄kpọ ufọp incense mbufo ẹdi ẹnyụn̄ ẹdori incense ke esịt esie. Jehovah oyowụt nnyịn owo emi enye emekde.’

Edem usen oro, Korah ye owo 250 oro ẹma ẹka ẹbịne Moses ke tent utuakibuot. Mmọ ẹma ẹkefọp incense do nte mme oku. Jehovah ama ọdọhọ Moses ye Aaron ete: ‘Ẹdian̄ade ẹkpọn̄ Korah ye mbon emi ẹdade ye enye.’

Kpa ye emi Korah akakade ebịne Moses ke tent utuakibuot, Dathan ye Abiram ye mbonubon mmọ ikamaha nditiene n̄ka. Jehovah ama ọdọhọ nditọ Israel ẹdian̄ade ẹkpọn̄ tent Korah,  Dathan, ye Abiram. Nditọ Israel ẹma ẹsọsọp ẹkpọn̄ do. Dathan ye Abiram ye mbonubon mmọ ẹma ẹwọrọ ẹda ke iso tent mmọ. Isọn̄ ama asiaha emen mmọ emen inikiet inikiet! Ikan̄ ama onyụn̄ oto heaven edita Korah ye owo 250 emi ẹkedade ye enye ke tent utuakibuot.

Ekem Jehovah ama ọdọhọ Moses ete: ‘Bọ mbọn̄ mme esien nditọ Israel esan̄ kiet kiet, nyụn̄ wet enyịn̄ mmọ ke esan̄ mmọ. Edi wet enyịn̄ Aaron ke esan̄ esien Levi. Dọn̄ esan̄ oro ke tent utuakibuot; flawa eyetịbe ke esan̄ owo emi mmekde.’

Edem usen oro, Moses ama okosion̄o kpukpru esan̄ oro ediwụt mbọn̄ nditọ Israel. Flawa ama etịbe ke esan̄ Aaron, esan̄ oro onyụn̄ on̄wụm mfri almond emi adatde. Jehovah ama ada oro anam mmọ ẹfiọk ke Aaron ke imọ imek edi akwa oku.

“Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot ẹnọ mmọ.” —Mme Hebrew 13:17