Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 21

Ọyọhọ Ufen Duop

Ọyọhọ Ufen Duop

Moses ama ọdọhọ Pharaoh ke imọ ididịghe idikụt enye aba. Edi mbemiso Moses ọnyọn̄de, enye ama ọdọhọ Pharaoh ete: ‘Ufọt okoneyo emi, kpukpru akpan ke Egypt ẹyekpan̄a, ọtọn̄ọde ke akpan Pharaoh tutu esịm akpan ifịn.’

Jehovah ama ọdọhọ nditọ Israel ẹdia san̄asan̄a udia. Enye ọkọdọhọ ete: ‘Ẹwot eyenerọn̄ m̀mê eyen ebot isua kiet, emi edide ayara, ẹnyụn̄ ẹsịme iyịp esie ke obubọk enyịnusụn̄ mbufo. Ẹfọp enye ke ikan̄ ẹnyụn̄ ẹta enye ye uyo eke leaven mîdụhe. Ẹsịne ọfọn̄ ye ikpaukot ẹben̄e idem ndiwọrọ. Mmọn̄ nsio mbufo ke ufụn okoneyo emi.’ Ndi ọmọdiọn̄ọ adan̄a nte esịt ekenemde nditọ Israel?

Ufọt okoneyo oro, angel Jehovah ama asan̄a ke Egypt owot kpukpru akpan ke ufọk ekededi emi owo mîkesịmeke iyịp ke obubọk enyịnusụn̄. Edi enye ama ebe ọkpọn̄ ufọk ekededi emi ẹsịmede iyịp. Kpukpru akpan ke ufọk nditọ Egypt ẹma ẹkpan̄a, edide ufọk imọ owo m̀mê ubuene. Edi akpan ndomokiet ikakpaha ke ufọk nditọ Israel.

Akpan Pharaoh ama etiene akpa. Ufen enye emi ama enen̄ede odụk Pharaoh idem. Enye ama ọsọsọp ọdọhọ Moses ye Aaron ete: ‘Ẹnyọn̄ọ  ndien. Ẹwọn̄ọ mi ẹnyọn̄ọ. Ẹka ẹkekpono Abasi mbufo. Ẹtan̄ ufene mbufo ẹnyọn̄ọ!’

Nditọ Israel ẹkewọrọ ke Egypt ke ini emi ọfiọn̄ ọyọhọde idịbi. Mmọ ẹkesan̄a ke ubon ke ubon ye ke esien ke esien. Mmọ ẹkedi irenowo 600,000 ye ediwak iban ye nditọwọn̄. Ediwak owo ẹma ẹtiene nditọ Israel ẹwọrọ man ẹketiene ẹtuak ibuot ẹnọ Jehovah. Nditọ Israel ẹma ẹwọrọ ke ufụn ndien!

Akana mmọ ẹsidia san̄asan̄a udia oro kpukpru isua man ẹda ẹti nte Jehovah akanyan̄ade mmọ. Ẹkekot enye Passover, emi ọwọrọde “be kpọn̄.”

“Kpa ntak emi akanam mi nyak fi aka iso odu, man n̄kpada fi n̄wụt odudu mi, man ẹkpenyụn̄ ẹtan̄a enyịn̄ mi ke ofụri isọn̄.”—Rome 9:17