Ete kiet emi okokponode Jehovah ama odu ke obio Uz. Enye ekekere Job. Enye ama enyene n̄kpọ etieti onyụn̄ enyene ediwak nditọ. Enye ama esifọn uwem tutu, esinyụn̄ an̄wam mme ubuene, mme ebeakpa, ye nditọakpa. Ndi emekere ke sia Job ekesinamde nti n̄kpọ ke enye idinyeneke mfịna ndomokiet?

Satan ke ekese Job, edi Job ikọdiọn̄ọke. Jehovah ama ọdọhọ Satan ete: ‘Ndi omokụt Job asan̄autom mi? Idụhe owo ndomokiet ke isọn̄, emi ebietde enye. Enye esikop uyo mi onyụn̄ anam se inende.’ Satan ama ọdọhọ Jehovah ete: ‘Ntre ke edi! N̄kọ afo esikpeme enye onyụn̄ ọdiọn̄ enye. Ọmọnọ enye isọn̄ ye ediwak ufene. Ọkpọbọ enye, enye idikponoke fi aba.’ Jehovah ama ọdọhọ enye ete: ‘Emekeme ndidomo enye nse. Edi kûwot enye.’ Nso ikanam Jehovah ayak Satan odomo Job? Jehovah ama enen̄ede ọdiọn̄ọ ke Job idikpọn̄ke imọ.

Satan ama anam ediwak afanikọn̄ esịm Job. Akpa, enye ama anam mbon Sheba ẹyịp enan̄ ye ass Job. Ekem ikan̄ ama ata kpukpru erọn̄ Job owot. Mbon Chaldea n̄ko ẹma ẹyịp mme camel Job. Ẹma ẹwot mbon emi ẹkekpemede mme ufene oro. Edi enyene ndiọkn̄kan n̄kpọ emi eketịbede ọnọ Job. Ufọk emi nditọ esie ẹkedọn̄ọde ẹdia usọrọ ama ọduọ ọtọ kpukpru mmọ owot. Job ama ofụhọ ata etieti, edi enye ikọkpọn̄ke Jehovah.

Oro ikekemke Satan! Enye ama anam idiọk mbufụt ọyọhọ Job idem. Ubiak ikedịghe ekpri. Job ikọdiọn̄ọke se  inamde kpukpru oro ọwọrọ enye. Edi enye ikọkpọn̄ke Jehovah. Abasi ama okụt emi onyụn̄ enem esịt etieti ye Job.

Ekem Satan ama ada iren ita odomo Job. Mmọ ẹma ẹdọhọ ke anaedi enye ama edịbe anam idiọkn̄kpọ, ke Abasi amia enye ufen. Job ama ọdọhọ ete: ‘Nnamke idiọkn̄kpọ ndomokiet.’ Edi enye ama ọtọn̄ọ ndikere ke Jehovah anam afanikọn̄ esịm imọ, onyụn̄ ọdọhọ ke Jehovah inamke ọfọn.

Akparawa kiet emi ekekerede Elihu ama akpan̄ utọn̄ okop se mmọ ẹtịn̄de. Ke mmọ ẹma ẹketịn̄ ẹma, enye ama ọdọhọ ete: ‘Se kpukpru mbufo ẹtịn̄de inenke. Nnyịn ikemeke ndifiọk kpukpru n̄kpọ mban̄a Jehovah. Enye ikemeke ndinam idiọkn̄kpọ ndomokiet. Enye esikụt kpukpru n̄kpọ esinyụn̄ an̄wam mme owo ke ini mmọ ẹnyenede mfịna.’

Ekem Jehovah ama edidọhọ Job ete: ‘Afo okodu ke m̀mọ̀n̄ ke ini n̄kobotde enyọn̄ ye isọn̄? Nso inam ọdọhọ ke nnamke se inende? Afo eketịn̄ ikọ ke ini mûdiọn̄ọke ntak emi n̄kpọ etịbede.’ Job ama okụt ke imọ imedue, onyụn̄ ọdọhọ ete: ‘Se n̄ketịn̄de ikenenke. N̄kokokop mban̄a fi, edi idahaemi mmenen̄ede mfiọk fi. Idụhe se mûkemeke ndinam. Mbọk fen nọ mi.’

Ke idomo oro ama ekebe, Jehovah ama anam idem ọsọn̄ Job onyụn̄ anam enye enyene n̄kpọ akan akpa. Job ama odu uwem ebịghi onyụn̄ okop inemesịt. Jehovah ama ọdiọn̄ Job ke ndikokop uyo esie kpa ye oro mîkememke inọ enye. Ndi afo ayaka iso okpono Jehovah ukem nte Job, ọkpọkọm nso itịbe?

“Mbufo ẹmekop nte Job ọkọyọde ukụt, ẹmenyụn̄ ẹkụt utịp oro Jehovah ọkọnọde enye.”—James 5:11