Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 100

Paul ye Timothy

Paul ye Timothy

Timothy ekedi ekpri akparawa kiet ke esop Lystra. Ete esie ekedi Greek, eka edi Jew. Eunice eka esie ye Lois eka eka esie ẹma ẹkpep enye n̄kpọ eban̄a Jehovah toto ke ata ekpri.

Ini Paul esịmde Lystra ọyọhọ ikaba emi enye afiakde ọtọn̄ọ ndisan̄a n̄kwọrọ ikọ, enye ama okokụt Timothy onyụn̄ okụt ke enye ama nditọete etieti onyụn̄ ama ndinam n̄kpọ nnọ mmọ. Paul ama ọdọhọ Timothy etiene imọ asan̄a ọkwọrọ ikọ. Nte mmọ ẹsụk ẹsan̄ade ẹkwọrọ ikọ, Paul ama ekpep Timothy ndinen̄ede n̄kwọrọ ikọ nnyụn̄ n̄kpep mme owo n̄kpọ ọfọn.

Edisana spirit ama esin̄wam Paul ye Timothy ke ebiet ekededi emi mmọ ẹkade. Okoneyo usen kiet, Paul ama okụt ke n̄kukụt nte owo ọdọhọde enye edi Macedonia edin̄wam mmimọ. Ntre Paul, Timothy, Silas, ye Luke ẹma ẹkekwọrọ ikọ do ẹnyụn̄ ẹsiak nsio nsio esop.

Ata ediwak irenowo ye iban ke Thessalonica ke Macedonia ẹma ẹkabade ẹdi Christian. Edi ndusụk mme Jew ikenemke esịt ye Paul ye mbon emi ẹkesan̄ade ye enye. Mmọ ẹma ẹda mbon ntịme ẹdian idem ẹnyụn̄ ẹdụri nditọete ẹbịne mme andikara; ẹnanam mi ke ẹfiori ẹte: ‘Ẹse mbon emi mîmaha ukara Rome mi!’ Emi ama anam Paul ye Timothy ẹwọrọ okoneyo okoneyo ẹka Beroea mbak owo idinam mmọ n̄kpọ.

Mbon Beroea ẹma ẹma ikọ Abasi etieti; mme Jew ye mme Greek do ẹma ẹkabade ẹdi mbet Jesus. Edi ndusụk mme Jew ẹma ẹto Thessalonica ẹditọn̄ọ ntịme, ntre Paul ama ọkpọn̄ do aka Athens. Timothy ye Silas ẹma ẹsụhọde ẹtie ke Beroea ẹsọn̄ọ nditọete idem. Nte ini akakade, Paul ama ọdọhọ Timothy afiak aka Thessalonica akan̄wam nditọete do ẹyọ ọkpọsọn̄ ukọbọ.  Ekem, Paul ama ọdọhọ enye asan̄a ese mme esop onyụn̄ ọsọn̄ọ mmọ idem.

Paul ama ọdọhọ Timothy ete: ‘Ẹyekọbọ owo ekededi emi oyomde ndinam n̄kpọ Jehovah.’ Ẹma ẹkọbọ Timothy ẹnyụn̄ ẹsịn enye ke ufọk-n̄kpọkọbi ke ntak n̄kpọ Abasi. Edi esịt ekenenem enye sia enye ama ekeme ndiwụt ke imọ ida ye Jehovah.

Paul ama ọdọhọ mbon Philippi ete: ‘Ke ndọhọ Timothy edi ebịne mbufo. Enye eyekpep mbufo nte ikọt Jehovah ẹkpedude uwem ye nte ẹkpekwọrọde ikọ.’ Paul ama enịm ke Timothy edinam nnennen n̄kpọ. Mmọ mbiba ẹma ẹdiana kiet ẹnam utom Abasi ke ata ediwak isua nte mme ufan.

“Nnyeneke owo en̄wen eke enyenede edu emi ebietde esie, emi editịmde ese aban̄a mme n̄kpọ oro ẹban̄ade mbufo. Koro kpukpru owo eken ẹyom ufọn idemmọ, idịghe eke Jesus Christ.”—Philippi 2:20, 21