Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 98

Ẹkwọrọ Ẹban̄a Christ ke Ediwak Idụt

Ẹkwọrọ Ẹban̄a Christ ke Ediwak Idụt

Mme apostle ẹma ẹnam ikọ Abasi ẹsịm ofụri itie ke ererimbot nte Jesus ọkọdọhọde. Ke isua 47 eyo mme apostle, nditọete ke Antioch ẹma ẹsio Paul ye Barnabas ẹdọn̄ ẹsan̄a ẹkwọrọ ikọ. Mmọ mbiba ẹma ẹsisịn idem ẹkwọrọ ikọ etieti. Mmọ ẹma ẹka nsio nsio obio ke ofụri Asia Minor, utọ nte Derbe, Lystra, ye Iconium, ẹkekwọrọ ikọ.

Paul ye Barnabas ẹkesikwọrọ ikọ ẹnọ kpukpru owo, n̄kpri ye ikpọ, imọ ye ubuene. Ediwak owo ẹma ẹdidiọn̄ọ Christ. Ini Paul ye Barnabas ẹkekwọrọde ikọ ẹnọ Sergius Paulus, emi akakarade Cyprus, abiaidiọn̄ kiet ama odomo ndibiat ukwọrọikọ mmọ. Paul ama ọdọhọ enye ete: ‘Yak Jehovah amia fi ufen.’ Ete oro ama oforo nnan kpa idahaoro. Emi ama anam andikara oro edi mbet.

Paul ye Barnabas ẹkesikwọrọ ikọ ke kpukpru itie, ke ufọk ke ufọk, ke urua, ke usụn̄, ye ke mme synagogue. Ini mmọ ẹkenamde mbụn̄ọ kiet ke Lystra asan̄a, mbon emi ẹkekụtde utịben̄kpọ oro ẹkekere ke mmọ ẹdi mme abasi ẹnyụn̄ ẹyom ndituak ibuot nnọ mmọ. Edi Paul ye Barnabas ẹma ẹkpan mmọ ẹnyụn̄ ẹdọhọ ẹte: ‘Ẹtuak ibuot ẹnọ Ata Abasi kpọt! Nnyịn idi owo nte mbufo.’ Ekem ndusụk mme Jew ẹma ẹdinam ẹtọn̄ọ ntịme ye Paul. Ẹma ẹtọn̄ọ Paul ke itiat ẹnyụn̄ ẹdụri enye ẹsio ke obio ẹkenịm ẹte akpa. Edi Paul ikakpaha! Nditọete ẹma ẹka ẹkeda enye ẹfiak ẹdụk esịt obio. Ekem, Paul ama ọkpọn̄ do afiak aka Antioch.

Ke isua 49 eyo mme apostle, Paul ama afiak ọtọn̄ọ ndisan̄a n̄kwọrọ ikọ. Enye ama afiak asan̄a ẹse nditọete ke Asia Minor kan̄a mbemiso ebede aka Europe. Enye ama aka Philippi, Thessalonica,  Athens, ye mme itie eken. Enye akasan̄a ye Silas, Luke, ye akparawa kiet emi ekekerede Timothy. Mmọ ẹma ẹkwọrọ ikọ, ẹsiak mbufa esop, ẹnyụn̄ ẹn̄wam mme esop oro ẹsọn̄ idem. Paul ama odu ke Corinth isua kiet ye ọfiọn̄ itiokiet ọsọn̄ọ nditọete idem. Enye ama ọkwọrọ ikọ, ekpep mme owo n̄kpọ, onyụn̄ ewet nsio nsio leta ọnọ ẹsọk ediwak esop. Enye ama esinam tent n̄ko. Nte ini akakade, Paul ama edisịm Ephesus onyụn̄ afiak edika Antioch.

Ekem ke isua 52 eyo mme apostle, Paul ama afiak ọtọn̄ọ ke Asia Minor asan̄a ọkwọrọ ikọ. Enye ama odu isua ifan̄ ke Ephesus ọkwọrọ ikọ, ekpep mme owo n̄kpọ, onyụn̄ an̄wam esop do. Enye ama esinyụn̄ ọkwọrọ ikọ ọnọ mme owo ke efe mbono ufọkn̄wed kiet do kpukpru usen. Ediwak owo ẹma ẹkpan̄ utọn̄ ẹnyụn̄ ẹkabade esịt. Ekem enye ama ọkwọrọ ikọ ekesịm Philippi onyụn̄ ọwọn̄ọde ekesịm Corinth. Ke Paul ama akasan̄a ọkwọrọ ikọ ke ediwak itie ama, enye ama edika Jerusalem.

“Mmọdo ẹka ẹkenam mme owo ke kpukpru idụt ẹdi mbet mi.”—Matthew 28:19