Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 89

Peter Akan̄ Jesus

Peter Akan̄ Jesus

Ke ini Jesus ye mme apostle ẹkedude ke ubet enyọn̄, Jesus ama ọdọhọ mmọ ẹte: ‘Kpukpru mbufo ẹyefehe ẹkpọn̄ mi okoneyo emi.’ Peter ama ọdọhọ ete: ‘Idịghe ami! Kpukpru mmọ ẹkpefefehe, ami ndifeheke tutu amama.’ Edi Jesus ama ọdọhọ enye ete: ‘Mbemiso ekikọ ọkpọk, afo ayakan̄ mi utịm ikata.’

Ediwak apostle ẹma ẹfehe ẹkpọn̄ Jesus ini mbonekọn̄ ẹmende enye ẹka ufọk Caiaphas. Edi Peter ye apostle kiet ẹma ẹtiene otuowo. Peter ama odụk okụre ufọk Caiaphas eketie ewebe ikan̄. Un̄wana ikan̄ oro ama anam ofụn an̄wan kiet do okụt enye iso. Enye ama ọdọhọ Peter ete: ‘Mmọdiọn̄ọ fi! Afo okodu ye Jesus!’

Peter ama ọdọhọ ete: ‘Idịghe ami! Ndiọn̄ọke se etịn̄de oro!’ Peter ama asan̄a aka n̄kan̄ inuaotop. Edi ofụn an̄wan en̄wen ama okụt enye, onyụn̄ ọdọhọ otuowo ete: ‘Ete emi okodu ye Jesus!’ Peter ama ọdọhọ ete: ‘Ndiọn̄ọke Jesus!’ Ete kiet do ama ọdọhọ ete: ‘Afo edi mbet esie! Uyo ikọ fo ke nda ndiọn̄ọ ke oto Galilee, ukem nte Jesus.’ Edi Peter ama ọn̄wọn̄ọ n̄kpọ ete ke imọ idiọn̄ọke Jesus.

Kpa idahaoro, ekikọ ama ọkpọk. Peter ama okụt nte Jesus ọwọn̄ọrede iso ese enye. Enye ama eti ikọ Jesus, onyụn̄ ọwọrọ an̄wa akatua idiọk idiọk.

Emi itetịn̄ mi, esop Sanhedrin ẹma ẹbono, ke ẹkpe ikpe Jesus ke esịt ufọk Caiaphas. Mmọ ẹma ẹbebiere ndiwot Jesus; idahaemi mmọ ẹkeyom se ẹdade ẹdori enye man ẹkeme ndiwot enye. Edi mmọ ikekwe n̄kpọ ndomokiet. Ke akpatre, Caiaphas ama obụp Jesus ete: ‘Ndi afo edi Eyen Abasi?’ Jesus ama ọdọhọ, ‘Ih.’ Caiaphas ama ọdọhọ ete: ‘Nso en̄wen ke iyom aba? Enye osụn̄i Abasi!’ Esop ẹma ẹdian uyo ẹdọhọ ẹte: ‘Enye odot n̄kpa.’ Mmọ ẹma ẹsiak Jesus ufia, ẹfiari enye etap, ẹbọp enye  enyịn, ẹtọ enye ita, ẹnyụn̄ ẹdọhọ enye ẹte: ‘Ekpedi edi prọfet, siak owo emi amiade fi ise!’

Ke eyo ama ekesiere, mmọ ẹma ẹmen Jesus ẹka ufọkesop Sanhedrin ẹkebụp enye ẹte: ‘Ndi afo edi Eyen Abasi?’ Jesus ama ọbọrọ ete: ‘Ẹmetetịn̄ ke ndi Eyen Abasi.’ Mmọ ẹma ẹdọhọ ke enye osụn̄i Abasi, ẹnyụn̄ ẹmen enye ẹka iso Pontius Pilate, emi mbon Rome ẹkemekde andikara. Nso ke ẹkenam enye do? Imọn̄ ikụt ke Ibuot 90.

“Ini . . . ededi ama, eke kpukpru mbufo ẹdisuanade ẹnyọn̄ọ ufọk mbufo, mbufo ẹyenyụn̄ ẹkpọn̄ mi ikpọn̄; edi ndidụhe ikpọn̄, koro Ete odude ye ami.”—John 16:32