Jesus ama osobo ye mbet esie ke Galilee, enye ama onyụn̄ ọdọn̄ mmọ ata akpan utom. Enye ọkọdọhọ ete: ‘Ẹka ẹkenam mme owo ke kpukpru idụt ẹdi mbet mi. Ẹkpep mmọ se n̄kekpepde mbufo, ẹnyụn̄ ẹnịm mmọ baptism.’ Enye ama ọdọhọ mmọ n̄ko ete: ‘Ẹkûfre ke nyodu ye mbufo kpukpru ini.’

Ke Jesus ama ekeset, enye ama ada usen 40 owụt ata ediwak mbet esie ke Galilee ye Jerusalem idem. Enye ama ekpep mmọ nsio nsio akpan n̄kpọ onyụn̄ anam ediwak utịben̄kpọ.

Ekem Jesus ama owụt mme apostle esie idem akpatre ini ke Obot Olive. Jesus ama ọdọdọhọ mmọ akpa ete: ‘Ẹkûkpọn̄ Jerusalem, edi ẹka iso ẹbet tutu Ete ọnọ se enye ọkọn̄wọn̄ọde.’ Edi sia ikọ esie mîkan̄wan̄ake mmọ, mmọ ẹma ẹbụp enye ẹte: ‘Ndi ọmọn̄ ọtọn̄ọ ukara ke Israel idahaemi?’ Enye ama ọdọhọ mmọ ẹte: ‘Idịghe idahaemi ke Jehovah oyom mi ndi Edidem. Ibịghike edisana spirit ọyọnọ mbufo odudu, mbufo ẹyenyụn̄ ẹdi ntiense mi. Ẹka ẹkekwọrọ ikọ ke Jerusalem, Judea, Samaria, ẹnyụn̄ ẹkwọrọ ikọ ẹsịm utịt ererimbot.’

Ke enye ama eketịn̄ ikọ ama, ẹma ẹmen enye ẹdọk tutu obubịt enyọn̄ ofụk enye. Mme mbet ẹma ẹka iso ẹse, edi ikekwe enye aba.

Mmọ ẹma ẹsụhọde ke Obot Olive ẹnyọn̄ Jerusalem. Mmọ ẹma ẹsisop idem ke ubet enyọn̄, ke ufọkenyọn̄ kiet do, ẹbọn̄ akam ẹnyụn̄ ẹbet Jesus eteme mmọ n̄kpọ en̄wen emi edin̄wamde mmọ ẹnam utom Abasi.

“Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matthew 24:14