Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 81

Jesus Ọkwọrọ Ikọ ke Obot

Jesus Ọkwọrọ Ikọ ke Obot

Ke Jesus ama ekemek apostle 12 ama, enye ama osụhọde ke obot edi itie emi ata ediwak owo ẹkedude. Mmọ ẹketo Galilee, Judea, Tyre, Sidon, Syria, ye edem Akpa Jordan ẹdi. Mmọ ẹma ẹda mbon emi ẹdọn̄ọde nsio nsio udọn̄ọ ye mbon emi demon ẹfịnade ẹdi. Jesus ama anam idem ọsọn̄ kpukpru mmọ. Ekem enye ama etie ke mben obot oro ọtọn̄ọ ndikwọrọ ikọ. Enye ama etịn̄ se ikpanamde man idi ufan Abasi. Ana idiọn̄ọ ke kpukpru nnyịn imoyom Abasi inyụn̄ ikpep ndima enye. Edieke nnyịn mîmaha mme owo, nnyịn idikemeke ndima Abasi. Ana ifọn uwem inyụn̄ inam n̄kpọ ye kpukpru owo ukem ukem, idem ye mbon emi mîmaha nnyịn.

Jesus ama ọdọhọ ete: ‘Kûma mbon emi ẹmade fi kpọt. Ana ama mbon emi ẹsuade fi n̄ko onyụn̄ esifen ọnọ owo ke ofụri esịt. Edieke owo ayatde esịt ye afo, sọsọp ka kekpe enye ubọk. Nam n̄kpọ ye mme owo nte oyomde mmọ ẹnam ye afo.’

 Jesus ama ọnọ mme owo nti item aban̄a n̄kpọ udu uwem n̄ko. Enye ọkọdọhọ ete: ‘Ọfọn owo ndidi ufan Jehovah akan ndinyene ediwak okụk. Inọ ekeme ndiyịp okụk fo, edi owo ndomokiet ikemeke ndinam Jehovah etre ndidi ufan fo. Tre nditịmede esịt mban̄a se edidiade, se edin̄wọn̄de, m̀mê se edisịnede. Se mme inuen. Abasi isitreke ndinam mmọ ẹnyene se ẹdiade. Editịmede esịt ididianke ọkpọkọm usen kiet ke isua uwem fo. Kûfre ke Jehovah ọdiọn̄ọ se afo enen̄erede oyom.’

Akananam mmọ ikokopke owo ọkwọrọde ikọ Abasi enem ntre. Mme scribe ye mme Pharisee ikesikpepke mmọ utọ nti n̄kpọ oro. Nso ikanam Jesus ọdiọn̄ọ ndikpep n̄kpọ ntre? Jehovah ekekpep Jesus kpukpru se Jesus ekesikpepde mme owo.

“Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo.”—Matthew 11:29