Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep N̄kpọ to Mbụk Bible

 UKPEPN̄KPỌ 78

Jesus Ọkwọrọ Aban̄a Obio Ubọn̄ Abasi

Jesus Ọkwọrọ Aban̄a Obio Ubọn̄ Abasi

Ikebịghike ke Jesus ama akana baptism, enye ama ọtọn̄ọ ndikwọrọ ete: ‘Obio Ubọn̄ Abasi ekpere.’ Mbet esie ẹma ẹsitiene enye ini enye asan̄ade ke ofụri Galilee ye Judea ọkwọrọ ikọ. Ke ini enye akafiakde edisịm Nazareth emi enye okotode, enye ama aka synagogue okokot itie n̄wed Isaiah emi ọdọhọde ete: ‘Jehovah ọnọ mi edisana spirit man n̄kwọrọ eti mbụk.’ Ikọ oro ọkọwọrọ ke kpa ye oro mme owo ẹkeyomde Jesus anam utịben̄kpọ, ke ata akpan ntak emi Jehovah ọkọnọde enye edisana spirit ekedi man enye ada ọkwọrọ eti mbụk. Ke enye ama okokot itie oro ama, enye ama ọdọhọ mbon emi ẹkedude do ete: ‘Prọfesi emi osu mfịn.’

Ekem Jesus ama aka Inyan̄ Galilee. Enye ama okokụt mme ọkọiyak inan̄ do—Peter, Andrew, James, ye John. Enye ama ọdọhọ mmọ ete: ‘Ẹtiene mi, nyanam mbufo ẹdi mme ọkọ owo.’ Mmọ ẹma ẹkpọn̄ ukọiyak inikiet inikiet ẹtiene enye, ẹnyụn̄ ẹkabade ẹdi mbet esie. Mmọ ẹma ẹsan̄a ke ofụri Galilee ẹkwọrọ ẹban̄a Obio Ubọn̄ Abasi—ke synagogue, ke urua, ye ke efak. Mme owo ẹma ẹsiyịre udịm ẹtiene mmọ. Jesus ama ọwọrọ etop etieti; etop esie ama esịm Syria.

Nte ini akakade, Jesus ama ọnọ ndusụk mbet esie odudu ndikọk udọn̄ọ nnyụn̄ mbịn mme demon. Mbon en̄wen n̄ko ẹma ẹsisan̄a ye enye ke ini enye akade ukwọrọikọ ke ikpọ ye n̄kpri obio. Ndusụk nti iban nte Mary Magdalene, Joanna, Susanna, ye mbon eken ẹma ẹsin̄wam Jesus ye mme mbet esie.

Jesus ama ekpep mbet esie ndikwọrọ ikọ, onyụn̄ ọdọn̄ mmọ ẹkekwọrọ. Nte mmọ ẹsan̄ade ke Galilee ẹkwọrọ ikọ, ediwak owo ẹma ẹkabade mbet Jesus ẹnyụn̄ ẹna baptism. Mbon emi ẹkeyomde ndidi mbet Jesus ẹma ẹwak tutu Jesus ọdọhọ ke mmọ ẹtie nte in̄wan̄ emi idọk okponde. Enye ama ọdọhọ ete: ‘Ẹben̄e Jehovah ẹte ọnọ mbonutom ẹdi.’ Nte ini akade, enye  ama emek owo 70 ke otu mbet esie, adian mmọ iba iba ete ẹkekwọrọ ikọ ke ofụri Judea. Mmọ ẹma ẹkpep kpukpru orụk owo ẹban̄a Obio Ubọn̄ Abasi. Ama enem mmọ tutu nditịn̄ se iketịbede nnọ Jesus ini mmọ ẹnyọn̄de ẹdi. Devil ikekemeke ndikpan utom ukwọrọikọ.

Jesus ama etịm mbet esie idem man mmọ ẹkeme ndika iso nnam akpan utom emi enye ama afiak ọnyọn̄ heaven. Enye ọkọdọhọ mmọ ete: ‘Mbufo ẹkwọrọ eti mbụk ke ofụri ererimbot. Ẹkpep mme owo Ikọ Abasi, ẹnyụn̄ ẹnịm mmọ baptism.’

“Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.”—Luke 4:43