Ẹyak ineme se iketịbede mbemiso ẹfiakde ẹbọp ibibene Jerusalem. Nehemiah emi ekedide eyen Israel okodụn̄ ke Shushan ke Persia onyụn̄ anam utom ọnọ Edidem Artaxerxes. Eyenete esie ama emen idiọk mbụk oto Judah edi. Enye ama edidọhọ Nehemiah ete: ‘Mme asua ẹkeme ndidụk Jerusalem nnam mbon emi ẹkefiakde ẹnyọn̄ ibak, sia tutu emi owo ifiakke ibọp ibibene ye inuaotop emi mbon Babylon ẹkewụride.’ N̄kpọ oro ama afịna Nehemiah etieti. Ama ọdọn̄ enye ndikan̄wam mbon Jerusalem, ntre enye ama ọbọn̄ akam man edidem ayak enye aka.

Usen kiet edidem ama okụt Nehemiah ofụhọde, onyụn̄ ọdọhọ enye ete: ‘Akanam n̄kwe fi etiede ntem. Edi didie?’ Nehemiah ama ọdọhọ ete: ‘Owo isụk ibọpke Jerusalem obio nnyịn tutu emi, oro anam mfụhọ.’ Edidem ama ọdọhọ enye ete: ‘Oyom nnam nso nnọ fi?’ Nehemiah ama ọsọsọp ọbọn̄ akam ke esịt esie, ekem ọdọhọ ete: ‘Mbọk yak mi n̄ka n̄kọbọp ibibene Jerusalem.’ Edidem ama enyịme, onyụn̄ anam kpukpru se enye ekekeme mbak n̄kpọ idinam Nehemiah ke usụn̄. Enye ama emek Nehemiah andikara Judah, onyụn̄ ọnọ enye eto man ẹda ẹbọp inuaotop obio.

Ini Nehemiah esịmde Jerusalem, enye ama asan̄a ese ibibene oro, ekem okot mme oku ye mbọn̄ ọdọhọ ete: ‘Se n̄kụtde ọdiọk etieti. Ana isọsọp itọn̄ọ utom.’ Mmọ ẹma ẹnyịme ẹnyụn̄ ẹtọn̄ọ utom.

Edi ndusụk mme asua mmọ ẹma ẹsak mmọ, ẹnyụn̄ ẹdọhọ mmọ ẹte: ‘Ekpri n̄kpọ nte ebuaikọt ekeme ndinụk ibibene mbufo emi nduọk.’ Mbon emi ẹkebọpde ibibene oro ikọbọrọke mmọ ikọ. Sụn̄sụn̄ sụn̄sụn̄, ẹma ẹbọp ibibene oro okon̄ onyụn̄ ọsọn̄ idem.

Mme asua ẹma ẹbiere ndito nsio nsio itie ndi en̄wan ye mbon Jerusalem ke ini mmọ mîdidorike enyịn. Ndịk ama anam mme Jew ini mmọ ẹkopde n̄kpọ emi. Edi Nehemiah ama ọdọhọ mmọ ete: ‘Ẹkûyak idem enyek mbufo. Jehovah do ye nnyịn.’ Enye ama enịm mbonekọn̄ ẹda ẹkpeme mbonutom; mme asua ikedịghe en̄wan aba.

 Ẹkeda usen 52 kpọt ẹbọp ibibene Jerusalem ye mme inuaotop esie. Nehemiah ama okot kpukpru nditọ Levi ẹdi usọrọ emi ẹkenamde ẹyak ibibene oro ẹnọ Abasi. Enye ama abahade nditọ Levi ọdọn̄ ke otu iba emi ẹdikwọde ikwọ. Ekem mmọ ẹma ẹto Inuaotop Idịm Mmọn̄ ẹdọk ibibene. Otu kiet ẹma ẹto do ẹsan̄a nnasia ẹkanade obio, otu enye eken ẹsan̄a ufien. Mmọ ẹma ẹfri obukpon̄, ẹbre harp ye usan n̄kukwak, ẹnyụn̄ ẹkwọ ikwọ ẹtoro Jehovah. Ezra ama asan̄a ye otu kiet, Nehemiah asan̄a ye otu enye eken. Mmọ ẹma ẹdisobo ke temple. Kpukpru owo—irenowo, iban, ye nditọwọn̄—ẹma ẹwa uwa ẹnọ Jehovah ẹnyụn̄ ẹdia idara. Ẹma ẹda ke anyan usụn̄ ẹkop n̄kpo idara mmọ.

“N̄kpọekọn̄ ekededi eke ẹdibotde ẹban̄a fi idikwe unen.”—Isaiah 54:17