Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ibọrọ Mbụme 10 Emi N̄kparawa ye N̄kaiferi Ẹsibụpde

 MBỤME 7

Nso ke N̄kpanam Edieke Ẹnyịkde Mi Nnam Use?

Nso ke N̄kpanam Edieke Ẹnyịkde Mi Nnam Use?

SE INAMDE EMI EDI ETI MBỤME

Ti ke se ededi oro ebierede ndinam ekeme ndinam n̄kpọ ọfọn m̀mê ọdiọk ye afo.

NSO KE AFO AKPANAM?

Kere ban̄a uwụtn̄kpọ emi ise: Ọfiọn̄ iba kpọt edi emi tọn̄ọ Heather okosobo ye Mike, edi etie enye ke idem nte mmọ ẹkemana usen kiet. Mmọ ẹsinọ kiet eken etop ndien ndien, ẹsitịn̄ ikọ ẹbịghi ke fon, owo kiet etitetịn̄ ikọ ikụre enye eken ọfọfiọk se enye oyomde nditịn̄. Edi idahaemi, idịghe nneme kpọt ke Mike oyom.

Ke ufan̄ ọfiọn̄ iba emi ẹbede, Mike ye Heather ẹsimụm kiet eken ubọk ẹnyụn̄ ẹtịm inua. Heather iyomke ndika anyan n̄kan oro. Edi enye iyomke Mike ọkpọn̄ imọ. Idụhe owo emi esinamde enye okop inem uwem nte Mike. Enye esiwak ndikere ete: ‘Ami ye Mike imama idem nnyịn . . .’

Nso ke afo akpanam edieke ekpedide Heather onyụn̄ okponde ekem ndikere mban̄a ndọ?

TỊM KERE KAN̄A!

Idan̄ edi enọ emi Abasi ọnọde ebe ye n̄wan kpọt. Owo emi anamde use abiat enọ emi. Etie nte ndisida ata ọsọn̄urua ọfọn̄ n̄kwọhọde n̄kpọ

Edieke ọfrọde ke ata anyan eto odomo ndife nte inuen, udûtreke-tre ndida unan idiọk idiọk m̀mê ndikpa. Kpasụk ntre ke edi ye ndibiat ibet Abasi emi ọdọhọde ‘ibet use.’—1 Thessalonica 4:3.

Nso iditịbe inọ owo oro anamde use? Bible ọdọhọ ete: “Owo eke akade iso anam use anam idiọkn̄kpọ edue idem esie.” (1 Corinth 6:18) Ndi emi edi akpanikọ?

 Mme anam-ndụn̄ọde ẹdọhọ ke ediwak uyen emi ẹsinamde use ẹsinyene ediwak mfịna utọ nte mbon oro ẹsiakde mi:

  • EDITỊMEDE ESỊT. Esịt esitịmede ediwak uyen emi ẹsinamde use, mmọ ẹsinyụn̄ ẹdọhọ ke ekpedi ima ifiọk, mmimọ ikpakanamke.

  • MMỌ ISIKEMEKE NDIBUỌT IDEM ABA YE KIET EKEN. Eren ye n̄wan oro ẹnamde use, ẹsitọn̄ọ ndikere, ‘Okûdi enye esinam ye owo en̄wen?’

  • MMỌ ISIMAHA IDEMMỌ ABA. Ediwak n̄kaiferi ẹkpema ndinam ufan ye erenowo emi edikpemede-kpeme mmọ, idịghe enye oro edidan̄de ye mmọ. Ndien, ediwak n̄kparawa isinen̄ekede ima aba eyenan̄wan emi ekenyịmede ndinam idan̄ ye mmọ.

  • Se anade eti: Edieke anamde use, ọwọrọ emesuene idemfo sia omotop ata ọsọn̄urua n̄kpọ fo ọduọk. (Rome 1:24) Idem fo ọsọn̄ urua etieti, idịghe se ayakde ọnọ owo ntre ntre!

Wụt ke emekeme ndisọn̄ọ nda nnam ibet Abasi emi ọdọhọde ‘ibet use.’ (1 Thessalonica 4:3) Ama ọdọ ndọ, emekeme ndien ndinam idan̄ ye ebe m̀mê n̄wan fo. Do ndien ke edinen̄ede inem fi, udûtịmekede esịt, udûtuaha n̄kpọfiọk, udûnyụn̄ unyeneke mfịna emi mbon oro ẹsinamde use ẹsinyenede.—Mme N̄ke 7:22, 23; 1 Corinth 7:3.

 AFO EKERE DIDIE?

  • Ndi owo emi enen̄erede ama fi ayanam fi n̄kpọ emi edibiakde fi, inyụn̄ inam esịt etịmede fi?

  • Ndi owo emi enen̄erede ama fi okpodomo ndinam fi anam n̄kpọ emi Abasi asuade?—Mme Hebrew 13:4.