Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Ibọrọ Mbụme 10 Emi N̄kparawa ye N̄kaiferi Ẹsibụpde

 MBỤME 1

Nso Utọ Owo ke Ndi?

Nso Utọ Owo ke Ndi?

SE INAMDE EMI EDI ETI MBỤME

Edieke ọdiọn̄ọde utọ owo emi afo edide ye se enịmde, emi ayan̄wam fi ebiere ndinam se ifọnde ke ini osobode idomo.

NSO KE AFO AKPANAM?

Kere ban̄a uwụtn̄kpọ emi ise: Iyọhọke kan̄a minit duop Karen ekedisịm itie usọrọ. Etise, Karen okop owo obụpde enye ete:

“Edisana Mary, adada ntre anam nso?”

Karen ọwọn̄ọde iso okụt Jessica ufan esie akamade ekpeme beer iba. Jessica anyan ekpeme kiet ọnọ Karen onyụn̄ ọdọhọ enye ete, ‘Bọ do, ukprike ukaha nditiene ndia uwem.’

Karen oyom ndisịn, edi enye iyomke Jessica ufan esie ekere ke imọ idi “Edisana Mary.” Enye ọdọhọ ke esịt esie ete: ‘Jessica idiọkke nte nditọiban eken. Edieke enye ọn̄wọn̄de beer, ọwọrọ mmekeme nditiene n̄n̄wọn̄. N̄kọ onyụn̄ edi beer, idịghe sika.’

Nso ke afo akpanam edieke ekpedide Karen?

TỊM KERE KAN̄A!

Edieke ọdiọn̄ọde utọ owo emi afo edide ye se enịmde, eyekeme ndibiere se ifọnde ke ini utọ n̄kpọ emi ọwọrọde fi, udûnyụn̄ uyakke mbon en̄wen ẹnam fi anam se ọdiọn̄ọde ke ọdiọk.—1 Corinth 9:26, 27.

Nso ikeme ndin̄wam fi anam emi? Ndifiọk ibọrọ mbụme inan̄ emi ayan̄wam fi.

 1 NSO KE NNEN̄EDE MFIỌK NDINAM?

Edieke afo ọdiọn̄ọde se enen̄erede ọfiọk ndinam ye nti edu emi enyenede, emi ayanam fi enyene uko.

OWO EMI AFO EKPEKPEBEDE: Apostle Paul ọkọdọhọ ete: “Ekpedi ami ndi ọkọi ke nditịn̄ ikọ, ke akpanikọ ndịghe ọkọi ke ifiọk.” (2 Corinth 11:6) Sia Paul ekenen̄erede ọfiọk Ikọ Abasi, emi ama an̄wam enye ekeme ndisọn̄ọ nda nnam n̄kpọ Abasi ke ini mme owo ẹketịn̄de idiọk ẹban̄a enye.—2 Corinth 10:10; 11:5.

DỤN̄ỌDE IDEMFO SE: Wet n̄kpọ kiet emi enen̄erede ọfiọk ndinam mi.

Siak ata eti edu kiet emi afo enyenede. (Ke uwụtn̄kpọ, ndi emesin̄wam mbon en̄wen? ọfọn ido? edi se ẹkemede ndiberi edem? esika n̄kpọ ke ini?)

2 NSO ISISỌN̄ FI NDINAM?

Ke uwụtn̄kpọ, ndi esisọn̄ fi ndimụm idem n̄kama ke ini esịt ayatde fi? Edieke mûkpemeke, utọ edu emi idiyakke mme owo ẹkụt nti edu fo.

OWO EMI AFO EKPEKPEBEDE: Paul ama ọfiọk n̄kpọ emi esisọn̄de enye ndinam. Enye ọkọdọhọ ete: “Mmenen̄ede ndara ibet Abasi ke ọwọn̄esịt mi, edi n̄kụt ibet efen ke ndido idem mi nte an̄wanade ye ibet oro odude mi ke esịt onyụn̄ adade mi nte mbuotekọn̄ ọnọ ibet idiọkn̄kpọ.”—Rome 7:22, 23.

DỤN̄ỌDE IDEMFO SE: Nso isisọn̄ fi ndinam?

 3 NSO KE MBIERE NDINAM?

Ndi ekpekpe okụk odụk moto ke ini mûnyeneke akpan ebiet emi akade? Emi ọkpọwọrọ ke unyeneke ibuot unyụn̄ ufiọkke se anamde!

Nso ke emi ekpep fi? Edieke ebierede se edinamde, ididịghe ọdọdọk ososụhọde nte owo emi mînyeneke ibuot. Edi ọyọfiọk nnennen n̄kpọ emi akpanamde ye nte akpanamde enye.

OWO EMI AFO EKPEKPEBEDE: Paul ọkọdọhọ ete: ‘Ami mfeheke nte owo emi mînyeneke ebiet eke efehede aka.’ (1 Corinth 9:26) Paul iketiehe nte owo emi mînyeneke ebiet emi enye akade, edi enye ama osụhọde etie ebiere se enye edinamde, onyụn̄ anam se enye ekebierede.—Philippi 3:12-14.

DỤN̄ỌDE IDEMFO SE: Wet n̄kpọ ita oro afo ebierede ndinam mbemiso isua en̄wen okụrede.

4 NSO KE NNỊM?

Edieke ọdiọn̄ọde owo emi afo edide, editie nte eto emi orụn̄ esie enen̄erede odụk isọn̄, emi ọkpọsọn̄ ofụm mîkemeke ndiberi nduọk

Edieke mûnịmke se Bible ekpepde, edinyenyịme kpukpru n̄kpọ. Edidi ama odu ye ubọkn̄ka fo, afo anam n̄kpọ nte mmọ; ndien emi ediwụt ke unyeneke ebiet emi adade ọnọ.

Edieke enịmde se Bible ekpepde, udûtieneke mbon en̄wen unam se mîfọnke, ndien emi ayanam mmọ ẹfiọk utọ owo emi afo edide.

OWO EMI AFO EKPEKPEBEDE: Etie nte ini emi prọfet Daniel ekedide ekpri akparawa, ke enye ‘ekebiere ke esịt esie’ ke imọ iyenịm ibet Abasi kpa ye oro imọ mîdụhe ye ete ye eka imọ. (Daniel 1:8) Emi ama an̄wam enye aka iso edi asan̄autom Abasi. Daniel ama anam se enye ekekpepde ke Ikọ Abasi.

DỤN̄ỌDE IDEMFO SE: Nso ke afo enịm? Ke uwụtn̄kpọ: Ndi emenịm ke Abasi odu? Ntak emi enịmde? Nso inam fi enịm ke Abasi odu?

Ndi emenịm ke ọfọn odu uwem nte Abasi ọdọhọde? Ntak emi afo enịmde?

Nso ke akpama ndibiet? Ndi akpama ndibiet nsat ikọn̄ emi ofụm emende aka kpukpru ebiet m̀mê eto emi oyobio mîkemeke ndiberi nduọk? Edieke anamde se ekpepde ke Bible, afo editie nte eto oro oyobio mîkemeke ndiberi nduọk. Do ndien ke afo edikeme ndibọrọ mbụme emi, Nso Utọ Owo ke Ndi?