Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Ibọrọ Mbụme 10 Emi N̄kparawa ye N̄kaiferi Ẹsibụpde

 MBỤME 6

Nso ke N̄kpanam ke Ini Ubọkn̄ka Mi Ẹyomde Ntiene Nnam Se Mîfọnke?

Nso ke N̄kpanam ke Ini Ubọkn̄ka Mi Ẹyomde Ntiene Nnam Se Mîfọnke?

SE INAMDE EMI EDI ETI MBỤME

Ke ini anamde se ọfiọkde ke enen, edidu uwem nte Abasi amade, owo idikemeke ndinam fi anam se mîfọnke.

NSO KE AFO AKPANAM?

Kere ban̄a uwụtn̄kpọ emi ise: Nditọ ufọkn̄wed mme Ben iba ke ẹsan̄a ẹbịne enye. Nsia eyemede enye sia mmọ ẹdodomo ndinam enye ọn̄wọn̄ sika ikaba kan̄a urua emi. Ọyọhọ ikata oyom ndidi emi.

Akpa eyen ufọkn̄wed ọdọhọ enye ete:

“Afo asan̄a ikpọn̄ ebọk emi, yak n̄wụt fi ufan kiet.”

Enye otop Ben ke idet enyịn ke ini ọdọhọde “ufan kiet,” onyụn̄ osio n̄kpọ ke ekpat ọfọn̄idem esie anyan ọnọ Ben.

Ben okụt ke n̄kpọ emi enye osiode ke ekpat edi sika. Ntre nsia etetịm eyemede enye.

Ben ọdọhọ mmọ ete, “Mmọdọdọhọ mbufo ke nsin̄wọn̄ke . . .”

Ọyọhọ eyen ufọkn̄wed iba esịbe enye ikọ ke inua onyụn̄ ọdọhọ ete: “Okûdi edi mbe-o?”

Ben ọbọrọ uko uko ete, “Ndịghe mbe!”

Ekem, enye odori Ben ubọk ke afara onyụn̄ etịn̄ sụn̄sụn̄ ete: “Da, bọ fịp.”

Akpa eyen ufọkn̄wed anyan sika ọnọ enye onyụn̄ etịn̄ sụn̄sụn̄ ete: “Nnyịn iditịn̄ke inọ owo, owo ndomokiet idinyụn̄ ifiọkke tutu amama.”

Nso ke afo akpanam edieke ekpedide Ben?

 TỊM KERE KAN̄A!

Ndi nditọ ufọkn̄wed mme Ben ẹma ẹtie ẹkere ẹnyụn̄ ẹbiere m̀mê ọfọn in̄wọn̄ sika? Itiehe ntre. Akam etie nte mmọ ẹtiene mbon en̄wen ẹnam se mmọ ẹnamde. Mmọ ẹyom mbon en̄wen ẹma mmimọ, ntak edi oro mmọ ẹtienede mbon en̄wen ẹnam se mmọ ẹnamde.

Edieke utọ n̄kpọ emi ọwọrọde fi, nso ikeme ndin̄wam fi anam se inende?

  1. BEM ISO TIE KERE MFỊNA ORO EKEMEDE NDISOBO

    Bible ọdọhọ ete: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.”—Mme N̄ke 22:3.

    Ndusụk ini, emekeme ndida n̄kụt afanikọn̄. Ke uwụtn̄kpọ, yak idọhọ ke amada okụt nditọ ufọkn̄wed mbufo ẹn̄wọn̄de sika. Edieke ebemde iso ọfiọk ke mmọ ẹkeme ndinọ fi sika, oro ayan̄wam fi eben̄e idem.

  2. KERE SE EDINAMDE

    Bible ọdọhọ ete: “Ẹnyene eti ubieresịt.”—1 Peter 3:16.

    Bụp idemfo ete: ‘Editie mi didie ke idem edieke ntienede ubọkn̄ka mi nnam se mmọ ẹnamde?’ Edi akpanikọ ke mmọ ẹkeme ndima fi ke nsonso oro. Edi, editie fi didie ke idem nte ini akade? Ndi akpama ndinem nditọ ufọkn̄wed mbufo esịt akan ndinem Jehovah esịt?—Exodus 23:2.

  3. BIERE SE EDINAMDE

    Bible ọdọhọ ete: “Owo ọniọn̄ enyene mbak onyụn̄ ọwọn̄ọde ọkpọn̄ se idiọkde.”—Mme N̄ke 14:16.

    Ebebịghi awawara, nnyịn inyene ndibiere se idinamde. Ana iti ke se ibierede ekeme ndinam n̄kpọ ọfọn m̀mê ọdiọk ye nnyịn. Bible ọdọhọ ke Joseph, Job, ye Jesus ẹma ẹbiere se ifọnde, edi Cain, Esau, ye Judas ikanamke ntre. Nso ke afo edinam?

Bible ọdọhọ ke “Daniel [ama] ebiere ke esịt esie ete imọ idisabakede idem.” (Daniel 1:8) Edieke afo etiede ekere ufen oro edibọde ke ini anamde idiọkn̄kpọ, onyụn̄ ebierede ke udûnamke, idisọn̄ke fi ndisịn ndinam idiọkn̄kpọ, esịt oyonyụn̄ enem fi.

Kûfịna idem, iyomke okot ofụri Bible ọnọ mmọ man etịn̄ ntak emi esịnde. Ekeme ndidi ndidọhọ mmọ uko uko NNAMKE eyekem. Mîdịghe, man owụt ke udûnamke tutu amama, emekeme ndidọhọ:

  • “Kûsiak mi enyịn̄ ke utọ n̄kpọ oro!”

  • “Nsinamke utọ n̄kpọ oro!”

  • “Da, akpana ọfiọk ke ndinamke utọ n̄kpọ oro!”

Se idin̄wamde fi edi ndisọsọp ndọhọ uko uko ke imọ idinamke. Edieke anamde ntre, oyokụt ke ubọkn̄ka fo ẹyesọsọp ẹsion̄o idem ẹkpọn̄ fi!

 KE INI ẸSAKDE FI NSAHI

Edieke anamde se ubọkn̄ka fo ẹdọhọde anam, ọwọrọ edidi n̄kpọmbre mmọ

Nso ke akpanam edieke ubọkn̄ka fo ẹsakde fi, ẹdọhọde ke afo edi mbe onyụn̄ anam n̄kpọ nte n̄wan? Ti ke mmọ ẹnam kpukpru emi man afo etiene mmọ anam se mmọ ẹnamde. Edi enyene n̄kpọ iba emi afo ekemede ndinam.

  • Nam nte emenyịme. (Dọhọ: “Ẹmenen, ndi mbe!” Ekem tịn̄ ntak emi mûnamke se mmọ ẹdọhọde.)

  • Tịn̄ ntak emi mûnyịmeke nyụn̄ tịn̄ n̄kpọ emi edinamde mmọ ẹkere n̄kpọ. (Dọhọ: “N̄kpenịmke ke mbufo ẹkpen̄wọn̄ sika!”)

Edieke ubọkn̄ka fo ẹkade iso ndisak fi, kpọn̄ ebiet oro! Adan̄a nte abiatde ini do, ntre ke mmọ ẹditetịm ifịna fi. Ndikpọn̄ ebiet oro owụt ke afo uyomke nditiene mmọ nnam se mmọ ẹnamde!

Idụhe nte afo ekemede ndifehe mbọhọ ubọkn̄ka fo ofụri ofụri. Edi ọmọfiọk se akpanamde, se ọkpọdọhọde mmọ, ye ntak emi mûdutieneke mmọ unam se mîfọnke. Ti ke afo enyene ndibiere se edinamde!—Joshua 24:15.