Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Ibọrọ Mbụme 10 Emi N̄kparawa ye N̄kaiferi Ẹsibụpde

 MBỤME 9

Ndi Akpana Nnịm ke N̄kpọ Ẹkefoforo?

Ndi Akpana Nnịm ke N̄kpọ Ẹkefoforo?

SE INAMDE EMI EDI ETI MBỤME

Edieke edide akpanikọ ke n̄kpọ ẹkefoforo, ọwọrọ ufọn uwem idụhe. Edi, edieke edide Abasi okobot mme n̄kpọ, ọwọrọ imekeme ndinyene ibọrọ mbụme oro ẹban̄ade uwem ye ini iso.

NSO KE AFO AKPANAM?

Kere ban̄a uwụtn̄kpọ emi ise: Alex ifiọkke aba se ekpenịmde. Enye enịm ke Abasi odu, ke enye okonyụn̄ obot mme n̄kpọ. Edi mfịn ke ubet ukpepn̄kpọ, titia emi esikpepde mmọ n̄kpọ aban̄a mme odu-uwem n̄kpọ ọsọn̄ọ etịn̄ ke n̄kpọ ẹkefoforo, ke ndụn̄ọde oro ntaifiọk ẹnamde ẹnen̄ede owụt ke emi edi akpanikọ. Alex iyomke ẹda imọ nte ndisịme. Ntre enye ọdọhọ ke esịt esie ete: ‘Edieke ntaifiọk ẹdọhọde ke n̄kpọ ẹkefoforo, ami ndi anie ndifan̄a n̄kpọ ye mmọ?’

Nso ke afo akpanam edieke ekpedide Alex, ndi ekpenịm ke n̄kpọ ẹkefoforo ke ntak se ntaifiọk ẹdọhọde?

TỊM KERE KAN̄A!

Mbon oro ẹnịmde ke Abasi okobot n̄kpọ ye mbon oro ẹnịmde ke n̄kpo ẹkefoforo, ẹsisọsọp ẹtịn̄ se mmọ ẹnịmde kpa ye oro mmọ mîfiọkke ntak emi mmọ ẹnịmde.

  • Ndusụk owo ẹnịm ke Abasi okobot n̄kpọ koro se ẹsikpepde mmọ ke ufọkabasi edi oro.

  • Ndusụk owo ẹnịm ke n̄kpọ ẹkefoforo sia se ẹsikpepde mmọ ke ufọkn̄wed edi oro.

 MBỤME ITIOKIET ORO IKPOBỤPDE

Bible ọdọhọ ke “kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi.” (Mme Hebrew 3:4) Ndi se itien̄wed emi etịn̄de edi akpanikọ?

Ndidọhọ ke idịghe Abasi okobot n̄kpọ onyụn̄ etie nte ndidọhọ ke owo ikọbọpke-bọp ufọk emi

ẸDỌHỌ: Ke ata ekpri n̄kpọ akakabade ekondo.

1 Ata ekpri n̄kpọ oro okoto m̀mọ̀n̄, anie okonyụn̄ anam enye?

2 Ewe ke owo ọkpọsọp enịm—ke kpukpru n̄kpọ ẹkedidu ke mbuari m̀mê ke enyene owo emi okobotde kpukpru n̄kpọ?

ẸDỌHỌ: Ke unam okoforo owo.

3 Edieke edide unam, utọ nte nsịmbo ebọk, okoforo owo, ntak emi mme owo ẹnen̄erede ẹfiọk n̄kpọ ẹkan nsịmbo ebọk?

4 Ntak emi ata n̄kpri odu-uwem n̄kpọ ẹwakde n̄kukọhọ ntre?

ẸDỌHỌ: Ke ndụn̄ọde oro ntaifiọk ẹnamde enen̄ede owụt ke n̄kpọ ẹkefoforo.

5 Ndi owo oro etịn̄de n̄kpọ emi ama etiene odụn̄ọde okụt ke edi akpanikọ?

6 Ata ediwak owo ẹnịm ke n̄kpọ ẹkefoforo. Ndi mmọ ẹnịm emi sia ẹdọhọde mmọ ke se kpukpru mme ọdiọn̄ọ-idem-owo ẹnịmde edi oro?

“Edieke okpokụtde ata ediye ufọk ke akai, ndi ọkpọdọhọ: ‘Oh se nte nsio nsio eto ẹduọde ẹkabade ediye ufọk emi!’ Ukpûdọhọke! Sia ọmọdiọn̄ọ ke utọ n̄kpọ oro ikemeke-keme nditịbe. Ntak ndien emi owo ekpenịmde ke kpukpru n̄kpọ ke ekondo ẹkedidu ke mbuari?”—Julia.

“Ndi ekpenịm edieke owo ọkpọdọhọde fi ke ini imọ ikakade itie umịn̄n̄wed, masịn umịn̄n̄wed ama otop obomo osio mmọn̄n̄wed ọduọk ke ibibene ye ceiling ufọk ndien mmọ ẹkabade n̄wed ukabadeikọ.”—Gwen.

 NTAK EMI AFO EKPENỊMDE KE ABASI ODU?

Bible ọdọhọ fi ‘odụn̄ọde kpukpru n̄kpọ’ ese. (1 Thessalonica 5:21) Emi ọwọrọ ke ikpanaha enịm ke Abasi odu sia:

  • SE AFO EKEREDE EDI ORO (N̄kere ke ana edi Abasi odu)

  • MBON EN̄WEN ẸNỊM (Ndu ye mbon emi ẹnịmde ke Abasi odu)

  • SE ẸDỌHỌDE FI ENỊM EDI ORO (Ete ye eka mi ẹkekpep mi ke Abasi odu—Ntre nnam didie)

Akpana enyene ntak emi anamde enịm ke Abasi odu.

“Ke ini titia nnyịn esikpepde nte idem nnyịn etiede, emi esinam nnen̄ede nnịm ke Abasi odu. Kpukpru ndido idem nnyịn, ọkpọkọm ekpri didie enyene utom. Ediwak ini, mmọ ẹsinam utom mmọ nnyịn ifiọkke. Idem owo enen̄ede enyene ndyọ!” —Teresa.

“Ke ini n̄kụtde ikpọ ufọkenyọn̄, moto, m̀mê nsụn̄ikan̄, mmesibụp idemmi nte: ‘Anie akanam mme n̄kpọ emi?’ Ke uwụtn̄kpọ, owo emi mîdiọn̄ọke n̄kpọ ikemeke ndinam moto, sia ediwak n̄kpri n̄kpri n̄kpọ ẹdu ke moto emi edide edieke owo mînamke mmọ ọfọn, moto oro idiwatke. Edieke edide owo akanam moto, ọwọrọ enyene owo emi okobotde nnyịn n̄ko.”—Richard.

“Nte nnen̄erede n̄kpep n̄kpọ mban̄a n̄kpọ-obot, ntre ke ntetetịm n̄kụt ke edi nsu ndidọhọ ke n̄kpọ ẹkefoforo. . . . Ami n̄kere ke emem utom ndinịm ke Abasi okobot n̄kpọ akan ndinịm ke n̄kpọ ẹkefoforo.”—Anthony.

KERE ISE

Kpa ye ofụri ndụn̄ọde oro ntaifiọk ẹnamde ndiwụt ke n̄kpọ ẹkefoforo, kpukpru mmọ ẹtịn̄ nsio nsio n̄kpọ ẹban̄a n̄kpọ emi. Edieke ntaifiọk ke idemmọ mînyeneke ikọ inua kiet ke n̄kpọ emi, ndi ọkpọfọn afo enịm se mmọ ẹtịn̄de??

Kpep N̄kpọ En̄wen

Nso ke Bible Etịn̄ Aban̄a Ekondo?

Bible ọdọhọ ke Abasi akada “usen” itiokiet obot kpukpru n̄kpọ. Edi ndi ekedi ata ata usen itiokiet emi edide hour 24 ke usen?