Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 13

Timothy Ama Esima Ndin̄wam Mme Owo

Timothy Ama Esima Ndin̄wam Mme Owo

Timothy ekedi akparawa emi akamade ndin̄wam mme owo. Enye ama aka ediwak itie man akan̄wam mbon en̄wen. Emi akanam enye okop inemesịt ke uwem. Ndi akpama ndikpep n̄kpọ mban̄a enye?—

Eka ye ekaeka Timothy ẹkekpep enye Ikọ Abasi

Timothy okokpon ke obio kiet emi ekerede Lystra. Lois ekaeka esie ye Eunice eka esie ẹketọn̄ọ ndikpep enye n̄kpọ mban̄a Jehovah ke ini enye ekedide ata ekpri. Nte Timothy okosụk okponde, enye ama oyom ndin̄wam mbon en̄wen ẹkpep ẹban̄a Jehovah.

Ke ini Timothy okosụk edide akparawa, Paul ama ọdọhọ enye edisan̄a ye imọ aka ọkọkwọrọ ikọ ke mme obio en̄wen. Timothy ama enyịme. Enye ama eben̄e idem ndika n̄kan̄wam mbon en̄wen.

 Timothy ama asan̄a ye Paul aka obio kiet emi ekerede Thessalonica, emi odude ke Macedonia. Akana mmọ ẹsan̄a ata anyan isan̄ ke ukot ekem ẹkedụk ubom man ẹkesịm Thessalonica. Ke ini mmọ ẹsịmde do, mmọ ẹma ẹkpep ediwak owo n̄kpọ ẹban̄a Jehovah. Edi ndusụk owo ẹma ẹyat esịt ẹnyụn̄ ẹtọn̄ọ ntịme ye mmọ. Paul ye Timothy ẹma ẹwọrọ do ẹka ẹkekwọrọ ikọ ke itie en̄wen.

Timothy ama okop inemesịt ke uwem

Ọfiọn̄ ifan̄ ke oro ebede, Paul ama ọdọhọ Timothy afiak aka Thessalonica ekese nte n̄kpọ etiede ye nditọete do. Ikememke utom ndifiak n̄ka obio ntịme oro! Edi Timothy ama osụk aka sia enye ekekerede aban̄a nditọete emi ẹkedude do. Enye ama ada eti mbụk ọsọk Paul. N̄kpọ ama enen̄ede ọfọn ye nditọete emi ẹkedude ke Thessalonica!

Timothy ama esisan̄a ye Paul ọkwọrọ ikọ ke ediwak isua. Paul ama ewet ini kiet ete ke Timothy ekenen̄ede ọfọn imọ ndidọn̄ aka akan̄wam mme esop. Emi edi koro Timothy ama ama Jehovah onyụn̄ ama mme owo.

Ndi afo amama mme owo onyụn̄ oyom ndin̄wam mmọ ẹkpep ẹban̄a Jehovah?— Edieke anamde emi, afo oyokop inemesịt ke uwem ukem nte Timothy okokopde!