Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 2

Rebekah Ama Enyịme Ndinam Se Inemde Jehovah Esịt

Rebekah Ama Enyịme Ndinam Se Inemde Jehovah Esịt

Rebekah ekedi n̄wan oro amade Jehovah. Ebe esie ekekere Isaac. Isaac n̄ko ama ama Jehovah. Rebekah akasan̄a didie okụt Isaac? Didie ke enye akanam se inemde Jehovah esịt? Yak ikot mbụk esie.

Ete ye eka Isaac ẹkedi Abraham ye Sarah. Mmọ ẹkedụn̄ ke isọn̄ Canaan. Mbon Canaan ikokponoke Jehovah. Edi Abraham okoyom eyen esie ọdọ owo emi okponode Jehovah. Mmọdo, enye ama ọdọn̄ asan̄autom esie, emi ekedide Eliezer, ete okoyom n̄wan ọnọ Isaac ke ebiet emi ẹkotde Haran, emi ndusụk mbonubon Abraham ẹkedụn̄de.

Rebekah ama enyịme ndisịn ifịk n̄kokoi mmọn̄ nnọ mme camel

Eliezer asan̄a ye mme asan̄autom Abraham eken. Mmọ ẹma ẹsan̄a ke ata ediwak usen. Ẹsan̄a ye camel duop emi ẹbiomde udia ye mme enọ. Ke ini Eliezer ye mme asan̄autom eken ẹdide ẹdisịm Haran, mmọ ẹtuak ẹda ke obube mmọn̄ sia Eliezer ọfiọkde ete ke idibịghike mme owo ẹyedi ndikoi mmọn̄ do. Enye ọbọn̄ akam ọnọ Jehovah ete: ‘Edieke ndọhọde eyenan̄wan ọnọ mi mmọn̄ n̄n̄wọn̄, ndien enye ọnọ mi onyụn̄ ọnọ mme camel mi n̄ko, nyọfiọk nte ke eyenan̄wan emi ke afo emek.’

Etise Rebekah edisịm obube mmọn̄ oro. Bible ọdọhọ ke enye ama eye etieti. Eliezer ama ọdọhọ enye ete ọnọ imọ mmọn̄ in̄wọn̄, ndien enye ọdọhọ  ete: ‘Ọfọn! Bọ mi n̄wọn̄, yak n̄kokoi n̄ko nnọ mme camel fo.’ Kere ise! Camel emi mmọn̄ ọdọn̄de ẹsin̄wọn̄ ata ediwak mmọn̄. Ntre Rebekah ekenyene ndika n̄kokoi mmọn̄ ediwak ini. Ndi omokụt nte enye esịnde ifịk okoi mmọn̄ edinọ mme camel ke ndise emi?— Idem ama akpa Eliezer ke nte Jehovah ọkọbọrọde akam esie.

Eliezer ama ọnọ Rebekah ediwak nti enọ. Rebekah ọdọhọ Eliezer ye mbon oro ẹkesan̄ade ye enye ete mmọ ẹdi ufọk mmimọ. Eliezer etịn̄ se ikanamde Abraham ọdọn̄ imọ idi Haran ye nte Jehovah ọkọbọrọde akam imọ. Kpukpru owo ke ufọk mme Rebekah ẹma ẹnem esịt ndiyak enye ọkọdọ Isaac.

Rebekah ama etiene Eliezer ọnyọn̄ Canaan onyụn̄ ọkọdọ Isaac

Edi ndi emekere ke Rebekah ama ama ndidọ Isaac?— Rebekah ama ọfiọk ke Jehovah ọkọdọn̄ Eliezer edi do. Ntre ke ini mbonubon Rebekah ẹkebụpde m̀mê enye ọmọn̄ aka Canaan ọkọdọ Isaac, enye ama ọbọrọ ete: ‘Ih, mmọn̄ n̄ka.’ Rebekah ama ọsọsọp etiene Eliezer ọnyọn̄. Ke ini mmọ ẹkedide ẹdisịm Canaan, enye ama ọdọ Isaac.

Jehovah ama ọdiọn̄ Rebekah sia enye ama enyịme ndinam se Jehovah okoyomde enye anam. Ke ediwak isua ẹma ẹkebe, Jesus ama edimana ke ubon mme Rebekah! Edieke afo anamde esịt enem Jehovah kpa nte Rebekah akanamde, Jehovah ọyọdiọn̄ fi n̄ko.

KOT MME ITIE EMI KE BIBLE FO