Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 3

Rahab Ama Ọbuọt Idem ye Jehovah

Rahab Ama Ọbuọt Idem ye Jehovah

Yak idọhọ ke idu ke Jericho. Jericho odu ke Canaan. Ndien mbon Canaan ikọbuọtke idem ye Jehovah. Mma kiet emi ekerede Rahab odụn̄ do.

Ke ini Rahab ekedide eyenọwọn̄, ẹma ẹsitịn̄ ẹnọ enye nte Moses akanamde Ididuot Inyan̄ abahade iba ye nte enye akadade nditọ Israel ọwọrọ ke Egypt. Enye ama esikop n̄ko nte Jehovah akan̄wamde nditọ Israel ẹkan mme asua mmọ ke ekọn̄. Idahaemi enye okop nte ke nditọ Israel ẹdu ẹkpere Jericho!

Rahab ekedịp mbon uyep koro enye ọkọbuọtde idem ye Jehovah

Mbubreyo usen kiet, nditọ Israel iba ẹsan̄a ndịbe ndịbe ẹka Jericho ndikese nte obio oro etiede. Mmọ ẹkedi mbon uyep, ndien mmọ ẹdiwaha ufọk Rahab. Enye onyụn̄ ada mmọ odụk ufọk. Edikem ke okoneyo, ẹditịn̄ ẹnọ edidem Jericho ẹte ke nditọ Israel iba ẹma ẹdụk ẹdi Jericho ye nte ke mmọ ẹkedu ke ufọk Rahab. Ntem edidem ọdọn̄ mme owo ete ẹkemụm mmọ ẹsọk imọ. Edi Rahab ọdọhọ mbon uyep oro ẹkedịbe ke ọkọm ufọk esie. Enye onyụn̄ ọdọhọ mbon oro edidem okosiode ọdọn̄ ete: ‘Mbon uyep oro ẹma ẹdi mi, edi mmọ ẹma ẹnyọn̄ọ. Edieke ẹbịnede mmọ idahaemi, mbufo ẹmekeme ndikomụm mmọ!’ Ndi ọmọfiọk ntak emi Rahab edịpde mbon uyep emi?— Koro enye ọbuọtde idem ye Jehovah onyụn̄ ọfiọkde ete ke Jehovah ayanam nditọ Israel ẹkan ẹnyụn̄ ẹda isọn̄ Canaan ẹnyene.

Mbemiso mbon uyep oro ẹkpọn̄de ufọk Rahab, mmọ ẹma ẹn̄wọn̄ọ ẹnọ enye ẹte ke ẹyenyan̄a enye ye mbonubon esie ke ini ẹdisobode Jericho. Ndi ọmọfiọk se mmọ ẹdọhọde enye anam?— Mmọ ẹdọhọ enye ẹte: ‘Da ididuot urụk emi tebe ke windo fo. Edieke etebede, kpukpru owo ke ufọk fo ẹyebọhọ.’ Rahab anam kpa nte mbon uyep oro ẹkedọhọde enye. Ndi ọmọfiọk se iketịbede ke oro ebede?—

Jehovah ama anyan̄a Rahab ye mbonubon esie

Ke usen ifan̄ ẹbede, nditọ Israel ẹsan̄a ẹkanade obio Jericho isioroke uyo. Mmọ ẹsan̄a ẹkanade obio ke usen itiokiet, ini kiet ke usen. Edi ke ọyọhọ usen itiaba mmọ ẹsan̄a ẹkanade utịm ikatiaba. Ekem mmọ ẹfiori n̄kpo. Jehovah anam ibibene  obio Jericho ọduọ. Edi ufọk emi ẹketebede ididuot urụk oro ke windo iwụreke! Ndi omokụt ufọk oro ke ndise emi?— Ẹnyan̄a Rahab ye mbonubon esie!

Nso ke ekpep oto Rahab?— Kpukpru mme utịben̄kpọ oro Rahab okokopde aban̄a Jehovah akanam enye ọbuọt idem ye Jehovah. Afo n̄ko ke ekpep ediwak nti n̄kpọ aban̄a Jehovah. Ndi ọmọbuọt idem ye enye nte Rahab ọkọbuọtde?— Imọdiọn̄ọ ke ọmọbuọt!