Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 1

Ndịben̄kpọ Oro Enemde Nnyịn Ndifiọk

Ndịben̄kpọ Oro Enemde Nnyịn Ndifiọk

Ndi akanam owo etịn̄ n̄kpọ emi enye mîtịn̄ke inọ mbon en̄wen ọnọ fi?— * Edieke edide ntre, ẹkot n̄kpọ oro ndịben̄kpọ, koro mbon en̄wen idiọn̄ọke. Odu ndịben̄kpọ kiet emi Bible okotde “edisana ndịben̄kpọ.” Ndịben̄kpọ emi edi edisana koro Abasi etịn̄ enye. Ẹnyụn̄ ẹkot enye ndịben̄kpọ sia ediwak owo ikọdiọn̄ọke. Mme angel ẹma ẹyom ndidiọn̄ọ ndịben̄kpọ emi. Ndi akpama ndidiọn̄ọ ndịben̄kpọ emi?—

Afo ekere ke nso ke mme angel ẹkeyom ndidiọn̄ọ?

Ke ata anyan ini ko-o, Abasi ama obot akpa erenowo ye n̄wan. Mmọ ẹkekere Adam ye Eve. Abasi ama ọnọ mmọ ediye ebietidụn̄ emi ẹkekotde In̄wan̄ Eden. Edieke Adam ye Eve ẹkpekekopde uyo Abasi, mmọ ye nditọ mmọ ẹkpekenam ofụri isọn̄ eye nte in̄wan̄ oro. Mmọ n̄ko ẹkpekedụn̄ ke Paradise ke nsinsi. Edi, ndi emeti se Adam ye Eve ẹkenamde?—

Adam ye Eve ẹma ẹsọn̄ ibuot ye Abasi. Ntak edi oro nnyịn mîdụhe ke Paradise mfịn. Edi Abasi ọkọdọhọ ke iyanam ofụri isọn̄ eye, ndien ke kpukpru owo ẹyedu uwem ke nsinsi ẹnyụn̄ ẹkop inemesịt. Didie ke enye edinam emi? Ke ata anyan ini, mme owo ikọfiọkke nte enye edinamde. Emi ekedi ndịben̄kpọ.

Ke ini Jesus ekedide isọn̄, enye ama ekpep mme owo ediwak n̄kpọ aban̄a ndịben̄kpọ emi. Enye ọkọdọhọ ke ndịben̄kpọ emi aban̄a Obio Ubọn̄ Abasi. Jesus ama ọdọhọ mme owo ẹbọn̄ akam ẹte Obio Ubọn̄ emi edi. Obio Ubọn̄ emi edinam isọn̄ edi ediye Paradise.

Ndi enem fi ndifiọk ndịben̄kpọ emi?— Fiọk ete ke mbon oro ẹkopde uyo Jehovah ẹdidụn̄ ke Paradise. Bible etịn̄ ediwak n̄kpọ aban̄a irenowo ye iban oro ẹkekopde uyo Jehovah. Ndi akpama ndifiọk mmọ?— Yak ise ndusụk mmọ ye nte ikemede nditie nte mmọ.

^ ikp. eki. 3 Ke ofụri n̄wed emi, afo oyokụt idiọn̄ọ emi (—) ke ẹma ẹkebụp mbụme. Emi ọwọrọ ke oyom ebet esisit man eyen fo ọbọrọ.