Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 11

Mmọ Ẹma Ẹwet N̄kpọ Ẹban̄a Jesus

Mmọ Ẹma Ẹwet N̄kpọ Ẹban̄a Jesus

Ndi omokụt mme owo emi ke ndise emi?— Mmọ ẹdi Matthew, Mark, Luke, John, Peter, James, Jude, ye Paul. Kpukpru mmọ ẹkedu uwem ini emi Jesus okodude mi ke isọn̄, mmọ ẹma ẹnyụn̄ ẹwet n̄kpọ ẹban̄a Jesus. Yak ikpep n̄kpọ iban̄a mmọ.

Nso ke afo ọdiọn̄ọ aban̄a mbon emi?

Owo ita ke otu mmọ ẹkedi mme apostle oro ẹkesan̄ade ye Jesus ẹkwọrọ ikọ. Ndi ọmọdiọn̄ọ enyịn̄ mmọ?— Mmọ ẹkedi Matthew, John, ye Peter. Apostle Matthew ye John ẹma ẹnen̄ede ẹdiọn̄ọ Jesus, mmọ mbiba ẹma  ẹnyụn̄ ẹwet n̄kpọ ẹban̄a Jesus. Apostle John ama ewet n̄wed efen emi ẹkotde Ediyarade. Enye n̄ko ekewet Akpa John, Udiana John, ye Ọyọhọ John Ita ke Bible. Apostle Peter ekewet n̄wed iba emi ẹdude ke Bible, oro edi, Akpa ye Udiana Peter. Ke Udiana Peter, enye Peter ama ewet nte Jehovah eketiede ke enyọn̄ etịn̄ ikọ aban̄a Jesus ete: ‘Emi edi eyen mi. Mmama enye, mmonyụn̄ nnem esịt ye enye.’

Mbon en̄wen oro ẹdude ke ndise emi ẹkpep nnyịn n̄kpọ n̄ko ẹban̄a Jesus ke mme n̄wed emi mmọ ẹkewetde. Mark edi kiet ke otu mmọ. Etie nte enye ama odu ke ini emi ẹkemụmde Jesus onyụn̄ okụt kpukpru se iketịbede. Owo en̄wen ekedi Luke. Enye ekedi abiausọbọ. Etie nte Jesus ama akpa mbemiso Luke ekedide Christian.

Owo iba en̄wen emi ẹketienede ẹwet Bible ke ndise oro edi n̄kpri nditọeka Jesus iba. Ndi ọmọdiọn̄ọ enyịn̄ mmọ?— Mmọ ẹdi James ye Jude. Ke ntọn̄ọ ntọn̄ọ, mmọ ikenịmke Jesus ke akpanikọ. Mmọ ẹkekam ẹkere ẹte ke ibuot ọmọn̄ ebe enye. Edi nte ini akakade mmọ ẹma ẹnịm Jesus ke akpanikọ ẹnyụn̄ ẹkabade ẹdi mme Christian.

Paul edi akpatre owo emi eketienede ewet Bible, emi odude ke ndise emi. Paul ekekere Saul mbemiso enye akabarede edi Christian. Enye ama enen̄ede asua onyụn̄ ọdiọk ye mme Christian. Ndi ọmọfiọk se ikanamde Paul akabade edi Christian?— Paul okosụk asan̄a ke usụn̄ usen kiet ekem enye okop uyo owo nte etiede ke heaven etịn̄ ikọ ye enye. Jesus ke ekedi! Enye okobụp Paul ete: ‘Nsinam afo ọdiọk ntem ye mbon oro ẹbuọtde idem ye ami?’ Emi akanam Paul akabade esịt edidi Christian. Paul ama ewet n̄wed 14 ke Bible, ọtọn̄ọde ke n̄wed Mbon Rome tutu esịm n̄wed Mme Hebrew.

Nnyịn isikot Bible kpukpru usen, idịghe ntre?— Ndikot Bible kpukpru usen ayanam ikpep ediwak n̄kpọ iban̄a Jesus. Ndi akpama ndikpep n̄kpọ efen efen mban̄a Jesus?—