Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 8

Josiah Ama Enyene Nti Ufan

Josiah Ama Enyene Nti Ufan

Ndi emekere ke esimem utom ndinam se inende?— Ediwak owo ẹkere ke isimemke. Bible ọdọhọ ke ama enen̄ede ọsọn̄ ekpri eyen kiet emi ekekerede Josiah ndinam se inende. Edi enye ama enyene nti ufan emi ẹken̄wamde enye. Yak ikpep iban̄a Josiah ye mme ufan esie.

Ete Josiah ekedi Amon edidem Judah. Amon ekedi ata idiọk owo, ekesinyụn̄ okpono nsunsu abasi. Ke ini ete Josiah akakpade, Josiah ama ọtọn̄ọ ndikara Judah. Edi enye ekedi isua itiaita kpọt! Ndi afo ekere ke Josiah ama ọdiọk nte ete esie?— Ihih, Josiah ikọdiọkke!

Zephaniah ama ọdọhọ mme owo ẹkûkpono ndisọi mbiet

Idem ke ini Josiah ekedide ekpri, ama ọdọn̄ enye ndikpono Jehovah. Emi akanam enye emek mbon oro ẹmade Jehovah nte mme ufan esie. Ndien nti ufan emi ẹken̄wam Josiah anam se inende. Mmanie ẹkedi mme ufan Josiah?

Kiet ke otu ufan esie emi ekedi Zephaniah. Zephaniah ekedi prọfet Abasi, enye ama onyụn̄ ọdọhọ mbon Judah ke ẹyewot  mmọ edieke mmọ ẹkponode ndisọi mbiet. Josiah ama akpan̄ utọn̄ ọnọ Zephaniah onyụn̄ okpono Jehovah, ikponoke ndisọi mbiet.

Ufan Josiah en̄wen ekedi Jeremiah. Etie nte mmọ mbiba ẹkedi n̄ka, mmọ ẹkedụn̄ ẹkpere kiet eken tutu mmọ ẹkpon ẹma. Mmọ ẹma ẹma kiet eken tutu ke ini Josiah akpade, Jeremiah ewet san̄asan̄a ikwọ emi aban̄ade nte n̄kpa Josiah akabiakde enye. Jeremiah ye Josiah ẹma ẹn̄wam kiet eken ẹnam se inende ẹnyụn̄ ẹkop uyo Jehovah.

Josiah ye Jeremiah ẹma ẹn̄wam kiet eken ẹnam se inende

Nso ke uwụtn̄kpọ Josiah ekpep fi?— Idem ke ini Josiah ekedide ekpri, enye ama esima ndinam se inende. Enye ama ọdiọn̄ọ ke imọ ikpanam ufan ye mbon oro ẹmade Jehovah. Afo n̄ko enyene ndinam ufan ye mbon oro ẹmade Jehovah, ẹdinyụn̄ ẹkemede ndin̄wam fi anam se inende!

KOT MME ITIE EMI KE BIBLE FO