Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 9

Jeremiah Iketreke Nditịn̄ Mban̄a Jehovah

Jeremiah Iketreke Nditịn̄ Mban̄a Jehovah

Nso inam mbon emi ẹyat esịt ntem ye Jeremiah?

Jehovah ama anyan̄a Jeremiah

Ndusụk ini esidi ima itetịn̄ n̄kpọ iban̄a Jehovah mme owo ẹsak nnyịn mîdịghe ẹyat esịt ye nnyịn. Emi ekeme ndinam nnyịn itre nditịn̄ n̄kpọ mban̄a Abasi. Ndi akanam etie fi ke idem nte ukputịn̄ke uban̄a Abasi?— Bible etịn̄ aban̄a akparawa kiet emi akamade Jehovah, edi emi okoyomde nditre nditịn̄ mban̄a enye. Enye ekekere Jeremiah. Yak ikpep n̄kpọ en̄wen iban̄a enye idahaemi.

Ke ini Jeremiah ekedide akparawa, Jehovah ama ọdọn̄ enye okodụri mme owo utọn̄ ete mmọ ẹkûnam idiọkn̄kpọ aba. Utom emi ikememke inọ Jeremiah, ndịk ama onyụn̄ anam enye. Enye ama ọdọhọ Jehovah ete: ‘Mfiọkke se nditịn̄de. Ami ndi eyenọwọn̄.’ Edi Jehovah ọdọhọ enye ete: ‘Kûfehe ndịk. Ami nyan̄wam fi.’

 Ekem Jeremiah ọtọn̄ọ ndidụri mme owo utọn̄ nte ke edieke mmọ mîkpụhọkede, ke Abasi ọyọnọ mmọ ufen. Ndi emekere ke mmọ ẹma ẹnam se Jeremiah ọkọdọhọde?— Ihih. Mmọ ẹma ẹsak enye, mîdịghe ẹnen̄ede ẹyat esịt ye enye. Ndusụk mmọ ẹma ẹkam ẹyom ndiwot enye! Afo ekere ke eketie Jeremiah didie ke idem?— Enye ama okop ndịk onyụn̄ ọdọhọ ete: ‘Nditịn̄ke aba mban̄a Jehovah.’ Ndi enye ama etre nditịn̄ mban̄a Jehovah?— Ihih, enye iketreke. Enye ama ama Jehovah tutu ikemeke nditre nditịn̄ mban̄a enye. Ndien sia Jeremiah mîketreke nditịn̄ n̄kpọ mban̄a Jehovah, Jehovah ama ekpeme enye.

Ke uwụtn̄kpọ, mme idiọkowo ẹma ẹtop Jeremiah ẹsịn ke obube mbat. Enye ikadiaha udia inyụn̄ in̄wọn̄ke mmọn̄. Mmọ ẹkeyom ndiyak Jeremiah esịne do akpa. Edi Jehovah ama an̄wam enye ọbọhọ!

Nso ke afo ekeme ndikpep nto Jeremiah?— Kpa ye oro ndịk akanamde enye ndusụk ini, enye ikoyomke nditre nditịn̄ mban̄a Jehovah. Ke ini etịn̄de aban̄a Jehovah, mme owo ẹkeme ndisak fi m̀mê ndiyat esịt ye afo. Emi ekeme ndinam bụt anam fi, m̀mê ndinam fi okop ndịk. Edi kûtre nditịn̄ mban̄a Jehovah. Enye ayan̄wam fi kpukpru ini kpa nte enye akan̄wamde Jeremiah.

KOT MME ITIE EMI KE BIBLE FO