Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpep Ndito Fo

 UKPEPN̄KPỌ 6

David Ikokopke Ndịk

David Ikokopke Ndịk

Nso ke afo esinam ke ini ndịk anamde fi?— Ekeme ndidi emesika ebịne ete m̀mê eka fo ete mmọ ẹn̄wam fi. Edi odu owo en̄wen oro ekemede ndin̄wam fi n̄ko. Enye enyene odudu akan kpukpru owo. Ndi ọmọdiọn̄ọ enye?— Ih, enye edi Jehovah Abasi. Yak ineme iban̄a akparawa kiet ke Bible emi ekekerede David. Enye ama ọfiọk ke Jehovah ayan̄wam imọ kpukpru ini, ndien emi ikayakke enye okop ndịk.

Toto ke ini emi David ekedide eyenọwọn̄, ete ye eka esie ẹma ẹkpep enye ndima Jehovah. Ukpep emi ikayakke David okop ndịk idem ke ini n̄kpọ akanamde enye. Enye ama ọfiọk ke Jehovah edi Ufan imọ ye nte ke Enye ayan̄wam imọ. Usen kiet, ke ini David okosụk ekpemede erọn̄ mmọ, akamba ekpe kiet ama edimụm erọn̄ emen efehe! Ndi ọmọfiọk se David akanamde? Enye ama ebịne ekpe oro omụm onyụn̄ ada ubọk owot enye! N̄ko ke ini bear ekedide ndimụm erọn̄, David ama owot enye n̄ko! Afo ekere ke anie akan̄wam David?— Ekedi Jehovah.

Ama odu ini en̄wen emi David ekenen̄erede enyene uko. Nditọ Israel ke ẹken̄wana ye mbon Philistia. Owo kiet ke otu mbonekọn̄ Philistia ekedi ata anyan okopidem owo! Enye ekekere Goliath. Goliath ama osụn̄i mbonekọn̄ Israel ye Jehovah. Enye ama ọdọhọ ekpedi mbonekọn̄ Israel ẹkeme yak mmọ ẹwọrọ ẹdin̄wana ye imọ. Edi ndịk ikayakke owoekọn̄ Israel ndomokiet ọwọrọ akan̄wana ye enye. Ke ini David okokopde n̄kpọ emi, enye ama ọdọhọ Goliath ete: ‘Nyan̄wana ye afo! Jehovah ayan̄wam mi, ndien nyowot fi!’ Ndi emekere ke David ama enyene uko?— Ih, ama enyene. Ndi omoyom ndifiọk se iketịbede ke oro ebede?

David emen utopitiat esie ye ndọnọ itiat ition, onyụn̄ ọwọrọ aka ndin̄wana ye Goliath. Ke ini Goliath okụtde nte David ekpride, enye asak David. Edi David ọdọhọ enye ete: ‘Afo ada akan̄kan̄ etiene mi, edi ami nda enyịn̄ Jehovah ntiene fi!’  Ekem enye esịn itiat kiet ke utopitiat esie onyụn̄ efehe ebịne Goliath okotop enye. Itiat oro ọkọtọ Goliath ke ọkpọiso! Ndien enye ọduọ ke isọn̄ akpa! Ndịk ama anam mbon Philistia tutu kpukpru mmọ ẹfehe. Didie ke ekpri akparawa nte David ekekeme ndikan akwa owo nte Goliath?— Jehovah akan̄wam enye, koro Jehovah enyene odudu akan Goliath!

Ndịk ikanamke David sia enye ama ọdiọn̄ọ ke Jehovah ayan̄wam imọ

Mbụk David emi ekpep fi nso?— Jehovah enyene odudu akan kpukpru owo. Enye onyụn̄ edi Ufan fo. Ntem ama afiak okop ndịk, ti ete ke Jehovah ekeme ndin̄wam fi enyene uko!

KOT MME ITIE EMI KE BIBLE FO