Be ka se isịnede

Be ka udiana n̄kpọ

Mme Ntiense Jehovah

Efịk

Nte Akpama Ndifiọk Akpanikọ?

Nte Akpama Ndifiọk Akpanikọ?

AKPANIKỌ aban̄ade nso? Akpanikọ aban̄ade ndusụk akpan mbụme emi mme owo ẹsibụpde. Eyedi afo emesibụp mme utọ mbụme nte:

  • Nte Abasi enen̄ede ekere aban̄a nnyịn?
  • Nte ekọn̄ ye ndutụhọ ẹyetre tutu amama?
  • Nso isitịbe inọ nnyịn ke ini ikpade?
  • Nte idotenyịn ndomokiet odu ọnọ mme akpan̄kpa?
  • N̄kpọbọn̄ didie akam nnọ Abasi man enye okop?
  • Nso ke n̄kpanam man n̄kop inemesịt?

M̀mọ̀n̄ ke afo akpaka okoyom mme ibọrọ mbụme emi? Edieke akade itie ubon n̄wed m̀mê itie unyam n̄wed, afo emekeme ndikụt ata ediwak n̄wed emi ẹdọhọde ke ẹbọrọ mme mbụme emi. Nte ededi, se n̄wed kiet etịn̄de esiwak ndituaha ye se n̄wed en̄wen etịn̄de. Mbon efen ẹsitie nte ẹdi akpanikọ, edi nte ini akade, mmọ isinyeneke ufọn aba, ndien ẹsikpụhọde mmọ.

Edi, odu n̄wed kiet emi enyenede ibọrọ oro ẹkemede ndiberi edem. Enye edi n̄wed akpanikọ. Jesus Christ ọkọdọhọ ke akam oro enye ọkọbọn̄de ọnọ Abasi ete: “Ikọ fo edi akpanikọ.” (John 17:17) Mfịn, nnyịn idiọn̄ọ Ikọ oro nte Edisana Bible. Ke mme page oro ẹtienede, afo oyokụt in̄wan̄-in̄wan̄ ye nnennen ibọrọ oro Bible ọnọde ke mme mbụme oro ẹbụpde ke enyọn̄ emi.

Nte Abasi Enen̄ede Ekere Aban̄a Nnyịn?

Eren oro otuowo ẹkande ẹkụk

NTAK ẸBỤPDE MBỤME EMI: Nnyịn idu uwem ke ererimbot oro ibak ye ukwan̄ikpe ẹyọhọde. Ediwak ido ukpono ẹkpep ke ndutụhọ oro nnyịn isobode edi uduak Abasi.

SE BIBLE EKPEPDE: Akananam Abasi inamke idiọkn̄kpọ. Job 34:10 ọdọhọ ete: “Nsa Abasi, enye idiọkke. Nsa Abasi Ibom, enye inamke ukwan̄-n̄kpọ.” Abasi aduak eti n̄kpọ ọnọ ubonowo. Ntak edi oro Jesus ekekpepde nnyịn ndibọn̄ akam ntem: “Ete nnyịn emi odude ke heaven, yak…obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:9, 10) Abasi enen̄ede ekere aban̄a nnyịn, oro esịn enye esinam uduak esie osu.—John 3:16.

Se n̄ko Genesis 1:26-28; James 1:13; ye 1 Peter 5:6, 7.

Nte Ekọn̄ ye Ndutụhọ Ẹyetre Tutu Amama?

Mbonekọn̄

NTAK ẸBỤPDE MBỤME EMI: Ekọn̄ ke aka iso ndiwot anana-ibat owo. Ndutụhọ oro mme owo ẹsobode otụk kpukpru nnyịn.

SE BIBLE EKPEPDE: Abasi etịn̄ aban̄a ini oro imọ idinamde emem odu ke ofụri isọn̄. Ke idak Obio Ubọn̄ Abasi emi edide ukara eke heaven, mme owo ‘idikpepke aba ekọn̄.’ Utu ke oro, mme owo ‘ẹyeda eduat mmọ ẹdom ikwa udiọn̄ vine.’ (Isaiah 2:4) Abasi ayanam kpukpru ukwan̄ikpe ye ndutụhọ ẹtre. Bible ọn̄wọn̄ọ ete: “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ [ẹsịnede ukwan̄ikpe ye ndutụhọ oro ẹdude mfịn] ẹma ẹbe ẹfep.”—Ediyarade 21:3, 4.

Se n̄ko Psalm 37:10, 11; 46:9; ye Micah 4:1-4.

Nso Isitịbe Inọ Nnyịn ke Ini ikpade?

Udi

NTAK ẸBỤPDE MBỤME EMI: Ata ediwak ido ukpono ererimbot ẹsikpep ẹte ke odu n̄kpọ ke idem owo emi esikade iso odu uwem ke owo ama akakpa. Ndusụk owo ẹnịm ke mme akpan̄kpa ẹkeme ndinam mme odu-uwem ibak mîdịghe ke Abasi esimia mme anamidiọk ufen ke ndibiere ikpe nsinsi ndutụhọ ke ikan̄ hell nnọ mmọ.

SE BIBLE EKPEPDE: Owo ama akpa, enye isidụhe aba. Ecclesiastes 9:5 ọdọhọ ete: “Mme akpa-n̄kpa…ifiọkke baba n̄kpọ kiet.” Sia mme akpan̄kpa mîfiọkke mînyụn̄ ikopke baba n̄kpọ kiet, mmọ ikemeke ndin̄wam m̀mê ndinam mme odu-uwem ibak.—Psalm 146:3, 4.

Se n̄ko Genesis 3:19 ye Ecclesiastes 9:610.

Nte Idotenyịn Ndomokiet Odu Ọnọ Mme Akpan̄kpa?

Eyenọwọn̄ oro ofụhọde n̄kpa owo esie

NTAK ẸBỤPDE MBỤME EMI: Nnyịn imoyom ndidu uwem, imonyụn̄ iyom ndikop inem uwem ye mbon oro nnyịn imade. Ntre, ọdọn̄ nnyịn ndifiak n̄kụt iman ye mme ufan nnyịn oro ẹma ẹkekpan̄a.

SE BIBLE EKPEPDE: Ẹyenam ata ediwak mbon oro ẹkpan̄ade ẹset. Jesus ama ọn̄wọn̄ọ ete ke ‘mme andidu ke udi editi ẹyewọn̄ọ ẹdi.’ (John 5:28, 29) Man akpa uduak Abasi osu, mbon oro ẹdinamde ẹset nte mme owo ẹyenyene ifet edidu uwem ke paradise isọn̄. (Luke 23:43) Un̄wọn̄ọ ini iso emi esịne mfọnmma nsọn̄idem ye nsinsi uwem ọnọ mme okopitem ubonowo. Bible ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

Se n̄ko Job 14:14, 15; Luke 7:11-17; ye Utom 24:15.

N̄kpọbọn̄ Didie Akam nnọ Abasi Man Enye Okop?

Eren oro ọbọn̄de akam

NTAK ẸBỤPDE MBỤME EMI: Mme owo ke se ikperede ndidi kpukpru ido ukpono ẹsibọn̄ akam. Edi, ediwak owo ẹkere ke Abasi isikopke akam mmimọ.

SE BIBLE EKPEPDE: Jesus ama eteme nnyịn ete ifep nditịn̄ mfiak ntịn̄ ukem ikọ ke akam nnyịn. Enye ọkọdọhọ ete: “Ke ini ọbọn̄de akam, kûyịre ke nditịn̄ mfiak ntịn̄ n̄kpọ kiet.” (Matthew 6:7) Edieke iyomde Abasi okop akam nnyịn, ana ibọn̄ akam ke usụn̄ oro enye enyịmede. Oyom ifiọk se uduak Abasi edide man ikeme ndibọn̄ akam nte ekemde ye uduak oro. Akpa John 5:14 anam an̄wan̄a ete: “Se ededi oro nnyịn iben̄ede ekekem ye uduak [Abasi], enye ọbiọn̄ utọn̄ ke eben̄e nnyịn.”

Se n̄ko Psalm 65:2; John 14:6, 14; ye 1 John 3:22.

Nso ke N̄kpanam Man N̄kop Inemesịt?

N̄wan oro okotde Bible oyom inemesịt

NTAK ẸBỤPDE MBỤME EMI: Ediwak owo ẹnịm ke okụk, uwọrọetop, m̀mê uyai ẹdinam mmimọ ikop inemesịt. Ntre, mmọ ẹsiyom mme n̄kpọ emi, edi isikopke inemesịt.

SE BIBLE EKPEPDE: Jesus ama owụt se ikemede ndinam owo okop inemesịt ke ini enye ọkọdọhọde ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) N̄kukụre n̄kpọ oro ekemede ndinọ nnyịn ata inemesịt edi ndiyụhọ ata akpan udọn̄ nnyịn oro edide ndifiọk akpanikọ emi aban̄ade Abasi ye se enye aduakde ndinam nnọ nnyịn. Akpanikọ oro esịne ke Bible. Ndidiọn̄ọ akpanikọ oro ekeme ndin̄wam nnyịn ndifiọk se inen̄erede idi akpan n̄kpọ ye se mîdịghe. Ndiyak akpanikọ Bible ada nnyịn usụn̄ ke mme ubiere ye ke mme edinam nnyịn ẹyenam idu uwem emi enyenede uduak.—Luke 11:28.

Se n̄ko Mme N̄ke 3:5, 6, 13-18 ye 1 Timothy 6:9, 10.

Emi akam edi mbio mbio ibọrọ oro Bible ọnọde ke mbụme itiokiet emi. Nte emenyene mbụme en̄wen oro oyomde ẹbọrọ? Edieke afo edide kiet ke otu “mmọ oro ẹkerede ẹban̄a unana mmọ ke n̄kan̄ eke spirit,” anaedi emenyene. Afo emekeme ndibụp mme utọ mbụme en̄wen nte: ‘Edieke Abasi ekerede aban̄a nnyịn, ntak emi enye ayakde ekese idiọkn̄kpọ ye ndutụhọ ẹka iso ke ofụri ini emi-e? Didie ke n̄keme ndinam uwem ubon mi enen̄ede ọfọn?’ Bible ọbọrọ mme mbụme emi ye ata ediwak eken ọyọhọ ọyọhọ.

Edi, ediwak owo mfịn isimaha ndikot Bible. Mmọ ẹda enye nte ata akamba n̄wed oro mîsin̄wan̄ake owo ndusụk ini. Ndi ayama ẹn̄wam fi okụt mme ibọrọ mbụme emi ke Bible? Mme Ntiense Jehovah ẹnyene n̄kpọ iba oro ẹkemede ndin̄wam fi.

Akpa, ẹtịm n̄wed Nso ke Bible Enen̄ede Ekpep? man an̄wam mbon oro mîsinyeneke ini ẹdụn̄ọde in̄wan̄-in̄wan̄ ibọrọ oro Bible ọnọde ke mme akpan mbụme. Ọyọhọ n̄kpọ iba edi ukpepn̄kpọ Bible mfọn emi ẹdinịmde ke ufọk fo. Mbọhọidụn̄ fo emi etiede ufan ufan onyụn̄ odotde ndikpep owo Bible ekeme ndisidi ufọk fo m̀mê ebiet en̄wen oro ọfọnde edida esisịt ini kpukpru urua eneme Bible ye afo ke mfọn. Ediwak miliọn owo ke ererimbot ẹbọ ufọn ẹto ndutịm emi. Ediwak mmọ ẹsitịn̄ idara idara ke akpatre ẹte: “Mmokụt akpanikọ!”

Idụhe n̄kpọuto oro ọsọn̄de urua akan emi. Akpanikọ Bible osio nnyịn ke ufụn nsunsu ekikere, ndutịme, ye idiọk ndịk. Enye anam inyene idotenyịn, uduak, ye idatesịt. Jesus ọkọdọhọ ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:32.

1. Eren oro ekpepde Bible; 2. N̄wan oro ekpepde Bible

Kpep N̄kpọ En̄wen

N̄kpama Ẹdikpep Mi Bible ke Mfọn

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?

MME MBỤME BIBLE ORO ẸBỌRỌDE

Ndi Abasi Onyụn̄ Etie nte Odudu?

Bible ọdọhọ ke Abasi okobot kpukpru n̄kpọ, edi ndi enye ekere aban̄a nnyịn?

MME MBỤME BIBLE ORO ẸBỌRỌDE

Nso Isitịbe Owo Ama Akpa?

Ndi mme akpan̄kpa ẹfiọk se ikade iso?

MME MBỤME BIBLE ORO ẸBỌRỌDE

Ntak Ọbọn̄de Akam-a? Ndi Abasi Oyokop Akam Mi?

Nte afo anamde n̄kpọ edibiere m̀mê Abasi oyokop akam fo.