Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Jesus Edi Usụn̄ ye Akpanikọ ye Uwem

 IBUOT 136

Ke Mben Inyan̄ Galilee

Ke Mben Inyan̄ Galilee

JOHN 21:1-25

  • JESUS OWỤT MBET IDEM KE INYAN̄ GALILEE

  • PETER YE MBON EKEN ẸNYENE NDIBỌK MME ERỌN̄

Jesus ama ọdọhọ mme mbet esie ke akpatre okoneyo oro enye odude ye mmọ ete: “Mma nset, nyebem mbufo iso n̄ka Galilee.” (Matthew 26:32; 28:7, 10) Idahaemi ediwak mbet esie ẹdaha Galilee, edi nso ke mmọ ẹdinam do?

Ini kiet, Peter ọdọhọ apostle itiokiet eken ete: “Mmọn̄ ndika ukọiyak.” Mmọ mbitiokiet ẹbọrọ enye ẹte: “Nnyịn n̄ko imọn̄ itiene fi ika.” (John 21:3) Edi mmọ imụmke baba n̄kpọ kiet ke ofụri okoneyo oro. Ke ini eyo esierede, Jesus ada ke esụk oro edi mmọ idiọn̄ọke ke enye ada oro. Jesus ada obụp mmọ ete: “N̄kpri nditọ, nte mbufo ẹmenyene se ẹdiade?” Mmọ ẹbọrọ enye ẹte “Baba!” Jesus ọdọhọ mmọ ete: “Ẹduọk iyịre ke n̄kan̄ nnasia ubom ndien mbufo ẹyemụm n̄kpọ.” (John 21:5, 6) Iyak emi mmọ ẹmụmde awak tutu mmọ ikemeke ndikot iyịre mmọ nsio.

John ọdọhọ Peter ete: “Edi Ọbọn̄!” (John 21:7) Peter ọsọsọp emen enyọn̄ ọfọn̄ esie esịne, sia enye mîkesịneke ọfọn̄ oro ke ini osụk ọkọde n̄kpọ. Enye ndien ọfrọ odụk mmọn̄ onyụn̄ ọwọk ke n̄kpọ nte ikpat ikie ita ekesịm esụk. Mbon eken ẹwat sụn̄sụn̄ ẹdidian, ẹdụri iyịre oro iyak ọyọhọde do ẹdọk obot.

Ke ini mmọ ẹsịmde esụk oro, “mmọ ẹkụt ikan̄ ukan̄ do ye iyak nte ẹdorode ke esịt, ye uyo.” Jesus ọdọhọ mmọ ete: “Ẹda ndusụk iyak emi mbufo ẹsụk ẹmụmde do ẹdi.” Peter odụk ubom okodụri iyịre emi ọyọhọde ye ikpọ iyak 153 ọdọk obot! Jesus ọdọhọ mmọ ete: “Ẹdi, ẹdidia n̄kpọ.” Idụhe baba mbet kiet emi ekenyenede uko ndibụp ete: “Afo edi anie?” koro mmọ ẹma ẹfiọk ẹte ke edi Jesus. (John 21:9-12) Ọyọhọ ikata emi enye owụtde mme mbet esie idem ke ini ediwak mmọ ẹdude ọtọkiet edi emi.

Jesus ọnọ mmọ kiet kiet uyo ye iyak ẹta. Ekem etie nte enye emenede enyịn ese akpakịp iyak oro ẹmụmde do, onyụn̄ obụp Peter ete: “Simon eyen John, nte afo amama mi akan mmọ emi?” Ndi Peter ama mbubehe ukọiyak akan utom emi Jesus oyomde enye anam? Peter ọbọrọ ete: “Ih, Ọbọn̄, afo ọmọfiọk ete mmama fi.” Jesus ndien ọdọhọ enye ete: “Bọk nditọerọn̄ mi.”—John 21:15.

Jesus ọtọn̄ọ ntak obụp enye ete: “Simon eyen John, nte afo amama mi?” Etie nte idem akpa Peter, anam enye ọbọrọ ete: “Ih, Ọbọn̄, afo ọmọfiọk ete mmama fi.” Jesus afiak etịn̄ ukem se eketịn̄de akpa ete: “Kpeme n̄kpri erọn̄ mi.”—John 21:16.

Jesus obụp Peter ọyọhọ utịm ikata ete: “Simon eyen John, nte afo amama mi?” Ekeme ndidi Peter ọtọn̄ọ ndikere m̀mê Jesus eyịk m̀mê imọ ke isụk imama enye. Enye ọbọrọ ete: “Ọbọn̄, afo ọmọfiọk kpukpru n̄kpọ; afo ọmọfiọk ete mmama fi.” Jesus afiak etịn̄ se anade Peter anam ete: “Bọk n̄kpri erọn̄ mi.” (John 21:17) Ke akpanikọ, mbon oro ẹdade usụn̄ ẹnyene ndinam n̄kpọ nnọ mbon oro Abasi odụride esịn ke otuerọn̄ esie.

Ẹma ẹbọp Jesus ẹkewot sia enye akanamde se Abasi ọkọdọn̄de enye. Enye etịn̄ n̄ko ke se ẹdinyụn̄ inamde Peter edi oro. Jesus ọdọhọ Peter ete: “Ke ini afo ekedide akparawa, afo ama esibọbọ mbọbọ onyụn̄ asan̄a aka ebiet eke oyomde. Edi ke ini ọkọride ọsọn̄ afo ayanyanade ubọk ndien owo en̄wen ọyọbọp fi mbọbọ onyụn̄ ada fi aka ebiet eke afo mûmaha.” Kpa ye oro n̄kpọ editiede ntem ye Peter, Jesus ọdọhọ enye ete: “Ka iso tiene mi.”—John 21:18, 19.

Peter okụt apostle John adade do, enye obụp Jesus ete: “Ọbọn̄, nso ke owo emi edinam?” Oro edi, nso ke apostle emi Jesus enen̄erede ama mi edinam ke ini iso? Jesus ọbọrọ enye ete: “Edieke edide uduak mi enye ndidu tutu ami ndi, nso idi mbubehe fo do?” (John 21:21-23) Ana Peter aka iso etiene Jesus, inaha enye afịna idem esie aban̄a se mbon en̄wen ẹdinamde. Edi se Jesus etịn̄de emi owụt n̄ko ke John oyodu uwem ebịghi akan mme apostle eken, ke ẹyenyụn̄ ẹwụt enye n̄kukụt emi aban̄ade nte Jesus edide ndikara ke Obio Ubọn̄.

Edi ediwak n̄kpọ en̄wen ẹdu emi Jesus akanamde, emi edide ọkpọkọm ẹda kpukpru n̄wed ke ofụri ererimbot ẹwet, owo ikpewetke ima.